Home ព័ត៌មានជាតិ សន្តិសុខ ចាប់​មន្ត្រីប...

ចាប់​មន្ត្រីប៉ូលិស​ម្នាក់​ជា​មេក្លោង​ជួញដូរ​គ្រឿង និង​បក្ខពួក​ចំនួន ៣​នាក់

ដោយ​: មុនី​រ័ត្ន / ភ្នំពេញ​: មន្ត្រីប៉ូលិស​ម្នាក់​ជា​មេក្លោង​ជួញដូរ​គ្រឿង និង​បក្ខពួក​ចំនួន ៣​នាក់ ត្រូវបាន​សមត្ថកិច្ច​ចាប់ខ្លួន​ពាក់ព័ន្ធ​ការជួញដូរ​គ្រឿងញៀន នៅក្នុង​ផ្ទះសំណាក់​ស្រែ​ផល នៅ​ភូមិ​ចុង​ថ្នល់​ខាងកើត សង្កាត់​ទឹកថ្លា ខណ្ឌ​សែន​សុខ និង​ដកហូត​វត្ថុតាង​គ្រឿងញៀន​០៥​កញ្ចប់​តូចធំ​។ ការបង្ក្រាប​នេះ ដោយ​កម្លាំង​នគរបាល​ការិយាល័យ​ប្រឆាំង​គ្រឿងញៀន នៃ​ស្នងការដ្ឋាន​នករបាល​រាជធានី​ភ្នំពេញ កាលពី​ថ្ងៃទី​១៥ ខែកុម្ភៈ ឆ្នាំ​២០២១ ដោយបាន​ការសម្របសម្រួល​នីតិវិធី​ពី​លោក ប្លង់ សុផល ព្រះរាជអាជ្ញារង នៃ​អយ្យការ​អម​សាលាដំបូង​រាជធានី​ភ្នំពេញ​។

​លោក​វរសេនីយ៍ទោ រ៉ឹ​ម ម៉ិច នាយការិយាល័យ​នគរបាល​ប្រឆាំង​គ្រឿងញៀន បានដឹងថា ប្រតិបត្តិ​ការបង្ក្រាប​គ្រឿង​ញៀន​ធ្វើឡើង ខណៈដែល​ជនសង្ស័យ​គ្រឿងញៀន​ទាំងនេះ កំពុង​ធ្វើ​សកម្មភាព​ប្រព្រឹត្ត​បទល្មើស​ជាក់ស្តែង​។ ជនសង្ស័យ​នៅពេល​ឃើញ​សមត្ថកិច្ច​ចូលទៅ​បង្ក្រាប ក៏បាន​ក្រវាត់​គ្រឿងញៀន​ចេញពី​បន្ទប់​ផ្ទះសំណាក់ ដើម្បី​បំផ្លាញ​ភ​ស្ថុ​តាង ក្រោយ​ពេលដែល​កម្លាំង​នគរបាល​ការិយាល័យ​ជំនាញ បាន​ស្រាវជ្រាវ​ស៊ើបអង្កេត​លើ​មុខសញ្ញា​ជនសង្ស័យ​គ្រឿងញៀន​ទាំងនោះ​ជា​យូរ​មកហើយ​។​

​លោក​បន្តថា ការបង្ក្រាប​ជនសង្ស័យ​គ្រឿងញៀន​មុនដំបូង​កម្លាំង​សមត្ថកិច្ច ចុះបង្ក្រាប នៅ​ចំណុច​ផ្លូវ​បេតុង ភូមិ​ថ្មគោល សង្កាត់​ចោមចៅ​២ ខណ្ឌ​ពោធិ៍​សែន​ជ័យ ឃាត់ខ្លួន​ជនសង្ស័យ​ម្នាក់ ឈ្មោះ ទេព ដា​រា​ស័​ក្ត ភេទ​ប្រុស អាយុ​១៨​ឆ្នាំ ជនជាតិខ្មែរ មុខរបរ​ដឹក​ឥ​វ៉ាន់​អន​ឡាញ ដកហូត​វត្ថុតាង គ្រឿងញៀន​ក្រាម​ពណ៌​ស​ចំនួន​០២​កញ្ចប់​តូច​និង​ធំ​,​និង​ម៉ូតូ​ចំនួន​០១​គ្រឿង​,​រួម​ទូរស័ព្ទ​០៣​គ្រឿង​។

