Home ព័ត៌មានសំខាន់ៗ ទេសរដ្ឋមន្ត្រ...

ទេសរដ្ឋមន្ត្រី ស៊ុន ចាន់ថុល គូសបញ្ជាក់​ពី​សមិទ្ធផល​សំខាន់ៗ របស់​ក្រសួង​សាធារណការ និង​ដឹកជញ្ជូន ក្នុង​ឆ្នាំ​២០២០ និង​ទិសដៅ ២០២១

​ដោយៈ សុផល / ភ្នំពេញៈ សន្និបាត​បូកសរុប​លទ្ធផល​ការងារ ប្រចាំឆ្នាំ​២០២០ និង​លើក​ទិសដៅ​ការងារ ឆ្នាំ​២០២១ របស់​ក្រសួង​សាធារណការ និង​ដឹកជញ្ជូន បាន​ត្រូវ​បិទ​បញ្ចប់ នា​រសៀល​ថ្ងៃទី​១៧ ខែកុម្ភៈ ឆ្នាំ​២០២១ ក្រោម​អធិបតីភាព អគ្គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច
​និង​ហិរញ្ញវត្ថុ តំណាង​ដ៏​ខ្ពង់ខ្ពស់ សម្តេច​អគ្គមហាសេនាបតី តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា​។​

​ថ្លែង​ទៅកាន់​ពិធី​បិទ​សន្និបាត នាឱកាស​នោះ លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន បាន​គូសបញ្ជាក់​ពី សមិទ្ធផល សំខាន់ៗ របស់​ក្រសួង​សាធារណការ និង​ដឹកជញ្ជូន សម្រេចបាន ក្នុង​ឆ្នាំ​២០២០ និង​ទិសដៅ​បន្ត​នៅ​២០២១​។ លទ្ធផល​សម្រេចបាន​ទាំងនោះ មាន​គម្រោង​បើក ការដ្ឋាន​សាង​សង់ ផ្លូវជាតិ​លេខ​២ និង​លេខ​២២ ពី​ភ្នំពេញ ទៅ​តាកែវ និង​ផ្លូវជាតិ​លេខ​១០ ពី​សំឡូត ទៅ ខេត្តកោះកុង​, ការបើក​​ឱ្យប្រើ​ប្រាស់ ជា​ផ្លូវការ ផ្លូវជាតិ​លេខ​៥៥ និង​៥៨ , ការបើក​ការដ្ឋាន​សាងសង់ ផ្លូវជាតិ​ចំនួន​១១​ខ្សែ និង​ផ្លូវជាតិ​លេខ​១៤៦​បេ ក្នុង​ខេត្ត​ព្រះសីហនុ ដោយ​ប្រើប្រាស់ កញ្ចប់​ថវិកា សន្សំ​របស់​ជាតិ​, បានរៀបចំ​ផែនការមេ សម្រាប់​អភិវឌ្ឍន៍​ហេដ្ឋារចនាសម្ព័ន្ធ ក្រុង​សៀមរាប និង​បាន​បើក​ការដ្ឋាន​សាងសង់ ផ្លូវ​៣៨​ខ្សែ និង​កែលម្អ​ដងស្ទឹង សៀមរាប ក្នុង​សៀមរាប ដោយ​ប្រើ​កញ្ចប់​ថវិកា សន្សំ​របស់​ជាតិ និង​បានបញ្ចប់​ការសិក្សា​ផ្លូវជាតិ​លេខ​៤៨ និង​លេខ​៧ (​ស្គន់​-​កំពង់ចាម និង​កំពង់ចាម​-​ត្រពាំង​ផ្លុ​ង​) និង​ការដាក់ ចេញ នូវ​ផែនការ​សកម្មភាព ចំនួន ៨២៩ ចំណុច ដើម្បី​អភិវឌ្ឍន៍ វិស័យ​សាធារណការ និង​ដឹកជញ្ជូន របស់ ព្រះរាជាណាចក្រ​កម្ពុជា ឱ្យ​កាន់​តែមាន ការរីកចម្រើន ឡើង​ថែមទៀត​។​

