អ្នកជំនាញ​អប្សរា​ចូលរួម​កម្មវិធី​ពិភាក្សា​បទពិសោធ នៃ​ការរៀបចំ​ខ្សែ​សៀគ្វី​ទេសចរណ៍ នៅ​រមណីយដ្ឋាន​បេតិកភណ្ឌ​ពិភពលោក​សំបូរ​ព្រៃ​គុក​

ដោយ​: អង្គរតូច / សៀមរាប​: ក្នុង​គោលដៅ​រៀបចំ​និង​ដាក់ចេញ​នូវ​ខ្សែ​សៀគ្វី​ទស្សនា​(​វង់​ទស្សនា​) រមណីយ ដ្ឋា​ន​សំបូរ​ព្រៃ​គុក អាជ្ញាធរ​ជាតិ​សំបូរ​ព្រៃ​គុក បាន​រៀប ចំ​កម្មវិធី​កិច្ចពិភាក្សា​ផ្លាស់ប្តូរ​បទពិសោធន៍​ស្តីពី​ការ រៀបចំ​ខ្សែ​សៀគ្វី​ទេសចរណ៍​រយៈពេល​៣​ថ្ងៃ​។​

​ជាមួយគ្នា​នោះ ក៏បាន​អញ្ជើញ​មន្ត្រី​បុគ្គលិក​ជំនាញ​ផ្នែក​រៀបចំ​ខ្សែ​សៀគ្វី​ទេសចរណ៍ នៃ​អាជ្ញាធរ​ជាតិ​អប្សរា ចូលរួម​ដើម្បី​ចែករំលែក​បទពិសោធន៍​ការងារ​នេះ​ផងដែរ​។​

​មន្ត្រី​នាយកដ្ឋាន​អភិវឌ្ឍន៍​វប្បធម៌ សារមន្ទីរ និង​បទដ្ឋាន​បេតិកភណ្ឌ នៃ​អាជ្ញាធរ​អប្សរា បានអោយដឹងថា ជា​លទ្ធផល​នៃ​កិច្ចពិភាក្សារ​រវាង​មន្ត្រី​បុគ្គលិក​ជំនាញ​ទាំងពីរ​ស្ថាប័ន ដែល​បំពេញការងារ​ក្នុង​ចក្ខុ វិស័យ​រួម​គឺ​ការអភិរក្ស និង​អភិវឌ្ឍន៍​រមណីយដ្ឋាន​បេតិកភណ្ឌ​ពិភពលោក គំនិត​រៀបចំ​ខ្សែ​សៀគ្វី​ទស្សនា​ក្រុម​ប្រាសាទ​ក្នុង​រមណីយដ្ឋាន​សំបូរ​ព្រៃ​គុក​ចំនួន ៦ ត្រូវបាន​ដាក់ចេញ ដើម្បី​បន្ត​ការសិក្សា​ស៊ីជម្រៅ​ដែល​ក្នុងនោះ​មាន​។​

