ដោយៈ គ្រញូង / បាត់ដំបងៈ នគរបាលការិយាល័យ ប្រឆាំងគ្រឿងញៀនខេត្ត កាលពីព្រឹកថ្ងៃទី១៨ ខែកុម្ភៈ ឆ្នាំ២០២១ បានបញ្ជូនមុខសញ្ញាជួញដូរគ្រឿងញៀន បួននាក់ ទៅតុលាការ ក្រោយពេលនគរបាលស្រុកសង្កែ សហការជាមួយកម្លាំងប៉ុស្តិ៍នគរបាល រដ្ឋបាលអន្លង់វិល ចាប់ខ្លួនបាន កាលពីល្ងាច ថ្ងៃទី ១៦ ខែកុម្ភៈ នៅចំណុចក្រុមទី៥ ភូមិស្ពង់ ឃុំអន្លង់វិល ស្រុកសង្កែ ខេត្តបាត់ដំបង។
លោកវរសេនីយ៍ឯក ស៊ុន សុវណ្ណ អធិការនគរបាល ស្រុកសង្កែ បានឲ្យដឹងថាៈ ជនសង្ស័យទាំង ៤ នាក់គឺៈ ១-ឈ្មោះ វ៉ាង វណ្ណា អាយុ ៣៤ ឆ្នាំ, ២-ឈ្មោះ ខែត្រ ផល្លា ហៅ ជា អាយុ ២៧ ឆ្នាំ, ៣-ឈ្មោះ វ៉ុន តុលតុលា ហៅ ខ្វាវ អាយុ ២១ ឆ្នាំ និង៤-ឈ្មោះ សុវណ្ណ រតនា ហៅ ខ្មៅ អាយុ ២៥ ឆ្នាំ។ បុរសទាំង៤នាក់នេះ រស់នៅភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ជាមួយគ្នា។ ចំណែកវត្ថុតាង ដែលចាប់យកបាន រួមមានៈ គ្រឿងញៀន ប្រភេទមេតំហ្វេតាមីន (ម៉ាទឹកកក ICE) ចំនួន ២ ថង់ ទម្ងន់ ០,៥១ ក្រាម, គ្រឿងញៀនប្រភេទមេតំហ្វេតាមីន (យ៉ាម៉ា WY) ចំនួន ១ថង់ ទម្ងន់ ០,៣២ ក្រាម, ទូរស័ព្ទដៃ១គ្រឿង, កាបូបដាក់ប្រាក់, កាំបិត និងសម្ភារៈសម្រាប់ប្រើប្រាស់ គ្រឿងញៀនមួយចំនួន។
បន្ទាប់ពីបានធ្វើការសាកសួររួចមក សមត្ថកិច្ចជំនាញ បានកសាងសំណុំរឿង បញ្ជូនជនសង្ស័យ និងវត្ថុតាង ទៅកាន់តុលាការខេត្ត ដើម្បីចាត់ការ តាមផ្លូវច្បាប់៕/V
