Home ព័ត៌មានសំខាន់ៗ មន្ត្រី​បី​ស្...

មន្ត្រី​បី​ស្ថាប័ន​នាំគ្នា​ចុះ​មើល​គម្រោង​ជំនួយ​របស់​ជប៉ុន​

ដោយៈ​ប​.​ខុន​/​ភ្នំពេញៈ ក្រុមការងារ​របស់​ក្រសួង​ធនធានទឹក និង​ឧតុនិយម ក្រសួង​សេដ្ឋកិច្ច​ហិរញ្ញវត្ថុ និង​ទីភ្នាក់ងារ​សហប្រតិបត្តិ​ការ​អន្តរជាតិ​ជប៉ុន (JICA) ប្រចាំ​ព្រះរាជាណាចក្រ​កម្ពុជា​ចុះ​ពិនិត្យ​ការដ្ឋាន​សាងសង់​ប្រព័ន្ធធារាសាស្ត្រ​លំហាច ស្ថិតក្នុង​ស្រុក​បរិបូ​ណ៍​, ទឹកផុស និង​ស្រុក​រលាប្អៀរ ខេត្តកំពង់ឆ្នាំង ដែលជា​ជំនួយ​របស់​ប្រទេស​ជប៉ុន​។​

​ប្រតិភូ​ចុះ​ពិនិត្យ​ការដ្ឋាន​សាងសង់​ប្រព័ន្ធ​ធា​រា សាស្ត្រ​លំហាច ដែលជា​អនុ​គម្រោង​មួយ​នៅ ក្នុងចំណោម​អនុ​គម្រោង​ចំនួន​៦​នៅ​ថ្ងៃទី​១៨ ខែកុម្ភៈ ដឹកនាំ​ដោយ​លោក​ពេជ្រ វាសនា អនុរដ្ឋលេខាធិការ និង​ជា​នាយក​គម្រោង​កែលម្អ និង​ស្តារ​ឡើង វិញ​ប្រព័ន្ធ​ស្រោចស្រព និង​ប្រព័ន្ធ​ដោះ​ទឹក​ភាគ​ខាងលិច​បឹង​ទន្លេសាប ដោយមាន​ការ​ចូលរួម​ពី លោក ប៉ោ យុទ្ធ​ថា អគ្គនាយករង នៃ​អគ្គនាយកដ្ឋាន​សហប្រតិបត្តិ​ការ​អន្តរជាតិ និង​គ្រប់គ្រង​បំណុល ក្រសួង​សេដ្ឋកិច្ច និង​ហិរញ្ញវត្ថុ​, លោកស្រី Miyahara Ai អនុប្រធាន​ទីភ្នាក់ងារ​សហប្រតិបត្តិការ​អន្តរជាតិ​ជប៉ុន (JICA) ប្រចាំ​ព្រះរាជាណាចក្រ​កម្ពុជា​, តំណាង​ទីប្រឹក្សាបច្ចេកទេស​គម្រោង​, តំណាង​ក្រុមហ៊ុន​សាងសង់​អន្តរ​ជាតិ​, មន្ត្រី​អង្គភាព​គ្រប់គ្រង​គម្រោង និង​ប្រធាន​មន្ទី​ធនធានទឹក និង​ឧតុនិយម​ខេត្តកំពង់ឆ្នាំង ។​

​គម្រោង​នេះ បានចាប់ផ្តើម​សាងសង់​នៅ​ខែមីនា ឆ្នាំ​២០១៦ ហើយ​បានបញ្ចប់​ការងារ​សាង សង់ កាលពី​ចុងខែ​ធ្នូ ឆ្នាំ​២០២០​មានលទ្ធភាព ស្រោចស្រព​លើ​ផ្ទៃដី​ស្រូវវស្សា ចំនួន ៣.២៨៩ ហិកតា​, ស្រូវប្រាំង​ចំនួន ៦០០​ហិកតា និង ផ្គត់ផ្គង់​ទឹក​សម្រាប់​ការប្រើ ប្រាស់​ប្រចាំថ្ងៃ​របស់​ប្រជាពលរដ្ឋនៅក្នុង​តំបន់​គម្រោង​បាន​ប្រមាណ​ជាង​១.០០០​​គ្រួសារ​។

​ការងារ​នៅក្នុង​គម្រោង​នេះ រួមមាន ដូចជា សំណង់​ក្បាល​ហុ​ទឹក (Headworks) ចំនួន​មួយកន្លែង , សំណង់​នាំ​ទឹក (Intake) ចំនួន​មួយកន្លែង​, សាងសង់​ប្រឡាយ​មេ​បេតុង​ចំនួន​មួយ​ខ្សែ​ស្មើ​ប្រវែង ១៦,៤០ គីឡូម៉ែត្រ​, សាងសង់ ប្រឡាយ​ថ្នាក់​ទី​២ ពី​បេតុង​ចំនួន​១៣​ខ្សែ ស្មើ​ប្រវែង ៤២,៥០ គីឡូម៉ែត្រ​, សាងសង់​ប្រឡាយ​ដោះ​ទឹក​ចំនួន ១៥ ខ្សែ ស្មើនឹង​ប្រវែង ៥២,៩០​គីឡូម៉ែត្រ​, សាងសង់​ប្រឡាយ​ថ្នាក់​ទី​៣ ចំនួន ៩៤​ខ្សែ ស្មើនឹង​ប្រវែង ៦២​គីឡូម៉ែត្រ​, សាងសង់ សំណង់​សិល្បការ​ចំនួន ៥៥៧​កន្លែង​, សាងសង់​សំណង់​អគារ​សហគមន៍​កសិក​រ​ប្រើប្រាស់​ទឹក​មួយកន្លែង ។

​រំលឹក​ឱ្យដឹងថា​គម្រោង​កែលម្អ និង ស្តារឡើងវិញ​ប្រព័ន្ធ​ស្រោចស្រព និង ប្រព័ន្ធ​ដោះ​ទឹក​ភាគ​ខាងលិច​បឹង​ទន្លេសាប មាន ៦​អនុ​គម្រោង គឺ លំហាច​នៅក្នុង​ខេត្តកំពង់ឆ្នាំង​, វត្ត​ជ្រៃ​, វត្ត​លួង , ដំណាក់​អំពិល​ក្នុង​ខេត្ត​ពោធិសាត់​, រាម​គុណ​, ប្រឡាយ ប៉ូ ក្នុង​ខេត្តបាត់ដំបង ដែល​ប្រើប្រាស់ ដោយ​ថវិកា​ជំនួយ​ពី​ប្រទេស​ជប៉ុន បាន​រួចរាល់​អស់ហើយ នៅសល់តែ ការងារ​សម្អាត ៕​

ទីតាំងផ្សាយពាណិជ្ជកម្ម

- Advertisment -

Most Popular