​លោក​ទេសរដ្ឋមន្ត្រី បាន​ជម្រាបជូន​ផងដែរ​ថាៈ ក្រសួង​បាន​ទិញ​គ្រឿងចក្រ ចំនួន ២២២ គ្រឿង សម្រាប់​ផ្តល់​ជូន​មន្ទីរ​សាធារណការ និង​ដឹកជញ្ជូន ២៥ រាជធានី​-​ខេត្ត និង​អគ្គនាយកដ្ឋាន ប្រព័ន្ធ​ចម្រោះ​ទឹក​កខ្វក់ និង​បាន​ទទួល​ជំនួយឥតសំណង ជា​គ្រឿងចក្រ សម្រាប់​កែច្នៃ​គ្រឹះ​ផ្លូវ​ឡើងវិញ (Stabilizer) ចំនួន ១៥ ​គ្រឿង ពី​រដ្ឋាភិ​បាល​ជប៉ុន តាមរយៈ​កម្មវិធី​អភិវឌ្ឍន៍​សេដ្ឋកិច្ច និង​សង្គម​របស់​JICA និង​បានទទួល​គ្រឿង ចក្រ​សម្រាប់​ផលិត​បេតុង​កៅស៊ូ និង​ការងារ​អ៊ុត​កៅស៊ូ ចំនួន​២ ឈុត (​ចំនួន​១៨​គ្រឿង​)​ពី​ក្រុមហ៊ុន​សំណង់ សៀង​ហៃ (SCG) សម្រាប់​ឆ្នាំ​២០២០ និង​២០២១ ដែល​ក្នុងនោះ រួមមានៈ គ្រឿងចក្រ​ផលិត​បេតុង​កៅស៊ូ ​ដែលមាន​​សមត្ថភាព អាច​ផលិត​បេតុង ក្នុង​បរិមាណ ១២០ តោន​/​ម៉ោង ចំនួន ២ គ្រឿង និង​គ្រឿងចក្រ សម្រាប់​ការងារ​អ៊ុត​កៅស៊ូ ចំនួន ១៦ គ្រឿង​ផងដែរ​។​

​បន្ថែម​ពីលើ​នេះ លោក​ទេសរដ្ឋមន្ត្រី បានលើកឡើង នូវ​ទិសដៅ​ការងារ​បន្ត ដើម្បី​ពិនិត្យ និង​តាមដាន ការដ្ឋាន​សាងសង់ ឱ្យស្រប​តាម​បទដ្ឋាន​បច្ចេកទេស ជាប់​ជាប្រចាំ ឆ្មក់​ត្រួតពិនិត្យ​លក្ខណៈ​បច្ចេកទេស នៃ​ការសាងសង់​ផ្លូវ ដោយ​ក្រុម​ត្រួតពិនិត្យ​ឯករាជ្យ បង្កើត​ទីតាំង​ផលិត​បេតុង​កៅស៊ូ AC ដើម្បី​ផ្គត់ផ្គង់ ការសាងសង់ ហេដ្ឋារចនា​សម្ព័ន្ធ​ផ្លូវថ្នល់ បង្កើត​ទីតាំង​កិន​ថ្ម ដើម្បី​ផ្គត់ផ្គង់​សម្ភារ បម្រើឱ្យ​ការសាងសង់​ផ្លូវថ្នល់ ពិនិត្យ​នីតិវិធី នៃ​ការស្នើសុំ​ថែទាំ​ផ្លូវ ដោយ​ធ្វើការ​អភិវឌ្ឍ ប្រព័ន្ធ​បច្ចេកវិទ្យា (Blockchain)​។​

​អគ្គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រី បាន​វាយតម្លៃ​ខ្ពស់ ចំពោះ​ការរៀបចំ​សន្និបាត​ឆ្នាំនេះ និង​បាន​គូសបញ្ជាក់ថាៈ ព្រឹត្តិការណ៍​នេះ មិន​ត្រឹមតែ​សម្រាប់​បូកសរុប​លទ្ធផល​ការងារ របស់​ក្រសួង​សាធារណ​ការ និង​ដឹកជញ្ជូន ដែល​សម្រេចបាន ក្នុង​ឆ្នាំ​កន្លងទៅ ក៏ដូចជា ឆ្នាំ​២០២០ ប៉ុណ្ណោះ​ទេ ប៉ុន្តែ​ថែមទាំង ជា​វេទិកា​មួយ សម្រាប់​កំណត់​ទិសដៅ និង​ផែនការ​សកម្មភាព​ការងារ សម្រាប់​ឆ្នាំ​២០២១ និង​ឆ្នាំ​បន្តបន្ទាប់ ដើម្បី​អនុវត្ត​គោលនយោបាយ ​និង​ទិសដៅ ជា​យុទ្ធសាស្ត្រ​របស់ រាជរដ្ឋាភិបាល សម្រាប់​នីតិកាល​ទី ៦​នេះ​។​