១. សិក្សា​រៀបចំ​ទិសដៅ​ទស្សនា​ដោយ​កំណត់​ច្រក ចេញចូល​ច្បាស់លាស់ សម្រាប់​ក្រុម​ប្រាសាទធំៗ​ចំនួន​៣​គឺ ក្រុម​ប្រាសាទ​យាយ​ព័ន្ធ ក្រុម​ប្រាសាទតោ និង​ក្រុម​ប្រាសាទ​សំបូរ​។​
២. សិក្សា​ដាក់ចេញ​នូវ​ខ្សែ​ទស្សនា​ដែល​ភ្ជាប់​ក្រុម​ប្រាសាទធំៗ​ទាំងបី​គឺ ក្រុម​ប្រាសាទ​យាយ​ព័ន្ធ ក្រុម​ប្រាសាទតោ និង​ក្រុម​ប្រាសាទ​សំបូរ ជាមួយនឹង​ប្រាសាទ​ដើម​ចាន់ ប្រាសាទអាស្រមមហាឫស្សី​និង​ប្រាសាទជ្រៃ ដោយមាន​ជម្រើស​រយៈពេល​ទស្សនា​ផ្សេងៗ​គ្នា​(​សៀគ្វី​រយៈពេល​វែង មធ្យម និង​ខ្លី​)​។ ខ្សែ​សៀគ្វី​នេះ​គ្រោង​តម្រូវឱ្យ​យានជំនិះ​គ្រប់​ប្រភេទ​ដាក់​ភ្ញៀវ​នៅមុខ​ក្រុម​ប្រាសាទ​យាយ​ព័ន្ធ​ខាងកើត ហើយ​ត្រឡប់​ទៅ​ឈប់​ចាំ​ទទួលភ្ញៀវ​នៅ​ម្តុំ​មុខ​ប្រាសាទជ្រៃ​។
៣. សិក្សា​ដាក់ចេញ​នូវ​ខ្សែ​សៀគ្វី​កង់ និង​រទេះគោ ដែល​អាចមាន​ជម្រើស​ខ្សែ​វែង និង​ខ្សែ​ខ្លី ក្រោម​ចំណងជើង «​ទស្សនា​រមណីយដ្ឋាន​សំបូរ​ព្រៃ​គុក​ដោយ​ជិះ​កង់​ឬ​រទេះគោ​»​។​
៤. សិក្សា​ដាក់ចេញ​នូវ​ខ្សែ​សៀគ្វី​រយៈពេល​១​ថ្ងៃ​ពេញ​ដើម្បី​លើក​តម្លៃ​ប្រាសាទតូចៗ​មួយចំនួន រួមទាំង​ក្រុង​បុរាណ «​ឦសាន​បុ​រ​» ដោយ​ភ្ជាប់​ជាមួយ​ក្រុម​ប្រាសាទធំៗ​ទាំង​៣​។​
៥. សិក្សា​ស៊ីជម្រៅ​បន្ថែម​ដើម្បី​ដាក់ចេញ​នូវ​ខ្សែ​ទស្សនា​ក្រោម​ប្រធានបទ​ពិសេស «​ស្វែងយល់​ពី​ចម្លាក់​លើ​ប្រាសាទ​ឥដ្ឋ​» ដែល​ភ្ញៀវទេសចរ​អាច​ទទួលបាន​ព័ត៌មាន​លម្អិត​ពី​ចម្លាក់ «​ប្រាសាទអណ្តែត​» និង​ចម្លាក់ «​មេដៃ​យ៉ុង​» ដែល​ទាំងនេះ​ជា​តម្លៃ​លេចធ្លោរ​ជាស​កល (outstanding universal value) របស់​រមណីយដ្ឋាន​សំបូរ​ព្រៃ​គុក​បេតិកភណ្ឌ​ពិភព លោក​។​
៦. សិក្សា​រៀបចំ​ខ្សែ​សៀគ្វី​សម្រាប់​ទេសចរ​បែប​សមាធិ ដោយ​ក្នុងនោះ​អាច​កំណត់​យក​ប្រាសាទត្រពាំង​រពាក់​ឬ​ប្រាសាទគក់ទ្រូង​ជាទី​តាំង​បញ្ចប់​ខ្សែ​ទស្សនា និង​ស្នើឱ្យ​ទេសចរ​អាចធ្វើ​សមាធិ​បែប​ពុទ្ធសាសនា នៅ​ទី​នោះបាន​។

​មន្ត្រី​បញ្ជាក់ថា គំនិត​ជំហាន​ដំបូង​ទាំង​៦ ខាងលើនេះ នឹងត្រូវ​សិក្សា​ស៊ីជម្រៅ​លម្អិត​បន្ថែម​រួមគ្នា​បន្តទៀត រវាង​មន្ត្រី​បុគ្គលិក​ជំនាញ​នៃ​អាជ្ញាធរ​ជាតិ​អប្សរា និង​អាជ្ញាធរ​ជាតិ​សំបូរ​ព្រៃ​គុក​៕​

ទីតាំងផ្សាយពាណិជ្ជកម្ម

- Advertisment -

Most Popular