Home ព័ត៌មានសំខាន់ៗ អបអរសាទរ​!​ក្...

អបអរសាទរ​!​ក្រុង​មួយ​និង​ស្រុក​ចំនួន​ប្រាំ​នៃ​ខេត្តព្រៃវែង​ត្រូវ​បានប្រកាស​ទទួលស្គាល់​ថា​”​បញ្ឈប់​ការ​បន្ទោបង់​ពាសវាល​ពាសកាល​”

ដោយៈ​បញ្ញា​សាស្ត្រ​/​ភ្នំពេញៈអង្គការ​ភ្លែ​ន​អន្តរជាតិ​កម្ពុជា មន្ទីរ​អភិវឌ្ឍន៍ជនបទ​ខេត្តព្រៃវែង​និង​ដៃគូ​អភិវឌ្ឍន៍​បានប្រកាស​ទទួលស្គាល់ ក្រុង​មួយ និង​ស្រុក​ចំនួន​ប្រាំ​របស់​ខេត្តព្រៃវែង​ជា​ក្រុង​និង​ស្រុក​ដែល​សម្រេចបាន​ការបញ្ឈប់​ការ​បន្ទោបង់​ពាសវាល​ពាសកាល​(ODF)​។​​នេះ​បើ​យោងតាម​សេចក្តីប្រកាស​ព័ត៌មាន​របស់​អង្គការ​ភ្លែ​ន​អន្តរជាតិ​កម្ពុជា​នៅថ្ងៃនេះ​។

ក្រុង​មួយ​និង​ស្រុក​ចំនួន​ប្រាំ​នៃ​ខេត្តព្រៃវែង​ត្រូវ​បានប្រកាស​ទទួលស្គាល់​ថា​”​បញ្ឈប់​ការ​បន្ទោបង់​ពាសវាល​ពាសកាល​”(រូបថតអង្គការភ្លែនអន្តរជាតិ)

ប្រភព​ដដែល​បញ្ជាក់ថា ពិធី​ប្រកាស​ទទួលស្គាល់​នេះ​ប្រារព្ធ​ឡើង​នៅ​ថ្ងៃទី​១៧ ខែកុម្ភៈ​នេះ​នៅ​សាលប្រជុំ​សាលាខេត្ត​ព្រៃវែង​។​​ក្រុង​ដែល​ត្រូវបាន​ទទួលស្គាល់ថា​ជា​ក្រុង​បញ្ឈប់​ការ​បន្ទោបង់​ពាសវាល​ពាសកាល​គឺ​ក្រុង​ព្រៃវែង​។​ចំណែក​ស្រុក​ទាំង​ប្រាំ​មានដូចជា​ស្រុក​ស្វាយ​អ​ន្ទ​រ ស្រុក​កំចាយមារ ស្រុក​មេសាង ស្រុក​បាភ្នំ និង​ស្រុក​កំពង់ត្របែក​។​

​ប្រភព​ដដែល​បង្ហាញថា ក្រុង​ព្រៃវែង​មាន​ចំនួន​សរុប ៦.០៨៣ គ្រួសារ​និង​ផ្ទះ​ចំនួន ៥.២១៩ ហើយ​មាន​បង្គន់​សរុប​ចំនួន ៥.០៥៦ និង​មាន​បង្គន់​រួម​ចំនួន​១៦៣​។​នេះ​បាន​បង្ហាញថា​ទីក្រុង​ព្រៃវែង​គឺជា​ទីក្រុង​ដែល​បញ្ឈប់​ការ​បន្ទោបង់​ពាសវាល​ពាសកាល​១០០​ភាគរយ​។​