​ទន្ទឹមនឹងនេះ លោក​អគ្គបណ្ឌិត​សភាចា​រ្យ បានលើកឡើង អំពី​កិច្ចខិតខំ​ប្រឹងប្រែង​រប​ស់ រាជរដ្ឋាភិបាល ក្នុង​ការកសាង ហេដ្ឋារចនាសម្ព័ន្ធ រូបវន្ត​សំខាន់ៗ មានដូចជា គម្រោង​ផ្លូវ​៣៤​ខ្សែ ក្នុង​ក្រុងព្រះសីហនុ ខេត្ត​ព្រះសីហនុ និង​គម្រោង​ផ្លូវ​៣៨ ខ្សែ​ក្នុង​ក្រុង​សៀមរាប ខេត្តសៀមរាប និង​គម្រោង​សាងសង់ ហេដ្ឋារចនាសម្ព័ន្ធ រូបវន្ត​ជាច្រើន​ទៀត ទោះបីជា​កម្ពុជា ស្ថិតក្នុង​បរិបទ នៃ​សម័យ​កូ​វីដ​-១៩ ក៏ដោយ​។​

​អគ្គបណ្ឌិត​សភាចា​រ្យ បានកត់សម្គាល់​ផងដែរ​ថាៈ ក្នុង​រយៈពេល ៥ ឆ្នាំ​ចុង​ក្រោយនេះ ក្រសួង​សាធារណការ និង​ដឹកជញ្ជូន បាន​ខិតខំ​ប្រឹងប្រែង បំពេញការងារ ស្របតាម​ទិសដៅ គោលនយោបាយ របស់​រាជរដ្ឋាភិបាល និង​សម្រេចបាន នូវ​សមិទ្ធផល គួរ​ជាទី​មោទនៈ ដែល​ក្នុងនោះ​រួមមាន ការសាងសង់ និង​ស្ដារឡើងវិញ នូវ​ហេដ្ឋា​​រចនាសម្ព័ន្ធ ផ្លូវជាតិ ផ្លូវ​ខេត្ត ផ្លូវដែក ផ្លូវ​ល្បឿន​លឿន និង​ការស្ថាបនា​ផ្លូវ​ថ្មីៗ ព្រមទាំង​គម្រោង​សាងសង់​ស្ពាន​ធំៗ ការរៀបចំ​កិច្ចព្រមព្រៀង ក្របខណ្ឌ​សម្រាប់​គម្រោង មជ្ឈមណ្ឌល​ភស្តុភា​រកម្ម​ភ្នំពេញ ការងារ​ផ្ដល់​សេវាសាធារណៈ តាមរយៈ​ការបង្កើត​មណ្ឌល ផ្ដល់​សេវាសាធារណៈ តាម​ទីតាំង​ផ្សារ​ទំនើប​ធំៗ ប្រព័ន្ធ​ស្វ័យ​ប្រវត្តិកម្ម​សម្រាប់​ការផ្ដល់សេវា​សាធារណៈ​តាម​ប្រព័ន្ធ​ព័ត៌មានវិទ្យា (​អន​ឡាញ​) និង​ការដាក់ឱ្យ​ដំណើរការ ការលក់​លេខ​ពិសេស និង​លេខ​ចុះបញ្ជី​ពិសេស​ផ្ទាល់ ខ្លួន​ផងដែរ​។​

