តំបន់​បណ្តោយ​ព្រំដែន​កម្ពុជា​-​ឡាវ​ពង្រឹង​ត្រួតពិនិត្យ​ការឆ្លង​ដែន​នៃ​ពលរដ្ឋ​ប្រទេស​ទាំង​២

​ដោយ​:​សៅ​វ៉ាន់ឌី​/​ព្រះវិហារ​: តំបន់​ជាប់​ព្រំដែន​ជាមួយ​ប្រទេស​ឡាវ ក្នុង​ឃុំ​កំពង់​ស្រឡៅ​១-២ ស្រុក​ឆែប ខេត្តព្រះវិហារ អាជ្ញាធរខេត្ត បាន​ណែនាំ​ដល់​សមត្ថកិច្ច​ពាក់ព័ន្ធ ត្រូវ​ត្រួតពិនិត្យ​ឱ្យបាន​ច្បាស់លាស់ ដោយ​ពង្រឹង​ការចេញចូល​ឆ្លងកាត់​រវាង​ពលរដ្ឋ​នៃ​ប្រទេស​ទាំង​២​។​

​លោក សុខសាន្ត​តា​រ៉ា អភិបាលស្រុក​ឆែប​បានឱ្យដឹង​នៅ​ព្រឹក​ថ្ងៃទី​១៨ ខែកុម្ភៈ ឆ្នាំ​២០២១​នេះ​ថា តាម​បណ្តោយ​ព្រំដែន​កម្ពុជា​-​ឡាវ ដែលមាន​ប្រវែង​២៤​គីឡូម៉ែត្រ ស្របតាម​ទន្លេមេគង្គ ក្នុងភូមិ​សាស្ត្រ​ឃុំ​កំពង់​ស្រឡៅ​១-២ ស្រុក​ឆែប ត្រូវ​បានដាក់​កម្លាំងចម្រុះ​ត្រួតពិនិត្យ​ជាប្រចាំ ដែល​ការងារ​សំខាន់ គឺ​ពង្រឹង​ការត្រួត​ពិនិត្យមើល​ការ​ឆ្លង​ដែន​នៃ​ប្រជាពលរដ្ឋ​ប្រទេស​ទាំង​២ និង​ការ​ឆ្លងដែន​ពលករ​ផងដែរ​។​

​លោក អភិបាលស្រុក​ឆែប បាន​បន្តថា ដោយ​អនុវត្តន៍​តាម​បទបញ្ជា និង​ការណែនាំ​របស់​រដ្ឋបាល​ខេត្តព្រះវិហារ លោក​បាន​ដឹកនាំ​ក្រុមការងារ​ចុះ​ពិនិត្យមើល​តាម​បណ្តោយ​ព្រំដែន​កម្ពុជា​-​ឡាវ ជាប្រចាំ​។ ក្នុងទិសដៅ​លើក​ទឹក​ចិត្ត ដល់​មន្ត្រី និង​កងកម្លាំង​ដែល​កំពុង​ឈរជើង​តាម​គោលដៅ​នីមួយៗ ជាមួយនឹង​ការណែនាំ​បន្ថែម​ឲ្យ​មានការ​ប្រុង​ប្រ​យ​ត្ន័​ខ្ពស់​ចំពោះ​ការឆ្លង​ដែន​របស់​ពល​ករ ៕​

ទីតាំងផ្សាយពាណិជ្ជកម្ម

- Advertisment -

Most Popular