ក្រុង​មួយ​និង​ស្រុក​ចំនួន​ប្រាំ​នៃ​ខេត្តព្រៃវែង​ត្រូវ​បានប្រកាស​ទទួលស្គាល់​ថា​”​បញ្ឈប់​ការ​បន្ទោបង់​ពាសវាល​ពាសកាល​”(រូបថតអង្គការភ្លែនអន្តរជាតិ)
​សេចក្តីប្រកាស​ព័ត៌មាន​របស់​អង្គការ​នេះ​បាន​ស្រង់​ប្រសាសន៍​លោកស្រី គ្វី​ន​នេ​ត វ៉ង​នាយិកា​ប្រចាំ​ប្រទេស​នៃ​អង្គការ​ភ្លែ​ន​អន្តរជាតិ កម្ពុជា​មក​បញ្ជាក់ថា​”​ខេត្តព្រៃវែង​គឺជា​ខេត្ត​មួយ​ក្នុងចំណោម​ខេត្ត​គោលដៅ​ផ្សេងទៀត​ដែលមាន​ចក្ខុវិស័យ​ក្លាយជា​ខេត្ត​ដែល​បញ្ឈប់​បន្ទោបង់ ពាល​វាល​ពាសកាល (ODF) នៅ​ឆ្នាំ ២០២៣ ស្របតាម​ការប្តេជ្ញាចិត្ត​នៃ​ផែនការ​សកម្មភាព​ជាតិ​នៃ​ក្រសួង​អភិវឌ្ឍន៍ជនបទ ឆ្នាំ​២០១៩-២០២៣​។ កិច្ចខិតខំ​ប្រឹងប្រែង​ដ៏​អស្ចារ្យ​នេះ​ត្រូវបាន​ធ្វើឡើង​ពី​អ្នកពាក់ព័ន្ធ​ជាច្រើន រួមមាន​ម្ចាស់ជំនួយ ក្រសួង​អភិវឌ្ឍន៍ជនបទ មន្ទីរ​អភិវឌ្ឍន៍ជនបទ​ខេត្ត អង្គការក្រៅរដ្ឋាភិបាល និង​សហគមន៍​។ ដោយមាន​ការប្តេជ្ញាចិត្ត​ខ្ពស់ និង​ភាពជា​អ្នកដឹកនាំ និង​សកម្មភាព​យ៉ាងសកម្ម​របស់​អាជ្ញាធរ​ខេត្ត ក្រសួង​អភិវឌ្ឍន៍ជនបទ មន្ទីរ​អភិវឌ្ឍន៍ជនបទ​ខេត្ត ស្រុក និង​ឃុំ យើង​សង្កេតឃើញ​មាន​សមិទ្ធិផល​គួរឱ្យកត់សម្គាល់​ជាច្រើន​នៅក្នុង​ខេត្តព្រៃវែង​។ ប្រជាជន​១៩.២៥១ នាក់​បាន​ប្រើប្រាស់​បង្គន់​អនាម័យ ៥៨២​ភូមិ ៦៣​ឃុំ និង​៥​ស្រុក ក្នុងចំណោម ១៣​ស្រុក បានប្រកាស​ពី​ការបញ្ឈប់​ការ​បន្ទោបង់​ពាសវាល​ពាសកាល​”​។​

​ក្នុង​ឆ្នាំ​២០១១ រាជរដ្ឋាភិបាល​កម្ពុជា​តាមរយៈ​ក្រសួង​អភិវឌ្ឍន៍ជនបទ​បាន​ក្លាយជា​អ្នកទទួល​ជំនួយឥតសំណង​រយៈពេល​ប្រាំ​ឆ្នាំ ពី​មូលនិធិ​អនាម័យ​សកល (GSF) ក្នុង​គោលបំណង​បង្កើន​ការទទួលបាន​អនាម័យ​កាន់តែ​ប្រសើរឡើង​និង​លើកកម្ពស់​ការអនុវត្ត អនាម័យ​ត្រឹមត្រូវ​នៅតាម​ជនបទ​នៅ​កម្ពុជា​។ អង្គការ​ភ្លែ​ន​អន្តរជាតិ​កម្ពុជា​ត្រូវបាន​ជ្រើសរើស​ជា​ភ្នាក់ងារ​ប្រតិបត្តិ (EA)​សម្រាប់ កម្មវិធី​នេះ ហើយ​សកម្មភាព​នៃ​កម្មវិធី​ត្រូវបាន​អនុវត្ត​ដោយ​អង្គការ​ដៃគូ​អនុវត្ត​ក្នុងស្រុក និង​អន្តរជាតិ​និង​មន្ទីរ​អភិវឌ្ឍន៍ជនបទ​នានា របស់​រាជរដ្ឋាភិបាល​។​

ក្រុង​មួយ​និង​ស្រុក​ចំនួន​ប្រាំ​នៃ​ខេត្តព្រៃវែង​ត្រូវ​បានប្រកាស​ទទួលស្គាល់​ថា​”​បញ្ឈប់​ការ​បន្ទោបង់​ពាសវាល​ពាសកាល​”(រូបថតអង្គការភ្លែនអន្តរជាតិ)

