Home ព័ត៌មានអន្តរជាតិ អឺរ៉ុប​នឹង​ជួ...

អឺរ៉ុប​នឹង​ជួបពិភាក្សា​ជាមួយ​អាម៉េរិក​ស្តីពី​អ៊ីរ៉ង់ ខណៈ​កិច្ចព្រមព្រៀង​នុយក្លេអ៊ែរ​ជិត​ផុតកំណត់​

​ប្រែ​សម្រួល : កញ្ញា​ដា​លី​ស ៖​អ្នកការទូត​កំពូលៗ​មកពី​ប្រទេស​មហាអំណាច​អឺរ៉ុប​និង​សហរដ្ឋ​អាម៉េរិក​នឹង​ធ្វើ​ការពិភាក្សា​គ្នា​នៅ​ថ្ងៃ​ព្រហស្បតិ៍​នេះ​ដើម្បី​មើល​ពី​របៀប​ធ្វើ​ឱ្យ​រស់​ឡើងវិញ​នូវ​កិច្ចព្រមព្រៀង​ឆ្នាំ ២០១៥ ស្តី​ពី​នុយក្លេអ៊ែរ​របស់​អ៊ីរ៉ង់ គឺ​នៅ​ពេល​តែ​ប៉ុន្មាន​ថ្ងៃ​នៅមុន​ថ្ងៃ​ផុតកំណត់ ។​

​ក្រសួងការបរទេស​បារាំង​បាន​ឱ្យដឹង​កាលពី​ថ្ងៃ​ពុធ​ថា រដ្ឋមន្ត្រីការបរទេស​បារាំង​លោក​ហ្សង់​យ៉េ​វីស ឡឺ ដេរី​យ៉ង់ នឹង​ធ្វើជា​ម្ចាស់ផ្ទះ​ទទួល​សម​ភាគី​អាល្លឺម៉ង់​និង​អង់គ្លេស​របស់គាត់​នៅ​ទីក្រុង​ប៉ារីស​ដោយ​​អ្នកការទូត​កំពូល​ថ្មី​របស់​អាម៉េរិក លោក​អាន​ថូ​នី ប្លិង​កិន ចូលរួម​តាមរយៈ​វីដេអូ​។​

​គូសបញ្ជាក់​អំពី​ផ្លូវ​ដ៏​លំបាក​នៅខាងមុខ អធិការបតី​អាល្លឺម៉ង់​លោកស្រី​អង់​ជេឡា មឺ​គែ​លបាន​សម្តែង​នូវ​ការព្រួយបារម្ភ​ថា​អ៊ីរ៉ង់​មិនបាន​បំពេញ​កាតព្វកិច្ច​របស់​ខ្លួន​នៅក្នុង​កិច្ចពិភាក្សា​តាម​ទូរស័ព្ទ​​ជាមួយ​ប្រធានាធិបតី​ហាស​សាន់ រូ​ហា​នី នេះ​យោងតាម​អ្នកនាំពាក្យ​របស់​លោកស្រី ដែល​និយាយ​នៅក្នុង​សេចក្តីថ្លែងការណ៍​មួយ​។​

​ក្រុមអ្នកវិភាគ​និយាយថា​នៅ​មាន​ឱកាស​តិចតួច​ប៉ុណ្ណោះ​ដែល​អាច​ជួយសង្គ្រោះ​កិច្ចព្រមព្រៀង​ដែល​ទទួលរង​ការប៉ះទង្គិច​យ៉ាងធ្ងន់ធ្ងរ នៅពេល​ដែល​អតីត​ប្រធានាធិបតី​អាម៉េរិក​លោក​ដូណាល់ ត្រាំ​​ដើរចេញ​ពី​កិច្ចព្រមព្រៀង​កាលពី​ឆ្នាំ ២០១៨ ។​

​រដ្ឋបាល​របស់​លោកចូ​បៃ​ដិនបាន​និយាយថា​ខ្លួន​បាន​ត្រៀម​ចូលរួម​កិច្ចព្រមព្រៀង​នេះ​ឡើងវិញ​ហើយ​ចាប់ផ្តើម​ដក​ទណ្ឌកម្ម​ប្រសិនបើ​អ៊ីរ៉ង់​វិលត្រឡប់​ទៅរក​ការអនុលោម​ពេញលេញ​ជា​បុរេ​លក្ខខណ្ឌ​មួយ​​ដែល​ជំទាស់​ដោយ​រដ្ឋាភិបាល​ក្រុងតេអេ​រ៉ង់​។​

