Home ព័ត៌មានជាតិ សន្តិសុខ ​កាត់ទោស​បុរស...

​កាត់ទោស​បុរស​វ័យ​ចំណាស់ ២​នាក់ ដែល​ប្រមាថ​ព្រះមហាក្សត្រ​

ដោយៈ ស​រិ​ទ្ធ / ភ្នំពេញៈ អតីត​សមាជិក អតីត​គណបក្ស​សង្គ្រោះ​ជាតិ ២ នាក់ ក្នុងស្រុក​សង្កែ ខេត្តបាត់ដំបង ត្រូវបាន​នាំខ្លួន មក​កាត់ទោស នៅ​សាលាដំបូង រាជធានី​ភ្នំពេញ នា​ល្ងាច​ថ្ងៃទី ១៦ ខែកុម្ភៈ ឆ្នាំ​២០២១​នេះ ពាក់ព័ន្ធ​នឹង​បទល្មើស ប្រមាថ​ព្រះមហាក្សត្រ​។ សវនាការ​មាន​លោក កុល កំពូល ជា​ចៅក្រម​ជំនុំជម្រះ និង​លោក សម ឬ​ទ្ធី​វាសនា តំណាង​អយ្យការ​។​

​ជនជាប់ចោទ​ទាំង ២ នាក់ ដែល​តុលាការ កាត់ទោស​មានឈ្មោះ គង់ ប៊ុន​ហ៊ាង ភេទ​ប្រុស អាយុ ៦៧ ឆ្នាំ ជា​អតីត​យោធិន​ចូលនិវត្តន៍ រស់នៅ​ស្រុក​សង្កែ ខេត្តបាត់ដំបង និង​ឈ្មោះ ហង្ស សេង អាយុ ៧០ ឆ្នាំ រស់នៅ​ស្រុក​សង្កែ ខេត្តបាត់ដំបង ។​

​តុលាការ បាន​ចោទប្រកាន់​បុរស​វ័យ​ចំណាស់ ទាំង​២​នាក់ ពីបទ « ប្រមាថ​ព្រះមហាក្សត្រ​» តាម​ប​ញ្ញ​តិ​មាត្រា ៤៣៧ នៃ​ក្រមព្រហ្មទណ្ឌ ប្រព្រឹត្ត​កាលពី​ថ្ងៃទី ១៦ ខែតុលា ឆ្នាំ​២០២០ នៅ​ខេត្តបាត់ដំបង ។​

​ក្នុង​សវនាការ ជនជាប់ចោទ​ទាំង ២​នាក់ គឺ​១.​ឈ្មោះ គង់ ប៊ុន​ហ៊ាង និង​២.​ឈ្មោះ ហង្ស សេង បាន​សារភាពថាៈ ពួកគាត់ ពិតជា​បាន​ទូរស័ព្ទ​និយាយ​គ្នា កាលពី​ថ្ងៃទី ១៦ ខែតុលា ឆ្នាំ​២០២០ ដោយមាន​ខ្លឹមសារ​ប្រមាថ ដល់​អង្គ​ព្រះមហាក្សត្រ ពិតមែន ពោលគឺ ការប្រមាថ ដោយ​ពាក្យ​អសុរោះ អគតិ អាក្រក់​ស្ដាប់​ជាច្រើន ដែលមាន​រយៈពេល នៃ​ការសន្ទនា ប្រមាណ​ជា ១០ នាទី​ឯណោះ​។ ឈ្មោះ​គង់ ប៊ុន​ហ៊ាង និង​ឈ្មោះ ហង្ស សេង បាន​ទទួលស្គាល់ថា ពាក្យ​ជេរប្រមាថ​អស់នោះ គឺ​ចេញ​មកពី​មាត់​របស់​ពួកគាត់ ពិតៗ ដោយសារតែ​ផឹក​គ្រឿង​ស្រវឹង ។​

​តំណាង​អយ្យការ បានចាត់ទុក​ការប្រមាថ​នោះ មាន​ភាព​ធ្ងន់ធ្ងរ មិនអាច​អត់ឱន​ឱ្យបាន និង​ស្នើឱ្យ​ចៅក្រម​ផ្ដន្ទាទោស តាមច្បាប់ ។​

​រឿងក្ដី​នេះ តុលាការ បានកំណត់​យក​ថ្ងៃទី​២ ខែមីនា ឆ្នាំ​២០២១ វេលា​ម៉ោង ២ រសៀល ដើម្បី​ប្រកាស​សាលក្រម​៕/V

ទីតាំងផ្សាយពាណិជ្ជកម្ម

- Advertisment -

Most Popular