Home ព័ត៌មានជាតិ សន្តិសុខ តុលាការ ជម្រះ...

តុលាការ ជម្រះក្ដី ករណី​ឃាតក ស​សៃ​ប្រសាទ អា​រក សម្លាប់​ម្ដាយបង្កើត​

​ដោយៈ ស​រិ​ទ្ធ / ភ្នំពេញៈ រឿងក្ដី​ឃាតកម្ម ឃោរឃៅ ដោយ​អារ ក សម្លាប់​ម្ដាយបង្កើត កាត់ផ្ដាច់​ក្បាល​ពី​ដងខ្លួន ត្រូវបាន​ចៅក្រម សាលាដំបូង​រាជធានី​ភ្នំពេញ លើក​មក​បើកសវនាការ ជំនុំជម្រះ កាលពី​ល្ងាច ថ្ងៃទី​១៦ ខែកុម្ភៈ ឆ្នាំ​២០២១ នៅ​ចំពោះមុខ​ឃាតក ដែលមាន​អាកា​រៈ​ជំងឺ​វិប្បលាស ( ស​សៃ​ប្រសាទ )​។​

​ជនដៃដល់ ជា​ឃាតក ឈ្មោះ អ៊ា​ម សំណាង ភេទ​ប្រុស អាយុ ៣៣ ឆ្នាំ ជា​បុគ្គលិក​ក្រុមហ៊ុន លក់​ម៉ូតូ​ហុងដា មាន​លំនៅស្ថាន ផ្ទះជួល ក្នុង​សង្កាត់​ចោមចៅ ខណ្ឌ​ពោធិ៍​សែន​ជ័យ ។​

​លោក ជា សុវណ្ណ អធិការរង​ទទួលបន្ទុក​កិច្ចការ​ព្រហ្មទណ្ឌ បាន​រាយការណ៍ ជូន​តុលាការ ក្នុង​សវនាការ​ថាៈ នៅវេលា​ល្ងាច ថ្ងៃទី​២៨ ខែសីហា ឆ្នាំ​២០២០ លោក​បានទទួល​ព័​តិ​មាន​ថា មាន​អំពើ​ឃាតកម្ម នៅក្នុង​ភូមិ​ចោមចៅ ។ បន្ទាប់មក លោក​បាន​ដឹកនាំ​កម្លាំង​សមត្ថកិច្ច​មូលដ្ឋាន ចុះ​ទៅដល់​កន្លែងកើតហេតុ ក៏បាន​ឃើញ​សព​ស្ត្រី​ចំណាស់​ម្នាក់ ត្រូវគេ​សម្លាប់ កាត់​ក្បាល​ផ្ដាច់​ចេញពី​ដងខ្លួន នៅមុខ​បន្ទប់​ផ្ទះជួល និង​កូនកាំបិត​ចុង​ស្រួច​មួយ នៅក្បែរ​សាកសព ។ ភ្លាមនោះ សមត្ថកិច្ច បាន​ប្រមូល​ព័​តិ​មាន នៅ​ជុំវិញ​កន្លែងកើតហេតុ ទើប​ដឹងថា ជនរងគ្រោះ ដែល​ស្លាប់​ឈ្មោះ ហាក់ សីហា អាយុ ៦៥ ឆ្នាំ ជា​អ្នករស់នៅ​ខេត្តកំពង់ចាម ដែល​ទើប​ឡើង មក​យក​កូនប្រុស របស់គាត់ ទៅ​ព្យាបាល​ជំងឺ​ស​សៃ​ប្រសាទ​។​

