គម្រោង​កែលម្អរ​សួនច្បារ​នៅមុខ​ក្រសួងការពារជាតិ​ថ្មី​គ្រោង​នឹង​ស្ថាបនា​ឱ្យបាន​រួចរាល់​នៅក្នុង​អំឡុង​ខែមិថុនា​ខាងមុខ​

​ដោយ​:​រ៉ា​ម៉ន​/​ភ្នំពេញ​: គម្រោង​កែលម្អ​សួនច្បារ​នៅមុខ អគារ​ទីស្តីការក្រសួង​ការពារជាតិ​ថ្មី​គ្រោង​នឹង​ស្ថាបនា​ឲ្យ​បាន​រួចរាល់​នៅក្នុង​អំឡុង​ខែមិថុនា ឆ្នាំ​២០២១ គឺ​មុនពេល​បើកសម្ពោធ​ដាក់​ឲ្យ​ប្រើប្រាស់​ជា​ផ្លូវការ​អគារ​ទីស្តីការក្រសួង​ការពារជាតិ​ថ្មី ដែល​គ្រោង​បើកសម្ពោធ នៅក្នុង​អំឡុង​ខែមិថុនា​ខាងមុខនេះ ក្រោម​អធិបតីភាព​របស់​សម្ដេច​អគ្គមហាសេនាបតី​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​។​ នេះ​​ បើតាម​ការ​បញ្ជាក់​​ពី​មន្ត្រី​ជំនាញ​របស់​រដ្ឋបាល​រាជធានី​ភ្នំពេញ​ក្នុង​កិច្ចពិភាក្សា​អនុម័ត​លើ​គម្រោង​កែលម្អ​សួនច្បារ និង​ហេដ្ឋារចនាសម្ព័ន្ធ​នានា​នៅមុខ​ក្រសួង​កម្ពុជា ក្រោម​វត្តមាន​លោក​ឃួ​ង ស្រេង អភិបាល​រាជធានី​ភ្នំពេញ​ជាមួយនឹង​តំណាង​របស់​ក្រសួងការពារជាតិ​នា​រសៀល​ថ្ងៃទី​១៨​ខែកុម្ភៈ​នេះ​នៅ​សាលា​រាជធានី​ភ្នំពេញ​។​

​លោក​សាំ ពិសិដ្ឋ ប្រធាន​មន្ទីរ​សាធារណការ និង​ដឹកជញ្ជូន​រាជធានី​ភ្នំពេញ បាន​បញ្ជាក់ថា ក្រោយពី​បាន​ពិភាក្សាគ្នា​ក្នុង​កិច្ចប្រជុំ​កាលពី​ថ្ងៃទី​២១ មករា ឆ្នាំ​២០២១ ក្រុមការងារ​របស់​ម​ន្ទីរ​សាធារណការ និង​ដឹកជញ្ជូន​រាជធានី​ភ្នំពេញ ជាមួយនឹង​តំណាង​ក្រសួងការពារជាតិ បានសម្រេច​លើ​គម្រោង​កែលំអ​ប្រព័ន្ធ​ការកែលម្អ​សួនច្បារ​នៅមុខ​ក្រសួងការពារជាតិ​នេះ​រួចហើយ​។ គម្រោង​នេះ​នឹង​ចាប់ផ្ដើម​អនុវត្ត​នៅ​អំឡុង​ខែ​មិនា ឆ្នាំ​២០២១​នេះ ហើយ​គ្រោង​នឹង​បញ្ចប់​នៅក្នុង​ខែមិថុនា ឆ្នាំ​២០២១ ដើម្បី​ឱ្យទាន់​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​អគារ​ទីស្តីការក្រសួង​ការពារជាតិ​ថ្មី​នេះ នៅក្នុង​អំឡុង​ខែមិថុនា​ខាងមុខនេះ​។​

​គម្រោង​នេះ​មាន​មួយផ្នែក​ប្រើប្រាស់​ថវិកា​របស់​ក្រសួង​ការពា​ជាតិ​ដូច​ជាការ​ដាក់លូ​ថ្មី​ទំហំ​១​ម៉ែត្រ និង​ង​ការ​អ៊ុត​កៅស៊ូ​លើ​ទំហំ​ផ្លូវ​ចូល​ក្រសួង​រហូតដល់​៤៥​ម៉ែត្រ​ជាដើម ។ ចំណែក​រដ្ឋបាល​រាជធានី​ភ្នំពេញ​មានការ​ងារ​ច្រើន​ដែល​ត្រូវអនុវត្ត​ផងដែរ ដូចជា​ការកែលម្អ​សួនច្បារ ដាក់​បង្គោល​ភ្លើង​៦៦​ដើម ជាមួយនឹង​ការដាក់​លូ ការស្ដា​លូ​ពីក្រោយ​និង​នៅមុខ​ក្រសួងការពារជាតិ ហើយ​ការងារ​នេះ​ធ្វើយ៉ាងណា​ឲ្យ​បាន​រួចរាល់​នៅមុន​ពិធី​សម្ពោធ​ដាក់ឱ្យ​ប្រើប្រាស់​ក្រសួងការពារជាតិ​។​

​ក្នុង​កិច្ចប្រជុំ​នោះ​លោក​ឃួ​ង ស្រេង អភិបាល​រាជធានី​ភ្នំពេញ បាន​ជំរុញ​ឲ្យ​មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ ធ្វើការ​ស្ដារលូ​ចាប់ពីពេលនេះ​តទៅ​ដោយ​មិនបាច់ចាំ​ទៅដល់​ខែ​មិនា​នោះទេ​។​បន្ថែម​ពីលើ​នេះ​ទៀត​មន្ទីរ​សាធារណៈ​ការត្រួតពិនិត្យ​ទៅលើ​បច្ចេកទេស​ទាំង​ការ​អ៊ុត​កៅស៊ូ​បេ​ទី​មី​ណឺ ការ​ដាក់លូ ស្តា​លូ​ជាដើម​។​

​គម្រោង​កែលម្អ​សួនច្បារ​មុខ​ទីស្តីការ ក្រសួង​ពារ​ជាតិ​នេះ មិន​ត្រឹមតែ​លើកកម្ពស់​សោភ័ណភាព​ទាំង​ក្រសួង និង​សួនច្បារ​ឱ្យមាន​ភាពស្រស់ ស្អាត​បន្ស៊ី​គ្នា​ប៉ុណ្ណោះ​ទេ គឺ​បាន​បើក​ឱ្យមាន​ចរាចរណ៍​ចេញចូល​ងាយស្រួល​ផងដែរ​។​

​សូមបញ្ជាក់ថា តាម​គម្រោង​កែលម្អ​សួនច្បារ​មុខក្រសួង​ការពារជាតិ​នេះ នឹងត្រូវ​កាត់​សួន​ចាស់​ចេញ​រហូតដល់ ប្រវែង​៤៥​ម៉ែត្រ ដើម្បី​រៀប​ជា​ផ្លូវចេញចូល​មុខក្រសួង ហើយ​សួន​ថ្មី​នេះ នឹង​រៀប​ជា​ថ្ម​ក្រា​នី​ត ដាំ​ស្មៅ បំពាក់​អំពូល​ភ្លើង​ដែល​អាចឱ្យ​ប្រជាពលរដ្ឋ​មាន​កន្លែង​ហាត់ប្រាណ​ងាយស្រួល ជាមួយនឹង​ទីតាំង​ធំ​ទូលាយ​ជាង​មុន​៕​

ទីតាំងផ្សាយពាណិជ្ជកម្ម

- Advertisment -

Most Popular