​អគ្គបណ្ឌិត​សភាចា​រ្យ បាន​សម្តែង​នូវ​ការកោតសរសើរ និង​វាយតម្លៃ​ខ្ពស់ ចំពោះ​កិច្ចខិតខំ​ប្រឹង ប្រែង​របស់​ថ្នាក់ដឹកនាំ និង​បុគ្គលិក​មន្ត្រីរាជការ របស់​ក្រសួង​សាធារណការ និង​ដឹកជញ្ជូន​ទាំងអស់ ដែល​បាន​អនុវត្ត ដោយ​ជោគជ័យ នូវ​ផែនការ​សកម្មភាព​ការងារ ដែល​បាន​ដាក់ចេញ និង​បាន​គាំទ្រ ចំពោះ​ទិសដៅ​ការងារ​សម្រាប់​ឆ្នាំ​២០២១ ដែល​ផ្ដោតលើ​ប្រធានបទ​៖ “​លើកកម្ពស់​ការអភិវឌ្ឍ​ធនធានមនុស្ស វិទ្យាសាស្ត្រ បច្ចេកវិទ្យា ដើម្បី​ពង្រឹងគុណភាព ប្រសិទ្ធភាព ក្នុង​វិស័យ​សាធារណការ និង​ដឹកជញ្ជូន និង ភស្តុភា​រកម្ម​”​។​

​ជាមួយគ្នានេះ លោក​អគ្គបណ្ឌិត​សភាចា​រ្យ បាន​ជំរុញ​ឱ្យ​ក្រសួង​សាធារណការ និង​ដឹកជញ្ជូន ខិតខំ​ប្រឹងប្រែង បន្ត​យកចិត្តទុកដាក់ កសាង​ហេដ្ឋារចនាសម្ព័ន្ធ បន្ថែមទៀត តាមដាន ត្រួតពិនិត្យ​គុណភាព នៃ​ការសាងសង់​ហេដ្ឋារចនាសម្ព័ន្ធ​ផ្លូវ ស្ពាន ជាពិសេស គម្រោង​សាងសង់ ហេដ្ឋារចនាសម្ព័ន្ធ ផ្លូវ​៣៨​ខ្សែ ក្នុង​ក្រុង សៀមរាប ខេត្តសៀមរាប គម្រោង​សាងសង់ ហេដ្ឋារចនាសម្ព័ន្ធ​ផ្លូវ ១១ ខ្សែ ក្នុង​ខេត្ត​ព្រះសីហនុ ផ្លូវ​ក្រវាត់ ក្រុង​ទី​៣ និង​បណ្ដា​ផ្លូវជាតិ​សំខាន់ៗ ដែល​បាននិងកំពុង ដំណើរការ សាងសង់​ផងដែរ ជាពិសេស ត្រូវ​ជំរុញ​ការរៀបចំ បញ្ចប់​ផែនការមេ ត​ភ្ជាប់​ប្រព័ន្ធ​ដឹកជញ្ជូន ពហុ​មធ្យោបាយ និង ភស្តុភា​រកម្ម ឱ្យបាន​ចប់សព្វគ្រប់ ​ត្រូវខិតខំ​បន្ត​​យកចិត្ត​ទុកដាក់ កសាង​ហេដ្ឋារចនាសម្ព័ន្ធ បន្ថែមទៀត និង​តាមដាន ត្រួតពិនិត្យ​គុណភាព​សំណង់ បន្ត​កិច្ចសហការ​ជាមួយ ក្រសួង​-​ស្ថាប័ន​ពាក់ព័ន្ធ សំដៅ​ជំរុញ​ការកសាង និង​អភិវឌ្ឍន៍​ហេដ្ឋារចនាសម្ព័ន្ធ​ប្រព័ន្ធ​លូ នៅតាម​បណ្ដា​​ផ្លូវជាតិ​សំខាន់ៗ និង​ផ្លូវ​ក្នុង​ទីប្រជុំជន បន្ត​ជំរុញ​ការអនុវត្ត​ការងារ​ដឹកជញ្ជូន ឆ្លងកាត់​ព្រំដែន សំដៅ​សម្រួល​ពាណិជ្ជកម្ម ទេសចរណ៍​ឆ្លងកាត់​ជា​អន្តរជាតិ លើកកម្ពស់​កិច្ចសហការ ឲ្យ​បាន​ជិតស្និទ្ធ​ជាមួយ ក្រសួង​-​ស្ថាប័ន​ពាក់ព័ន្ធ និង​ដៃគូ​អភិវឌ្ឍន៍​នានា ក្នុងការ​អភិវឌ្ឍ​ប្រព័ន្ធ​ដឹកជញ្ជូន របស់​កម្ពុជា បន្ត​យកចិត្តទុកដាក់ លើ​ការតភ្ជាប់​ផ្លូវដែក និង​ការដឹកជញ្ជូន តាមផ្លូវ​ដែក រៀបចំ​និយាម​ការ បច្ចេកទេស សម្រាប់​គ្រប់គ្រង ប្រភេទ​ផ្លូវថ្នល់ និង​ផ្លូវដែក​ឲ្យ​បានច្បាស់លាស់ បន្ត​យកចិត្តទុកដាក់ និង​ជំរុញ​ការកសាង ប្រព័ន្ធ​ដឹកជញ្ជូន​សាធារណៈ ក្នុង​ទីក្រុង និង​នៅតាម​រាជធានី​-​ខេត្ត ក្រុង ស្រុក និង​ទីប្រជុំជន​ធំៗ ដើម្បី​កាត់បន្ថយ ការកកស្ទះ​ចរាចរណ៍​។​

