អ្នកវិនិយោគទុន​កម្ពុ​ជា​និង​រុស្ស៊ី​ជិត​បាន​ជួបគ្នា​ជាថ្មី​ហើយ

​ដោយៈ ជា សីហៈ​/​ភ្នំពេញៈ លោក សំហេង បូរ៉ា អនុរដ្ឋលេខាធិការ​ក្រសួងពាណិជ្ជកម្ម កាលពី​ម្សិលមិញ​បាន​ដឹកនាំ​កិច្ចប្រជុំ​អន្តរក្រសួង​-​ស្ថាប័ន ដើម្បី​ពិនិត្យ​ពិភាក្សា​លើ​គម្រោង​វិនិយោគ​ផ្តល់​ដោយ​សហព័ន្ធរុស្ស៊ី សំដៅ​ត្រៀម​រៀបចំ​កិច្ចប្រជុំ​លើក​ទី​២ នៃ​ក្រុមការងារ​ជាន់ខ្ពស់ ដើម្បី​ជំរុញ​គម្រោង​វិនិយោគ​អាទិភាព​រួម​កម្ពុជា​-​រុស្ស៊ី ដោយមាន​ការចូលរួម​ពី​តំណាង​ក្រសួង​-​ស្ថាប័ន​ពាក់ព័ន្ធ និង វិស័យ​ឯកជន​ប្រមាណ ៣០​រូប​។​

​អ្នក​ចូលរួមបាន​ពិភាក្សា​លើ​បញ្ហា​មួយចំនួន​ដែល​រួមមាន ផលិតកម្ម​ដំបូល​ស៊ី​ប្រូ និង​បំពង់​លូ​, ផលិតកម្ម​តម្លើង​រថយន្ត​ដឹកទំនិញ​ម៉ាក KAMAZ និង បណ្តាញ​ផ្តល់​សេវាកម្ម​, ការផ្គត់ផ្គង់​ឧបករណ៍​ដុត​កាកសំណល់​រឹង​, ការ​ផលិត​​ល្បាយ​អ៊ី​សូ​ឡង់​ការពារ​កម្តៅ​បានមកពី​អង្កាម និង​ចំបើង និង​, ការផ្គត់ផ្គង់​ឧបករណ៍​បណ្តាញ GPON (Gigabit Passive Optical Networks) ព្រមទាំង​បណ្តាញ សម្រាប់​ប្រព័ន្ធ​បណ្តាញ​អ៊ី​ន​ធឺ​ណេ​ត​ល្បឿន​លឿន​។​

​គម្រោង​វិនិយោគ​អាទិភាព​រួម​កម្ពុជា​-​រុស្ស៊ី​នេះ នឹង​ផ្តល់នូវ​ឱកាស​ធុរកិច្ច​ថ្មី​សម្រាប់​វិស័យ​ឯកជន​របស់​ភាគី​ទាំងពីរ​ក្នុងការ​ចូលរួម​អនុវត្ត​គម្រោង​វិនិយោគ​ខាងលើ សំដៅ​បន្ត​ពង្រឹង និង​ពង្រីក​កិច្ចសហប្រតិបត្តិការ​លើ​វិស័យ​ពាណិជ្ជកម្ម​ទ្វេភាគី​រវាង​ប្រទេស​ទាំងពីរ​ឱ្យ​កាន់តែ​ទូលំទូលាយ​បន្ថែមទៀត​។​

ថ្វីត្បិតតែ​នៅក្នុង​បរិការណ៍​កូ​វីដ​-១៩​ក៏ដោយ ក៏​ទំនាក់ទំនង​ពាណិជ្ជកម្ម​រវាង​កម្ពុជា និង​រុស្ស៊ី នៅតែមាន​ភាពល្អ​ប្រសើរ ជាក់ស្តែង ទំហំ​ពាណិជ្ជកម្ម​រវាង​ប្រទេស​ទាំងពីរ បាន​កើនឡើង​ប្រមាណ ១៥% ពី ៥៥,៣៦ លាន​ដុល្លារ​​អាមេរិក ក្នុង​ឆ្នាំ​២០១៩ ទៅ ៦៣,៨១ លាន​ដុល្លារ​អាមេរិក ក្នុង​ឆ្នាំ​២០២០៕​

ទីតាំងផ្សាយពាណិជ្ជកម្ម

- Advertisment -

Most Popular