Home ព័ត៌មានជាតិ សន្តិសុខ ​រថយន្ត​មួយគ្...

​រថយន្ត​មួយគ្រឿង បើក​បុក​បង្គោលរបង​ស្ថានទូត​បារាំង បាក់​អស់​ជាច្រើន​ដើម​

ដោយៈ អង្គា​រ៍​ហេង / ភ្នំពេញៈ បុរស​ម្នាក់ បាន​បើករថយន្ត​មួយគ្រឿង ម៉ាក​អូ​ឌី ពណ៌​ស បើកបរ ក្នុងស្ថាន​ភាព​ល្បឿន​លឿន ដូច​ហោះ ខណៈពេល​បើកបរ មិនបាន​ប្រុងប្រយ័ត្ន​នោះ បាន រេ​ចង្កូត​ជ្រុល​ទៅបុក​បង្គោល របង​ស្ថានទូត​បារាំង បណ្តាលអោយ​រង​ការខូចខាត រថយន្ត​ស្ទើរ​ទាំងស្រុង ក៏ប៉ុន្តែ​អ្នកបើកបរ រងរបួស​ស្រាល​។​

​ហេតុការណ៍​នេះ បានកើត​ឡើង កាលពី​វេលា​ម៉ោង ៣ ទៀបភ្លឺ ឈានចូល​ថ្ងៃទី​១៨ ខែកុម្ភៈ ឆ្នាំ​២០២១ តាម​បណ្តោយ​មហាវិថី ព្រះមុនីវង្ស នៅ​ចំណុច​ស្ថានទូត​បារាំង ស្ថិតនៅក្នុង​សង្កាត់​ស្រះចក ខណ្ឌដូនពេញ រាជ​ធានី​ភ្នំពេញ​។​

​តាម​ប្រភពព័ត៌មាន​ពី​សមត្ថកិច្ច ដែល​យាម​នៅ​គោលដៅ​នេះ បានអោយដឹងថាៈ មុនពេល​កើតហេតុ គឺ​រថយន្ត​បង្ក​មួយគ្រឿង ម៉ាក​អូ​ឌី A7 ពណ៌​ស ពាក់​​ស្លាក​លេខ នគរបាល 2-2764 បើកបរ​ដោយ​បុរស​ម្នាក់ តាម​បណ្តោយ​​មហាវិថី ព្រះមុនីវង្ស ក្នុងទិសដៅ​ពី​ខាងត្បូង ទៅខាង​ជើង ខណៈពេល​បើក​មកដល់ ចំណុច​កើត​ហេតុ ដោយសារតែ​រថយន្ត​បង្ក បើក​ក្នុងស្ថានភាព យ៉ាង​លឿន​ដូច​ហោះ មិនបាន​ប្រយ័ត្ន​នោះ ហើយ​ទំនងជា​ម្ចាស់​រថយន្ត ងងុយដេក​ផង ងោក​មួយភាំង ទើប​រេ​ចង្កូត​មក​ឆ្វេង​ដៃ មក​បុក​រះ​បង្គោល របង​ស្ថានទូត​បារាំង បណ្តាលអោយ​បាក់​រាយប៉ាយ ពេញ​ផ្លូវ ហើយ​រថយន្ត​បង្ក ខ្ទាត​ជាង ២០០ ម៉ែត្រ រង​ការខូចខាត​ខ្ទេច​អស់ មួយ​កំណាត់​ខាងមុខ ចំហៀង​ខាងឆ្វេង ថែមទាំង​ដាច់​កាឡេ​កង់ និង​ដាច់​បូម ខ្ទាត​ពេញ​ផ្លូវ ហើយ​ផ្ទុះ​ពោង​ទាំងសងខាង​។ ចំណែក​អ្នកបើកបរ រងរបួស​ស្រាល​។ ភ្លាមៗ​នោះ អ្នកបើកបរ បាន​ចេញមក​ដោះ​ស្លាក​លេខ ដើម្បី​យកទៅ​ទុក រួច​គេច​ចេញពី​កន្លែងកើតហេតុ​បាត់ ដោយ​បន្សល់ទុក​នៅតែ​រថយន្ត​បង្ក នៅ​កន្លែងកើត​ហេតុ ហើយ​ក្រោយមក តំណាង​ម្ចាស់​រថយន្ត បាន​មកជួយ​ដោះស្រាយ ហើយ​គ្រោះថ្នាក់​នេះ គឺ​ខូចខាត​បង្គោលរបង​អស់ ចំនួន ១៤ បង្គោល មាន​បាក់​ខ្លះ និង​ខូចខាត​តិចតួច​ខ្លះ​។​

​ក្រោយពេល​កើតហេតុ រថយន្ត​បង្ក ត្រូវបាន​សមត្ថកិច្ច វាស់វែង​យកទៅ​រក្សាទុក នៅ​ការិយាល័យ​ចរាចរណ៍​ផ្លូវគោក រាជធានី​ភ្នំពេញ ដើម្បី​ដោះស្រាយ និង​ផាក់ពិន័យ ទៅតាម​នីតិវិធី​៕/V​

ទីតាំងផ្សាយពាណិជ្ជកម្ម

- Advertisment -

Most Popular