​លោក ជា សុវណ្ណ បាន​បន្តថាៈ ក្រោយ​ទទួលបាន​ព័​តិ​មាន កម្លាំង​សមត្ថកិច្ច ក៏​ស្វែងរក​ជនដៃដល់ ហើយ​ក្រោយមក ក៏​ប្រទះឃើញ​ឈ្មោះ អ៊ា​ម សំណាង ស្លៀក​ក្រមា ឈរ​ក្រោម​ដើមឈើ មាន​ប្រឡាក់​ឈាម នៅ​ដៃ ។ ពេលនោះ សមត្ថកិច្ច ក៏​ចាប់ខ្លួន​មក​ភ្លាម និង​ប្រមូល​ព័​តិ​មាន​លំអិត នៅ​កន្លែងកើតហេតុ ទើប​ដឹងថា ជនដៃដល់ ជា​កូនបង្កើត​ជនរងគ្រោះ មាន​ជំងឺ​ស​សៃ​ប្រសាទ ប្រចាំកាយ ។​

​សមត្ថកិច្ច បានបញ្ជាក់​ថាៈ នៅ​ល្ងាច​ថ្ងៃកើតហេតុ ជន​គ្រោះ បានរៀបចំ​អីវ៉ាន់ ដើម្បី​នាំ​កូន​ទៅ​ស្រុកកំណើត​វិញ ហើយ​ពេលនោះ ជនដៃដល់ ដូចជា​ឡប់សតិ ដើរ​ស្រាត​ពេញ​ផ្ទះ ជាហេតុ​ធ្វើ​អោយគេ​គ្រប់គ្នា ខ្លាច​មិន​ហ៊ាន​នៅក្បែរ ។ ចំណែក​ម្ដាយ ចេះតែ​ចាប់​រាំង​កូន មិនអោយ​ចេញ​ក្រៅ ទាំង​ស្រាត​ននលគក ពេលនោះ ស្រាប់តែ​ជនដៃដល់ បាន​ទាត់​ម្ដាយបង្កើត ៣ ជើង ចំ​ដើមទ្រូង ដួលសន្លប់​ស្កូ​ក ។ បន្ទាប់មក ជនដៃដល់ បាន​យក​កូនកាំបិត ចុង​ស្រួច មក​អារ ក ម្ដាយ កាត់​ក្បាល​ផ្ដាច់​ពី ក ហើយក៏​រត់​ចេញពី​ភូមិ មកឈរ​លើ​ទួល​មួយ រហូតដល់​ប៉ូលិស តាមរក​ឃើញ ។​

​នៅក្នុង​សវនាការ ជនដៃដល់ បាន​សារភាព​ម្ដង​ខុស ម្ដង​ត្រូវ​ថាៈ ខ្លួន​មាន​ជំងឺ​ស​សៃ​ប្រសាទ យូរ​មកហើយ និង​បានទទួល​ការព្យាបាល ពី​មន្ទីរពេទ្យ​រុស្សី ហើយ​នៅ​ថ្ងៃកើតហេតុ​នោះ ខ្លួន​ឃើញ​ម្ដាយបង្កើត ដូចជា​ខ្មោច ហើយក៏​សម្លាប់​គាត់​ទៅ ។​

​មេធាវី​ការពារ​ផ្លូវច្បាប់ អោយ​ជនដៃដល់ ស្នើអោយ​តុលាការ ពិនិត្យ​លើ​ស្ថានភាព​ជំងឺផ្លូវចិត្ត របស់​ឃាតក បើ​មានការ​បញ្ជាក់ ពី​គ្រូពេទ្យ​ជំនាញ ច្បាស់លាស់ គប្បី​តុលាការ លើកលែង​ចោទ និង​ដោះលែង​ជនដៃដល់ អោយ​រួច​ពី​ការ​ឃុំឃាំង ។​

​លោក កុល កំពូល ប្រធាន​ក្រុមប្រឹក្សា​ជំនុំ​ជំ​រះ បានកំណត់​យក​ថ្ងៃទី​២ ខែមីនា ឆ្នាំ​២០២១ ខាងមុខនេះ ដើម្បី​ប្រកាស​សាលក្រម​រឿងក្ដី​នេះ​៕/V​

ទីតាំងផ្សាយពាណិជ្ជកម្ម

- Advertisment -

Most Popular