Home ព័ត៌មានអន្តរជាតិ យោធា​មី​យ៉ាន់...

យោធា​មី​យ៉ាន់​ម៉ា​ធានា​ការបោះឆ្នោត​ថ្មី នៅពេល​បាតុករ​បិទ​ផ្លូវ​រថភ្លើង​

​ប្រែ​សម្រួលៈ​វាសនា​/​យ៉ាងហ្គោន​៖​យោធា​មី​យ៉ាន់​ម៉ា​កាលពី​ថ្ងៃ​អង្គារ​ទី​១៦​កុម្ភៈ​បាន​និយាយថា​ខ្លួន​គ្មាន​ជំរើស​ណា​ក្រៅពី​ដណ្តើម​អំណាច​ដោយសារតែ​ពួក​មេដឹកនាំ​ស៊ីវិល​មិន​បាន​ដោះស្រាយ​ការចោទប្រកាន់​​ស្តី​ពី​ការលួចបន្លំ​សន្លឹកឆ្នោត ដូច្នេះ​វា​«​មិនមែន​ជា​រដ្ឋប្រហារ​»​ទេ និង​បាន​ធានាថា យោធា​នឹង​រៀបចំ​ការបោះឆ្នោត​មួយ​ហើយ​នឹង​ប្រគល់​អំណាច​ទៅអោយ​អ្នកឈ្នះ​។​

​តាមរយៈ​អ្នកនាំពាក្យ យោធា​មី​យ៉ាន់​ម៉ា​ក៏​បាន​ថ្កោលទោស​ពួក​អ្នក​ប្រឆាំង​តវ៉ា​ចំពោះ​ការ​ញុះញង់​អោយមាន​អំពើ​ហិង្សា​និង​បំភិតបំភ័យ​អ្នករដ្ឋការ​ស៊ីវិល​។​

​យោធា​មី​យ៉ាន់​ម៉ា​បាន​ព្យាយាម​អះអាង​ថា​វា​ជាការ​ស្របច្បាប់​ដែល​ខ្លួន​ដណ្តើម​អំណាច​និង​ចាប់ខ្លួន​មេដឹកនាំ​រដ្ឋាភិបាល អ៊ុង សាន ស៊ូ​ជី និង​អ្នក​ដទៃ​ទៀត​នៅ​ពេល​អ្នក​ប្រឆាំង​តវ៉ា​ជា​ថ្មី​ទៀត​បាន​នាំគ្នា​​ចេញ​មក​តាម​ដង​វិថី និង​តំណាង​អង្គការសហប្រជាជាតិ​បាន​ព្រមាន​យោធា​ប្រទេស​នេះ​អំពី​«​ផលវិបាក​ធ្ងន់ធ្ងរ​» ចំពោះ​ចម្លើយ​តប​ដ៏​ខ្លាំង​ណាមួយ​លើ​បាតុករ​។​

​អ្នកនាំពាក្យ​យោធា​ឧត្តមសេនីយ៍ ហ្សរ មីន ទុន បាន​ប្រាប់​សន្និសីទកាសែត​ថា « គោលដៅ​របស់​យើង គឺ​រៀបចំ​ការបោះឆ្នោត​មួយ និង​ប្រគល់​អំណាច​ទៅ​អោយ​គណបក្ស​ដែល​ឈ្នះឆ្នោត​។​យើង​ធានាថា​…​នឹង​មាន​ការបោះឆ្នោត​»​។​

​ទោះជា​យ៉ាងណា យោធា​មិន​បាន​បញ្ជាក់​ប្រាប់​អំពី​កាលបរិច្ឆេទ​នេះ​ទេ គ្រាន់តែ​ថា ខ្លួន​នឹង​គ្រប់គ្រង​ប្រទេស​ក្នុង​គ្រាអាសន្ន​មួយឆ្នាំ​។​

​នៅពេល​ត្រូវ​បាន​សួរ​អំពី​ការឃុំ​ខ្លួន​លោកស្រី ស៊ូ​ជី និង​ប្រធានាធិបតី អ្នកនាំពាក្យ​បាន​និយាយ​ថា​យោធា​នឹង​ធ្វើ​តាម​រដ្ឋធម្មនុញ្ញ​។​

​ក្នុងពេល​ជាមួយគ្នា មាន​សេចក្តីរាយការណ៍​ថា សេវា​រថភ្លើង​រវាង​ក្រុង​យ៉ាងហ្គោន និង​ទីក្រុង​ម៉​រឡាំ​យីន​ត្រូវ​បាន​រារាំង​រំខាន​ដោយ​អ្នក​ប្រឆាំង​តវ៉ា​។​អ្នក​ប្រឆាំង​តវ៉ា​ក៏​បាន​ចេញ​មក​នៅ​តាម​ទីក្រុង​និង​ទី​ប្រ​​ជុំ​ជន​នៅ​ទូទាំង​ប្រទេស​ដែល​មាន​ក្រុម​ជនជាតិ​ចំរុះ​នេះ ហើយ​កូដកម្ម​ក៏​កំពុង​ធ្វើអោយ​គាំង​ដំណើរការ​រដ្ឋាភិបាល​។​

​លោកសង្ឃ​ប្រមាណ​៣០​អង្គ​បាន​ចេញមក​ប្រឆាំង​នឹង​រដ្ឋប្រហារ​នៅ​ក្រុង​យ៉ាងហ្គោន នៅ​ពេល​អ្នក​ប្រឆាំង​តវ៉ា​រាប់រយ​នាក់​ដើរ​ដង្ហែ​កាត់​ទីប្រជុំជន ថា​ន់​វ៉េ​៕

​អ្នក​ប្រឆាំង​តវ៉ា​បិទផ្លូវ​រថ​ភ្លង​រវាង​ក្រុង​យ៉ាងហ្គោន​និង​ទីក្រុង ម៉​រឡាំ​យីន នៅពេល​បុគ្គលិក​រថភ្លើង​ចូលរួម​បាតុកម្ម​

 

 

 

ទីតាំងផ្សាយពាណិជ្ជកម្ម

- Advertisment -

Most Popular