​នៅមុន​កិច្ចពិភាក្សា​នេះ លោកបៃ​ដិនបាន​និយាយពេញ​មួយ​យប់​ទៅ​កាន់​មេដឹកនាំ​អ៊ីស្រាអែ​ល​លោក​បេន​ចា​មីន ណេ​តាន់​យ៉ា​ហ៊ូ ដោយ​មេដឹកនាំ​ទាំង​ពីរ​ពិភាក្សា​អំពី​”​ការគំរាមកំហែង​របស់​អ៊ីរ៉ង់​និង​​បញ្ហា​ប្រឈម​ក្នុង​តំបន់​” នេះ​បើ​យោងតាម​សេចក្តីថ្លែងការណ៍​របស់​សេត​វិមាន​។​

​បន្ថែម​លើ​ភាព​តានតឹង​នេះ អ៊ីរ៉ង់​គ្រោង​នឹង​រឹតត្បិត​ការត្រួតពិនិត្យ​របស់​ទីភ្នាក់ងារ​នុយក្លេអ៊ែរ​របស់​អង្គការសហប្រជាជាតិ​មួយចំនួន ប្រសិនបើ​សហរដ្ឋ​អាម៉េរិក​មិន​ដក​ទណ្ឌកម្ម​របស់ខ្លួន​ដែល​ដាក់​​ចាប់តាំងពី​ឆ្នាំ ២០១៨ នៅត្រឹម​ថ្ងៃទី ២១ ខែ​កុម្ភៈ​ក្រោម​លក្ខខណ្ឌ​នៃ​ច្បាប់​ដែល​អនុម័ត​ដោយ​សភា​របស់​ខ្លួន​កាលពី​ខែ​ធ្នូ​៕

អឺរ៉ុប​និង​អាម៉េរិក​នឹង​ពិភាក្សា​អំពី​នុយក្លេអ៊ែរ​អ៊ីរ៉ង់​នៅថ្ងៃនេះ​

ទីតាំងផ្សាយពាណិជ្ជកម្ម

Previous articleនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបញ្ជាក់ថា ប្រឆាំងដាច់ខាតបដិវត្តន៍ពណ៌ និងចលនាជ្រុលនិយមនានា ដែលមានចរិតបំផ្លាញសន្តិភាព និងបង្កើតចលាចលក្នុងសង្គម។ ត្រូវស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ លើកកម្ពស់មនសិការស្នេហាជាតិ ហ៊ានធ្វើពលិកម្មគ្រប់បែបយ៉ាង ដើម្បីការពារជាតិ ការពារបូរណភាពទឹកដី និងការពារប្រជាជន ហើយក្នុងតម្លៃណាក៏ដោយ ត្រូវចូលរួមការពារឱ្យបាននូវសន្តិភាព ដែលរកបានមកដោយលំបាក ការពាររាជរដ្ឋាភិបាលស្របច្បាប់។
Next articleអ្នកការទូត​កំពូលៗ​មកពី​ប្រទេស​មហាអំណាច​អឺរ៉ុប​និង​សហរដ្ឋ​អាម៉េរិក​នឹង​ធ្វើ​ការពិភាក្សា​គ្នា​នៅ​ថ្ងៃ​ព្រហស្បតិ៍​នេះ​ដើម្បី​មើល​ពី​របៀប​ធ្វើ​ឱ្យ​រស់​ឡើងវិញ​នូវ​កិច្ចព្រមព្រៀង​ឆ្នាំ ២០១៥ ស្តី​ពី​នុយក្លេអ៊ែរ​របស់​អ៊ីរ៉ង់ គឺ​នៅ​ពេល​តែ​ប៉ុន្មាន​ថ្ងៃ​នៅមុន​ថ្ងៃ​ផុតកំណត់ ។​
- Advertisment -

Most Popular