​អគ្គព្រះរាជអាជ្ញា សាលាឧទ្ធរណ៍​បាត់ដំបង ស្នើសុំ​សារព័ត៌មាន មុន​ចុះផ្សាយ​ពី​ប្តី ត្រូវ​គិតដល់​ភាគី​ប្រពន្ធ និង​កូន​ផង​

​ដោយៈ ភ្នំ​ខៀវ / បាត់ដំបងៈ អគ្គព្រះរាជអាជ្ញា អម​សាលាឧទ្ធរណ៍ បាត់ដំបង បាន​ស្នើសុំ​សារព័ត៌មាន មុន​ចុះផ្សាយ​អត្ថបទ​របស់ខ្លួន បាក់​ព័ន្ធ​នឹង​ប្ដី ត្រូវ​ចេះ​គិត និង​ថ្លឹងថ្លែង​ពី​ការប៉ះទង្គិច ដល់​ភាគី​ប្រពន្ធ និង​កូន​ផង ដើម្បី​ជៀសវាង​ការប៉ះពាល់ ខូចខាត កាន់តែ​ធ្ងន់ធ្ងរ​។ លោក នួន សាន អគ្គព្រះរាជអាជ្ញា អម​សាលាឧទ្ធរណ៍ បាត់ដំបង បាន​ស្នើសុំ​បែបនេះ នៅក្នុង​សិក្ខាសាលា អង្គភាព​អនុវត្ត​ច្បាប់ ស្តីពី​របប​សារព័ត៌មាន រវាង​អ្នកសារព័ត៌មាន និង​មន្ត្រី​ជាច្រើន​នាក់ នៅ​ថ្ងៃទី​១៧ ខែកុម្ភៈ ឆ្នាំ​២០២១ នេះ នៅ​ក្រុង​បាត់ដំបង​។

​អគ្គព្រះរាជអាជ្ញា អម​សាលាឧទ្ធរណ៍ បាត់ដំបង រូបនេះ បានលើកឡើង​ថាៈ អ្នកសារព័ត៌មាន គឺ​កញ្ចក់​ឆ្លុះបញ្ចាំង នាំសារ​ពី​ប្រជាពលរដ្ឋ ទៅកាន់​ថ្នាក់ដឹកនាំ និង​នាំសារ​ពី​ថ្នាក់ដឹកនាំ មក​ប្រាប់​ដល់​ប្រជាពលរដ្ឋ នៅឯ​មូលដ្ឋាន ដូចនេះ អ្នកសារព័ត៌មាន​ទាំងអស់ មាន​តួនាទី​សំខាន់ ដែល​គប្បី​ត្រូវមាន​ក្រមសីលធម៌ វិជ្ជាជីវៈ ត្រឹមត្រូវ ពិសេស​ត្រូវមាន​អង្គ​សំខាន់ ចំនួន ៣ គឺៈ សច្ចៈ​ភាព យុត្តិធម៌ និង​មិន​លំអៀង ។ ប្រសិនបើ​ធ្វើបាន​តាម​ចំណុច​ទាំង​៣​នេះ តួនាទី​អ្នកសារព័ត៌មាន នឹង​កាន់តែ​មានការ​គាំទ្រ​ច្រើន មិន​សាបសូន្យ មាន​កិត្តិយស ផ្តល់​ពី​សំណាក់​មហាជន គ្រប់​មជ្ឈដ្ឋាន​នានា​។​

​លោក​បាន​បញ្ជាក់ថាៈ ការធ្វើ​ព័ត៌មាន​ផ្សាយ មិនមែន​ធ្វើ​ឲ្យ​តែ​បាន​នោះទេ ពិសេស​យុគសម័យ​ទំនើប ឡាយ​អន​ឡាញ ត្រូវ​ចេះ​ថ្លឹងថ្លែង​ឲ្យ​ល្អិតល្អន់​ជាមុន និង​គិតពី​ឧ​ត្ត​ម​ប្រយោជន៍ ឬ​ការប៉ះពាល់ ខូចខាត និង​បាត់បង់ ដល់​កម្រិតណា លើ​សិទ្ធិ​បុគ្គល មុននឹង​ចុះផ្សាយ ទៅលើ​បុរស​ជា​ប្តី គួរ​គិតដល់​បន្ទុក​ភាគី របស់​ប្រពន្ធ និង​កូន​ផងដែរ​។​

​ចំណែក​ទីប្រឹក្សា​ក្រសួង​ព័ត៌មាន លោក សួស សុ​ភ័​ក្រ បានបង្ហាញ​ពី​ទស្សនៈ​ឲ្យ​ដឹងថាៈ អ្នកសារព័ត៌មាន ក៏​គួរ​យោគយល់​នូវ ការសុំ​ចិត្ត​របស់​អ្នកច្បាប់ ឬ​សមត្ថកិច្ច ចំពោះ​សំណុំរឿង ឬ​ករណី​ដែល​ក្រុម​ជំនាញ កំពុងបើក​ការស៊ើបអង្កេត ស្រាវជ្រាវ ដែល​ពេលខ្លះ ផ្នែក​ជំនាញ​មិនអាច​ផ្តល់​ការបំភ្លឺ ពិស្តារ​បាន ប៉ុន្តែ​អ្នកសារព័ត៌មាន ក៏​អាច​ផ្សាយបាន​ត្រឹម​ព័ត៌មាន ដែល​ខ្លួន​ប្រមូល និង​ទទួលបាន ក៏​ជាការ​ប្រសើរ ជៀសវាង​មានការ​ភ្ញាក់ផ្អើល សុះសាយ​ជា​សាធារណៈ ប៉ះពាល់ ឬ​នាំ​ដល់​ការមិន​សម្រេច នូវ​ភាពជោគជ័យ ដល់​ការអនុវត្ត​ច្បាប់ តាម​នីតិវិធី​៕​.mara

ទីតាំងផ្សាយពាណិជ្ជកម្ម

- Advertisment -

Most Popular