​បន្ថែម​ពីលើ​នេះ ត្រូវ​បន្ត​យកចិត្តទុកដាក់​ខ្ពស់ លើ​ការផ្ដល់​សេវាសាធារណៈ ឲ្យ​បានល្អ​ប្រសើរ ជូន​បងប្អូន ប្រជាពលរដ្ឋ បន្ត​គាំទ្រ និង​ជំរុញ​ការកែទម្រង់ រចនាសម្ព័ន្ធ​របស់ គណៈកម្មាធិការ​ដឹកនាំ ការត្រួតពិនិត្យ យានយន្ត​ដឹកជញ្ជូន​លើស ទម្ងន់​កម្រិត​កំណត់ បន្ត​យកចិត្តទុកដាក់​ពិនិត្យ លទ្ធភាព​សម្រាប់​រៀបចំ និង អភិវឌ្ឍន៍​ហេដ្ឋារចនាសម្ព័ន្ធ ផ្លូវទឹក និង​កំពង់ផែ បន្ថែមទៀត បន្ត​ចូលរួម​អនុវត្ត យ៉ាងសកម្ម​នូវ​ការងារ ក្រោម​សមត្ថកិច្ច​របស់​ក្រសួង បន្ត​យកចិត្តទុកដាក់​ខ្ពស់ និង​អនុវត្ត​ឲ្យ​បាន​ជោគជ័យ នូវ​ផែនការ​យុទ្ធសាស្ត្រ និង គោលនយោបាយ​ជាតិ សុវត្ថិភាព​ចរាចរណ៍​ផ្លូវគោក បន្ត​ជំរុញ​ការបណ្ដុះបណ្ដាល និង​អភិវឌ្ឍ​ធនធាន មនុស្ស​រយៈ​ពេល​ខ្លី មធ្យម និង​វែង និង​បន្ត​កិច្ចសហប្រតិបត្តិការ ជាមួយ​ដៃគូ​អភិវឌ្ឍន៍ និង​សហគមន៍​អ្នកផ្ដល់ជំនួយ និង​ក្រសួង​ស្ថាប័ន ពាក់ព័ន្ធ​នានា​៕

​អគ្គបណ្ឌិត​សភាចា​រ្យ ឧបនាយករដ្ឋមន្ត្រី បាន​អញ្ជើញ​បំពាក់​គ្រឿង ឥស្សរិយយស ជូន​មន្ត្រីរាជការ ដែលមាន​ស្នាដៃ​ល្អ ក្នុង​ការងារ អញ្ជើញ​ពិនិត្យ​មណ្ឌល ផ្តល់​សេវាសាធារណៈ និង​ទស្សនា​វិទ្យាស្ថាន​តេ​ជោ សែន សាធារណការ និង​ដឹកជញ្ជូន របស់​ក្រសួង​សាធារណការ និង​ដឹកជញ្ជូន ផងដែរ​៕/V​

ទីតាំងផ្សាយពាណិជ្ជកម្ម

- Advertisment -

Most Popular