Home ព័ត៌មានសំខាន់ៗ ស្ងាត់ៗ​ប្រេង...

ស្ងាត់ៗ​ប្រេងឥន្ធនៈ​កើន​ថ្លៃ​ដល់​៣.៥០០​រៀល ក្នុង​មួយ​លីត្រ​

​ដោយ​: ពៅ​និមល​/​ភ្នំពេញ​: ក្នុង​រយះពេល​០២​ខែក្រោយ​នេះ ពោល​គិត​ចាប់ពី​ខែមករា មកទល់​ខែកុម្ភៈ ឆ្នាំ​២០២១​នេះ តម្លៃ​លក់រាយ​ប្រេងឥន្ធនៈ​តាម​បណ្តា​ស្ថានីយ​ធំៗ បាន​កើន​តម្លៃ​ជា​បន្តបន្ទាប់​រហូត ក្នុងនោះ​សម្រាប់​ប្រេងសាំង​ធម្មតា​ថ្លៃ ៣.៥០០​រៀល ក្នុង​មួយ​លីត្រ​។ រីឯ​ប្រេងម៉ាស៊ូត​ថ្លៃ ៣.២០០​រៀល នៅក្នុង​មួយ​លីត្រ​។

​ក្រសួងពាណិជ្ជកម្ម​បាន​លើកឡើង​ក្នុង​សេចក្តីជូនដំណឹង ស្តីពី​ថ្លៃ​លក់រាយ​ប្រេងឥន្ធនៈ​នៅតាម​ស្ថានីយ ថា ផ្អែក​តាម​តម្លៃ​មធ្យម​ប្រេងឥន្ធនៈ​លើ​ទីផ្សារ​ថ្លៃ​អន្តរជាតិ ថ្លៃ​លក់រាយ​ប្រេងឥន្ធនៈ​ពីថ្ងៃ​ទី​១៦ ដល់​ថ្ងៃទី​២៨ ខែកុម្ភៈ ឆ្នាំ​២០២១ នឹងត្រូវ​លក់​៣.៦៦០​រៀល ក្នុង​មួយ​លីត្រ សម្រាប់​សាំង​ធម្មតា EA92 និង​៣.៣៦០​រៀល ក្នុង​មួយ​លីត្រ សម្រាប់​ប្រេងម៉ាស៊ូត​។ ទាក់ទង​តម្លៃ​លក់​ប្រេងឥន្ធនៈ​នេះ ក្រសួង​បាន​បញ្ជាក់ថា មិនមែនជា​អ្នកកំណត់​ថ្លៃ​លក់រាយ​ប្រេងឥន្ធនៈ​នៅ​កម្ពុជា​ទេ គឺ​ក្រសួង​គ្រាន់តែ​ស្រង់តម្លៃ​ឡើង​-​ចុះ នៃ​ប្រេង​តាម​ទីផ្សារ​អន្តរជាតិ​មក​គណនា​តាម​ប្រកាស​ដូច​មាន​ក្នុង​ឯកសារ​ប៉ុណ្ណោះ​។​

​សូម​រម្លឹកថា តម្លៃ​លក់រាយ​ប្រេងឥន្ធនៈ ចន្លោះ​ថ្ងៃទី​០១ ដល់​ថ្ងៃទី​៣១ ខែមករា ដើមឆ្នាំ​២០២១​នេះ សម្រាប់​ប្រេងសាំង​ធម្មតា ថ្លៃ​៣.២០០​រៀល ក្នុង​មួយ​លីត្រ​។ ចំណែក​ប្រេងម៉ាស៊ូត​ថ្លៃ ២.៩៥០​រៀល ក្នុង​មួយ​លីត្រ​ប៉ុណ្ណោះ​៕​

ទីតាំងផ្សាយពាណិជ្ជកម្ម

- Advertisment -

Most Popular