​លោកស្រី គ្វី​ន​នេ​ត បាន​បន្តថា​បន្ទាប់ពី​ជិត ៩​ឆ្នាំ កម្មវិធី​លើកកម្ពស់​អនាម័យ​ជនបទ បានបញ្ចប់​នៅ​ថ្ងៃទី​៣១ ខែធ្នូ ឆ្នាំ​២០២០​។ សម្រាប់​អង្គការ​ភ្លែ​ន​អន្តរជាតិ​កម្ពុជា ទោះបីជា​កម្មវិធី​លើកកម្ពស់​អនាម័យ​ជនបទ បានបញ្ចប់​ក៏ដោយ​ក៏​យើង​នឹង​បន្ត​គាំទ្រ​ដល់ រដ្ឋាភិបាល​ដើម្បី​លើកកម្ពស់​បន្ថែមទៀត​នូវ​ស្ថានភាព​ទឹកស្អាត និង​អនាម័យ​ដល់​សហគមន៍​ជនបទ​នៅ​កម្ពុជា​។​

​លោកស្រី គ្វី​ន​នេ​ត បាន​បន្ថែមថា​”​សសរស្តម្ភ​មួយ​នៃ​យុទ្ធសាស្ត្រ​ប្រទេស ៥​ឆ្នាំ​ថ្មី​របស់​យើង​ដែល​នឹង​ចាប់ផ្តើម​នៅ ខែកក្កដា ឆ្នាំ​២០២១ គឺ​កម្មវិធី ”​ការចាប់ផ្តើម​ជាមួយ​សុខភាព​ល្អ​” ដែល​កម្មវិធី​នេះ​រួមបញ្ចូល​នៃ​កម្មវិធី​ទឹកស្អាត​និង​អនាម័យ កម្មវិធី​អាហារូបត្ថម្ភ និង​កម្មវិធី​គាំពារ​និង​អភិវឌ្ឍ​កុមារ​តូច​។​ជាមួយនឹង​ធនធាន​ដែល​យើង​មាន​យើង​នឹង​គាំទ្រ​ដល់​រដ្ឋាភិបាល​ដើម្បី​សម្រេច​នូវ​គោលដៅ​យុទ្ធសាស្ត្រ​របស់ខ្លួន​ក្នុងការ​ប្រើប្រាស់​ជា​សកល​នូវ​ទឹកស្អាត និង​អនាម័យ​នៅ​ឆ្នាំ​២០៣០”​។​

ក្រុង​មួយ​និង​ស្រុក​ចំនួន​ប្រាំ​នៃ​ខេត្តព្រៃវែង​ត្រូវ​បានប្រកាស​ទទួលស្គាល់​ថា​”​បញ្ឈប់​ការ​បន្ទោបង់​ពាសវាល​ពាសកាល​”(រូបថតអង្គការភ្លែនអន្តរជាតិ)

​គួររំលឹកថា​អង្គការ​ភ្លែ​ន​អន្តរជាតិ​កម្ពុជា គឺជា​អង្គការ​អភិវឌ្ឍន៍ និង​មនុស្សធម៌​មួយ​ដែល​លើកកម្ពស់​សិទ្ធិ​កុមារ និង​សមភាព​សម្រាប់​ក្មេងស្រី​។​សកម្មភាព​របស់​អង្គការ​គឺ​ខិតខំ​ដើម្បី ពិភពលោក​ដ៏​យុត្តិធម៌​មួយ ដោយ​ធ្វើការ​រួមគ្នា​ជាមួយ​កុមារ យុវជន អ្នកគាំទ្រ និង​ដៃគូ​របស់​យើង​។ ដោយមាន​បទពិសោធ​ជាង ៨០​ឆ្នាំ នៅ​ទូទាំង​ពិភពលោក កម្មវិធី​របស់​អង្គការ​ភ្លែ​ន​អន្តរជាតិ​មាន​គោលបំណង​គាំទ្រ​ក្មេងស្រី និង​ក្មេងប្រុស​ឱ្យ​រៀន ដឹកនាំ សម្រេចចិត្ត និង​លូតលាស់​។ អង្គការ​ភ្លែ​ន​អន្តរជាតិ​កម្ពុជា​បានចាប់ផ្តើម​ប្រតិបត្តិការ​នៅក្នុង​ប្រទេស​កម្ពុជា​ក្នុង​ឆ្នាំ ២០០២៕សរន

ក្រុង​មួយ​និង​ស្រុក​ចំនួន​ប្រាំ​នៃ​ខេត្តព្រៃវែង​ត្រូវ​បានប្រកាស​ទទួលស្គាល់​ថា​”​បញ្ឈប់​ការ​បន្ទោបង់​ពាសវាល​ពាសកាល​”(រូបថតអង្គការភ្លែនអន្តរជាតិ)

ទីតាំងផ្សាយពាណិជ្ជកម្ម

- Advertisment -

Most Popular