​សមត្ថកិច្ច ច្រកទ្វារព្រំដែន​ព្រែក​ចាក បង្កើន​ការ​រឹតបន្តឹង​ត្រួតពិនិត្យ លើ​ការដោះដូរ​ទំនិញ និង​ដំណើរ​ឆ្លងកាត់​

​ដោយៈ បូកគោ / កំ​ពតៈ មន្ត្រី​សមត្ថកិច្ច​ច្រកទ្វារព្រំដែន​អន្តរជាតិ ព្រែក​ចាក ខេត្តកំពត បាននិងកំពុង​បង្កើន​ការ​រឹតបន្តឹង លើ​ដំណើរ​ឆ្លងកាត់ ព្រមទាំង​ត្រួតពិនិត្យ ការដោះដូរ​ទំនិញ គ្រប់​ប្រភេទ​។ នេះ​ជា​កិច្ច​ឆ្លើយតប ទៅនឹង​បទបញ្ជា​របស់ ប្រមុខ​រាជរដ្ឋាភិបាល​កម្ពុជា ចំពោះ​បណ្តា​ខេត្ត​ជាប់​ព្រំដែន ដែល​ត្រូវការពារ ឱ្យបាន​នូវ​ការ​លួច​ឆ្លងដែន ខុសច្បាប់ ខណៈ​ប្រទេសជិតខាង ពិសេស​ប្រទេស​វៀតណាម កាន់តែ​មានការ​រីក​រា​ល​ដាល និង​លេចឡើង នូវ​ការ​បំប្លែង​ខ្លួន​ថ្មី នៃ​ជំងឺ​កូ​វីដ​១៩ ចូលក្នុង​សហគមន៍​។​

​លោក ង៉ែត សាវឿន ប្រធាន​ទីស្នាក់ការ​ត្រួត​ពិនិត្យ ច្រកទ្វារព្រំដែន​អន្តរជាតិ ព្រែក​ចាក បាន​ប្រាប់ឱ្យដឹង កាលពី​ព្រឹក ថ្ងៃទី​១៦ ខែកុម្ភៈ ឆ្នាំ​២០២១​ថាៈ ច្រកទ្វារព្រំដែន​អន្តរជាតិ ព្រែក​ចាក មាន​ច្រក​ធំ​មួយ និង​ច្រករបៀង ចំនួន​បី​។ បច្ចុប្បន្ន ច្រក​ទាំងនេះ កំពុងបើក​ដំណើរការ តែ​ច្រក​ធំ​មួយ​ប៉ុណ្ណោះ ដើម្បី​ផ្ទេរ​ទំនិញ នៅត្រង់ចំណុច​តំបន់ ស ដោយ​ចាប់ផ្តើម​បើក​ដំណើរការ ដោះដូរ​ទំនិញ ពី​ម៉ោង ៦ ព្រឹក ដល់​ម៉ោង ៦ ល្ងាច​។ ក្នុងនោះ ទំនិញ​នាំចូល​ពី​វៀតណាម ច្រើនជាង​ទំនិញ នាំ​ចេញពី​កម្ពុជា ដែល​ក្នុងដំណាក់កាល​កូ​វីដ​១៩​នេះ ទំនិញ​ភាគច្រើន ជា​ផលិតផល​កសិកម្ម និង​អីវ៉ាន់​ចាបហួយ​។​

​លោក​ប្រធាន បានបញ្ជាក់​ថាៈ យានយន្ត​ដឹកទំនិញ​គ្រប់​ប្រភេទ និង​ទំនិញ​សព្វសារពើ ត្រូវបាន​បាញ់ថ្នាំ​សម្លាប់​មេរោគ ពេល​ចូល និង​ចេញ​មកវិញ​។ ដោយឡែក អ្នកបើកបរ​រថយន្ត និង​កម្មករ លើកដាក់​អីវ៉ាន់ ក៏​ត្រូវបាន​ត្រួតពិនិត្យ​សុខភាព ព្រមទាំង​ស្កេ​នក​ម្ដៅ យ៉ាង​ប្រយ័ត្នប្រយែង​បំផុត​។​

​លោក ង៉ែត សាវឿន បាន​បន្តថាៈ ដើម្បី​បង្ការ​ករណី​លួច​ឆ្លងដែន​ខុសច្បាប់ តាម​ច្រកទ្វារព្រំដែន អន្តរជាតិ​ព្រែក​ចាក លោក​បានដាក់​ចេញ​នូវ សេចក្តីណែនាំ​ដល់ មន្ត្រី​ឈរជើង​ប្រចាំការ ត្រូវ​អនុវត្តតាម​បទបញ្ជា របស់​សម្តេច​តេ​ជោ ឱ្យបាន​ដាច់ខាត​។ ក្នុងករណី​មានការ​អនុញ្ញាត ឱ្យ​ពលរដ្ឋ​ទាំងសងខាង ចេញចូល ដោយ​ខុសច្បាប់​នោះ នឹងត្រូវ​ទទួលទោស ឬ​ការពិន័យ​របស់ មន្ត្រី​ជំនា​ញច​ត្តា​ឡី​ស័ក មិនអាច​លើកលែង​ឡើយ​។​

​លោក បានបញ្ជាក់​ទៀតថាៈ បញ្ហា​ទាំងនេះ ត្រូវបាន​លោក​អភិបាល​ខេត្តកំពត ដាស់តឿន​ជា​ញឹកញយ និង​ដាក់​ផែនការ​រឹតបន្តឹង ទាំង​លើ​ការអនុវត្ត​ការងារ របស់​មន្ត្រី ក៏ដូចជា ការងារ​ត្រួតពិនិត្យ​ទូទៅ តាម​ច្រកទ្វារ ដើម្បី​ធានា​ដល់​ការបង្ការ ទប់ស្កាត់ រាល់​បទល្មើស​ឆ្លងដែន​ផ្សេងៗ​៕/V​

ទីតាំងផ្សាយពាណិជ្ជកម្ម

- Advertisment -

Most Popular