Home កីឡា ប៉េប ហ្គាឌី​អ...

ប៉េប ហ្គាឌី​អូ​ឡា ៖ ការ​ឈប់សម្រាក​រដូវ​បាល់ទាត់​អន្តរជាតិ​នឹង​នាំឱ្យ​កើនឡើង​ករណី​វីរុស​កូរ៉ូណា​

​ប្រែ​សម្រួល : កញ្ញា​ដា​លី​ស ៖ លោក​ប៉េប ហ្គាឌី​អូ​ឡា​បារម្ភ​ថា​ការ​ឈប់សម្រាក​រដូវ​បាល់ទាត់​អន្ដរជាតិ​នៅ​ខែ​ក្រោយ​អាច​នាំឱ្យ​មាន​ការកើនឡើង​នៃ​ករណី​វីរុស​កូរ៉ូណា​នៅក្នុង​បាល់ទាត់​ដែល​អា​ច​បំផ្លាញ​អស់​​នូវ​ការងារ​ខំ​ប្រឹង​ធ្វើ​ជា​ច្រើន​ខែ​ដើម្បី​ទប់ស្កាត់​ការរីក​រាលដាល​នៃ​វីរុស​នេះ​។​

​លោក​ហ្គាឌី​អូ​ឡា​នឹង​ដឹកនាំ​ក្រុម​របស់​លោក​ទៅកាន់​ទឹកដី​របស់​ក្រុម​ស្ករ​គ្រាប់ Everton នៅ​ថ្ងៃ​ពុធ​នេះ ដើម្បី​បំពេញ​ការប្រកួត​នៅ Premier League ដែល​ត្រូវបាន​ពន្យារពេល​កាលពី​ថ្ងៃទី ២៨ ខែ​ធ្នូ​ដោយសារ​ផ្ទុះ​ករណី​វិជ្ជមាន​ជា​ច្រើន​នៅក្នុង​ជំរំ​របស់ City ។​

​អំឡុង​ពេល​ដែល​ការប្រកួត​នេះ​ត្រូវបាន​ផ្អាក មាន​ការព្រួយបារម្ភ​ថា​លី​ក​កំពូល​អង់គ្លេស​អាច​ប្រឈម​នឹង​ការផ្អាក ខណៈ​ក្លិប​មួយចំនួន​ត្រូវ​បង្ខំចិត្ត​បិទ​ទីលាន​ហ្វឹកហាត់​ប៉ុន្តែ​អ្វី​ដែល​លោក​ហ្គាឌី​អូ​ឡា​ហៅថា “​ការងារ​ពិសេស​” ពី​ក្របខ័ណ្ឌ Premier League ក្នុងការ​រឹតបន្តឹង​ពិធីសារ​នានា បាន​នាំទៅដល់​ការធ្លាក់​ចុះ​ករណី​ឆ្លង​គួរឱ្យកត់សម្គាល់​ក្នុង​ខែមករា​។​

​កាលពី​សប្តាហ៍​មុន ការធ្វើតេ​ស្តិ៍លើ​កីឡា​ករនិង​បុគ្គលិក​ចំនួន ២.៩៧០ នាក់​នៅ​ទូទាំង​លី​ក​កំពូល​អង់គ្លេស​បាន​រក​ឃើញ​ករណី​វិជ្ជមាន​ចំនួន ២ ធៀប​នឹង ៣៦ ករណី​ពី​ការធ្វើតេ​ស្តិ៍​ពី​មនុស្ស ២.៥៩៣ នាក់​រវាង​ថ្ងៃទី ៤-១០ ខែ​មករា និង ២៨ ករណី​ពី​ការ​ធ្វើតេស្តិ៍​មនុស្ស ១.៣១១ នាក់​រវាង​ថ្ងៃទី ២៨-៣១ ខែ​ធ្នូ​។​

​ប៉ុន្តែ​ខណៈ​ក្រុម​ជម្រើសជាតិ​ត្រៀម​ជួប​ប្រកួត​គ្នា​នៅ​សប្តាហ៍​ចុងក្រោយ​នៃ​ខែ​មីនា​ខាងមុខ លោក​ហ្គាឌី​អូ​ឡា​ព្រួយបារម្ភ​ថា បញ្ហា​ជាច្រើន​អាច​នឹង​កើតឡើង​នៅពេល​ខាងមុខ​។​

​លោក​ហ្គាឌី​អូ​ឡា​និយាយថា “​សង្ឃឹមថា​មិន​អ៊ីចឹង​ទៅ​ចុះ ប៉ុន្តែ​វិធី​តែមួយ​គត់​ដើម្បី​ការពារ​ពី​វីរុស​នេះ​គឺ​ត្រូវ​នៅ​ផ្ទះ​និង​កុំ​ធ្វើ​បំលាស់​ទៅ រក្សា​គម្លាត​សង្គម និង មិន​ប៉ះពាល់​មនុស្ស ពោលគឺ​កុំ​ធ្វើដំណើរ​”​។​

​លោក​បន្តថា “​ឥឡូវនេះ មនុស្ស​នឹង​ធ្វើ​ដំណើរ​ហើយ​កីឡាករ​នឹង​ចូល​ទៅ​ក្រុម​ជម្រើសជាតិ​របស់​ពួកគេ​។ វា​ពិបាក​គ្រប់គ្រាន់​ហើយ​ក្នុង​ការគ្រប់គ្រង​មេរោគ ហើយ​ខ្ញុំ​គិត​ថា​អ្វី​មួយ​នឹង​បន្ត​កើនឡើង​ជា​​អកុសល​។ ខ្ញុំ​ចង់​ទាយ​ថា​រឿង​អ៊ីចឹង​នឹង​មិន​កើត​ឡើង​ទៅ​ចុះ ប៉ុន្តែ​បទពិសោធ​និយាយថា​វា​បាន​កើតឡើង​នៅក្នុង​រលក​ពីរ​ឬ​បី​រួច​ទៅ​ហើយ​នៅ​លើ​ពិភពលោក ដូច្នេះ​ប្រសិនបើ​អ្នក​ធ្វើ​បំលាស់​ទី អ្នកនឹង​ប្រឈមមុខ​នឹង​ការឆ្លង​មេរោគ​ម្តងទៀត​”៕

លោក​ប៉េប ហ្គាឌី​អូ​ឡា​បារម្ភ​ថា ការ​ឈប់សម្រាក​រដូវ​បាល់ទាត់​អន្តរជាតិ​នឹង​នាំឱ្យ​កើនឡើង​ករណី​កូវី​ដ​សាជាថ្មី

ទីតាំងផ្សាយពាណិជ្ជកម្ម

- Advertisment -

Most Popular