Home ព័ត៌មានសំខាន់ៗ ឃាត់ខ្លួន​មន្...

ឃាត់ខ្លួន​មន្ត្រីនគរបាល​ម្នាក់​ដែល​ប៉ុនប៉ង​បាញ់សម្លាប់​ប្រជា​ការពារ​ភូមិ​

​ដោយ​:​ស​រិ​ទ្ធ​/​កំពង់ស្ពឺ​: មន្ត្រីនគរបាល​ម្នាក់​ត្រូវបាន​ឃាត់ខ្លួន បន្ទាប់ពី​ស្ពាយ​កាំភ្លើង AK ន​ប៉ុនប៉ង​បាញ់សម្លាប់​ប្រជា​ការពារ​ភូមិ កាលពី​យប់​ថ្ងៃទី​១៦ ខែកុម្ភៈ ឆ្នាំ​២០២១ នៅ​ចំណុច​ភូមិ​ពោធិ៍​កោង ឃុំ​ព្រះ​ស្រែ ស្រុក​ឧដុង្គ ខេត្តកំពង់ស្ពឺ ។​

​សមត្ថកិច្ច​បញ្ជាក់ថា ជនសង្ស័យ​ឈ្មោះ ឱម ពេជ្រ​ពិដោ មាន​ឋានន្តរស័ក្តិ អនុសេនីយ៍ឯក ជា​មន្ត្រីនគរបាល​រដ្ឋ​បាល​ឃុំ​ព្រះ​ស្រែ ស្រុក​ឧដុង្គ ខេត្តកំពង់ស្ពឺ​។ ចំណែក​ជនរងគ្រោះ ឈ្មោះ អ៊ី សុផល ភេទ​ប្រុស មុខរបរ​ប្រជា​ការពារ​ភូមិ​។ ជនសង្ស័យ និង​ជនរងគ្រោះ រស់នៅ​ភូមិ​ពោធិ៍​កោង ឃុំ​ព្រះ​ស្រែ ស្រុក​ឧដុង្គ ខេត្តកំពង់ស្ពឺ​ជាមួយគ្នា​។​

​នៅ​មុនពេល​កើតហេតុ ជនសង្ស័យ និង​ជនរងគ្រោះ ព្រមទាំង​កម្លាំង​ប្រជា​ការពារ​ដទៃទៀត បាន​ផឹកស៊ី​ជាមួយគ្នា​។ លុះដល់​ម៉ោង​ប្រហែល​៨​យប់ ថ្ងៃទី​១៦ ខែកុម្ភៈ ឆ្នាំ​២០២១ ជនសង្ស័យ បាន​និយាយ​ទៅកាន់​ជនរងគ្រោះ និង​កម្លាំង​ប្រជា​ការពារ​ដទៃទៀត​ថា «​ពួក​ប្រជា​ការពារ ម៉េច​មិន​ដើរល្បាត​ជាមួយ​អញ​? មិច​ទៅ​ដើរ​ជាមួយ​ប៉ូលិស​ផ្សេង​?»​។ ពេលនោះ ជនរងគ្រោះ អ៊ី សុផល បាន​តប​វិញ​ថា​៖ «​ពួក​ខ្ញុំ​ដើរ​តាម​បទបញ្ជា​របស់​មេ​ប៉ុស្តិ៍ បើ​មេ​ប៉ុស្តិ៍​ឲ្យ​ទៅជា​មួយ​អ្នកណា ខ្ញុំ​ទៅជា​មួយ​អ្នកនោះ​»​។ ស្រាប់តែ​ជនសង្ស័យ​ខឹងសម្បា​យ៉ាងខ្លាំង និង​ស្រែកថា​៖ «​អញ​ទៅយក​កាំភ្លើង​បាញ់​ឯង (​ជនរងគ្រោះ​) ចោល​មួយ​មើល​»​។​

​និយាយ​រួច​ជនសង្ស័យ​ក៏​ជិះ​ម៉ូតូ​ចេញ​ទៅមួយ​ភ្លែត ស្រាប់តែ​ស្ពាយ​កាំភ្លើង AK (​បើក​សោរ និង​អា​ម៉េ​បញ្ចូល​គ្រាប់​ហើយ​ស្រេច​) ទៅ​ភ្ជង់ បម្រុង​បាញ់សម្លាប់​ជនរងគ្រោះ​មែន ប៉ុន្តែ​ដោយមាន​កម្លាំង​ប្រជា​ការពារ​នៅ​កន្លែងកើតហេតុ ជួយ​ជ្រោងកាំភ្លើង​ឡើងលើ​ទាន់ ទើប​បាញ់​ខុស​ជនរងគ្រោះ ចំនួន​១​គ្រាប់ និង​ត្រូវ​ប្រជា​ការពារ​ម្នាក់ កាច់​យក​បង់​កាំភ្លើង​ចេញ និង​ដណ្ដើម​កាំភ្លើង​បាន ទើប​មិន​បណ្ដាល​ឲ្យ​មាន​អ្នកណា​រងរបួស ឬ​ស្លាប់ នៅក្នុងពេល​កើតហេតុ​។​

​ក្រោយ​កើតហេតុ ជនសង្ស័យ​ត្រូវបាន​ឃាត់ខ្លួន​បញ្ជូនទៅ​ស្នងការដ្ឋាន​នគរបាល​ខេត្តកំពង់ស្ពឺ ដើម្បី​សាកសួរ និង​ចាត់ការ​តាមផ្លូវ​ច្បាប់​។​

​ជុំវិញ​ករណី​មន្ត្រីនគរបាល​ផឹក​ស្រវឹង និង​យក​កាំភ្លើង AK ប៉ុនប៉ង​បាញ់សម្លាប់​នេះ លោក ឧ​ត្ត​ម​សេនីយ៍​ទោ សម សាមួន ស្នង​នគរបាល​ខេត្តកំពង់ស្ពឺ បានបញ្ជាក់​ប្រាប់​អ្នកសារព័ត៌មាន​ក្នុងស្រុក​យ៉ាងខ្លី​ថា​៖ «​កំពុង​ចាត់ការ​»៕​

ទីតាំងផ្សាយពាណិជ្ជកម្ម

- Advertisment -

Most Popular