ជា​បន្ត​ដោយមាន​ចម្លើយសារភាព​ពី​ជនសង្ស័យ​ឈ្មោះ ទេព ដា​រា​ស័​ក្ត និង​មានការ​សហការ​ពី​នគរបាល​ខណ្ឌ​សែន​សុខ សមត្ថកិច្ច​បន្តធ្វើ​ការ​ឆែកឆេរ​បន្ទប់​លេខ​១៣ ផ្ទះសំណាក់​ស្រែ​ផល ភូមិ​ចុង​ថ្នល់​ខាងកើត សង្កាត់​ទឹកថ្លា ខណ្ឌ​សែន​សុខ ឃាត់ខ្លួន​ជនសង្ស័យ​ម្នាក់​ឈ្មោះ តាន់ ហុក​សេង ភេទ​ប្រុស អាយុ ៣៨​ឆ្នាំ ជនជាតិខ្មែរ មុខរបរ​នគរបាល ដកហូត​វត្ថុតាង​ថ្នាំញៀន​ក្រាម​ពណ៌​ស​ចំនួន​០៣​កញ្ចប់​ធំ ដែល​ជនសង្ស័យ​ឈ្មោះ តាន់ ហុក​សេង បាន​ទម្លាក់​គ្រឿងញៀន​ចេញមកក្រៅ​តាម​បង្អួច​ដើម្បី​បំផ្លាញ​វត្ថុតាង​និង​ក៏បាន​រកឃើញ​វត្ថុតាង​ជញ្ជីង​ថ្លឹង​គ្រឿងញៀន​អេ​ឡិច​ត្រូ​និ​ច​ចំនួន​០១​គ្រឿង​, ថង់​ប្លា​ស្ទិ​ក​សម្រាប់​ច្រក​គ្រឿងញៀន​មួយចំនួន​,​ទូរស័ព្ទ​ចំនួន​០២​គ្រឿង​និង​បន្តធ្វើ​ការឆែកឆេរ​បន្ទ​ប់​លេខ​១៤ សមត្ថកិច្ច​ក៏បាន​រកឃើញ​ឧបករណ៍​សម្រាប់​ប្រើប្រាស់​គ្រឿងញៀន​មួយចំនួនទៀត​ផងដែរ​។

ជា​បន្ត​កម្លាំង​ការិយាល័យ​ជំនាញ​មានការ​សហការ​ពី​នគរបាល​ខណ្ឌ​ពោធិ៍​សែន​ជ័យ បានធ្វើការ​ឆែកឆេរ​ផ្ទះ​លេខ​៩០ ផ្លូវ​លេខ​២៤ បូរី​ពិភពថ្មី ភូមិ​ត្រពាំង​ថ្លឹង​៤ សង្កាត់​ចោមចៅ​ទី​១ ខណ្ឌ​ពោធិ៍​សែន​ជ័យ ឃាត់ខ្លួន​ជនសង្ស័យ​បក្ខពួក​ចំនួន​០២​នាក់​៖ ១-​ឈ្មោះ ទេព ផលរាជ​នី ភេទ​ស្រី អាយុ​២៨​ឆ្នាំ ជនជាតិខ្មែរ​, ២-​ឈ្មោះ ឡូញ ពិសី ភេទ​ស្រី អាយុ​៣០​ឆ្នាំ ជនជាតិខ្មែរ និង​ដកហូត​វត្ថុតាង​ជា​ឧបករណ៍​សម្រាប់​ប្រើប្រាស់​គ្រឿងញៀន​មួយចំនួនទៀត​។​

​ជនសង្ស័យ​និង​វត្ថុតាង​គ្រឿងញៀន​ត្រូវបាន​កម្លាំង​ការិយាល័យ​ជំនាញ​កសាង​សំណុំរឿង​ចាប់​បញ្ជូនទៅ​តុលាការ​ចាត់ការ​តាមផ្លូវ​ច្បាប់​៕​

ទីតាំងផ្សាយពាណិជ្ជកម្ម

- Advertisment -

Most Popular