Home ព័ត៌មានជាតិ សន្តិសុខ យោធភូមិភាគ​ទី...

យោធភូមិភាគ​ទី​៥ និង​គណៈបញ្ជាការ​កង​ឯកភាព រដ្ឋបាលខេត្ត​បន្ទាយមានជ័យ ដាក់​បញ្ជា​អោយ​ដាក់​កម្លាំង​បន្ថែម តាម​ព្រំដែន​

ដោយៈ ប​.​ជ័យ / ព្រំដែន​កម្ពុជា ថៃៈ យោធភូមិភាគ​ទី​៥ និង​គណៈបញ្ជាការ​កង​ឯកភាព រដ្ឋបាលខេត្ត​បន្ទាយមានជ័យ បានដាក់​បញ្ជា​អោយ​ដាក់​កម្លាំង​បន្ថែម តាម​ព្រំដែន ដើម្បី​បង្កើន​ការទប់ស្កាត់ ពលករ​ខ្មែរ វិលត្រឡប់​មកពី​ប្រទេស​ថៃ ហើយ​បាន​គេចវេះ ពី​ការធ្វើ​ច​ត្តា​ឡី​ស័ក និង​បង្ការ​ការរីក​រាលដាល នៃ​មេរោគ / ជំងឺ​កូ​វីដ​១៩ ចូលក្នុង​សហគមន៍​។​

​លោក​ឧ​ត្ត​ម​សេនីយ៍​ទោ ឈុន ម៉ៅ មេបញ្ជាការរង យោធភូមិភាគ​ទី​៥ និង​ទទួល​ជា​មេបញ្ជាការ​ទិស​ទី​១ ខេត្តបន្ទាយមានជ័យ បានអោយដឹង​កាលពី​ថ្ងៃទី​១៨ ខែកុម្ភៈ ឆ្នាំ​២០២១ ថាៈ កងកម្លាំង មន្ត្រី​អាជ្ញា​ធរមាន​សម​ត្ថិ​ច្ច គ្រប់លំដាប់ បាន​បន្ត​ខិតខំ​អនុវត្ត នូវ​បទបញ្ជា​របស់​សម្តេច​តេ​ជោ នាយករដ្ឋមន្ត្រី​កម្ពុជា ឲ្យ​បាន​លទ្ធផល​ល្អ មាន​ប្រសិទ្ធភាព​ខ្ពស់ និង​ប្រកបដោយ​ការទទួលខុសត្រូវ ក្នុងការ​ទប់ស្កាត់ និង​បង្ការ​ការរីក​រាលដាល នៃ​មេរោគ / ជំងឺ​កូ​វីដ​១៩ ពិសេស​គឺ​ពង្រឹង​ការបង្ការ​ទប់ស្កាត់​ពល​ករ​ខ្មែរ ត្រឡប់​ពី​ធ្វើការ នៅ​ប្រទេស​ថៃ វិល​មក​ស្រុកកំណើត នៅ​ប្រទេស​កម្ពុជា​វិញ ដោយ​ឆ្លងដែន​ខុសច្បាប់ ហើយ​គេចវេះ ពី​ការត្រួតពិនិត្យ តាម​ច្រកព្រំដែន និង​ធ្វើ​ច​ត្តា​ឡី​ស័ក នៅតាម​មណ្ឌល​ច​ត្តា​ឡី​ស័ក​នានា តាម​ស្រុក និង​ខេត្ត នៅ​ខេត្តបន្ទាយមានជ័យ ។​

​លោក​ឧ​ត្ត​ម​សេនីយ៍​ទោ ឈុន ម៉ៅ បាន​អមដំណើរ​ដោយ​លោក អ៊ុំ រាត្រី អភិបាលខេត្ត​បន្ទាយមានជ័យ និង​ជា​ប្រធាន គណៈបញ្ជាការ កងឯកភាព​រដ្ឋបាល​ខេត្ត និង​ក្រុមការងារ បាន​បន្ត​ចុះ​ពិនិត្យ កងកម្លាំងប្រដាប់អាវុធ ទាំង ៣ ប្រភេទ ដែល​កំពុង​ឈរជើង ល្បាត នៃ​ប្រតិបត្តិការ ទប់ស្កាត់​ជំងឺ​កូ​វីដ​១៩ នៅតាម​បណ្តោយ​ខ្សែបន្ទាត់​ព្រំដែន និង​តាម​គោល ដៅ ភូមិសាស្ត្រ​ទទួលខុសត្រូវ ក្នុង​បំណង​បង្ការ ទប់ស្កាត់ កុំអោយ​ជំងឺ​កូ​វីដ ១៩ ដែល​ផ្ទុះ​រីក​រាលដាល​ខ្លាំង នៅ​សហគមន៍ នៃ​ប្រទេស​ថៃ ចូលមកក្នុង​សហគមន៍​កម្ពុជា តាមរយៈ​ការបញ្ជូន​ពលករ​ខ្មែរ ត្រឡប់មក​ប្រទេស កម្ពុជា​វិញ​។​

​លោក​ទាំង ២ បាន​ថ្លែង​ក្នុងពេល​ចុះ​ត្រួតពិនិត្យ តាម​ព្រំដែន​នោះ​ថាៈ ” យើង​ឯកភាពគ្នា ត្រូវដាក់​បន្ថែម នូវ​កម្លាំង​ត្រួតពិនិត្យ តាម​បណ្តោយ​ព្រំដែន ចាប់ពី​ព្រំប្រទល់ ស្រុក​បន្ទាយ​អម្ពិល ខេត្ត​ឧ​ត្ត​រ​មានជ័យ រហូតដល់​ព្រំប្រទល់ ស្រុក​សំពៅ​លូន ខេត្តបាត់ដំបង ប្រវែង ១៥៤,៥ គ​.​ម ” ៕/V​

ទីតាំងផ្សាយពាណិជ្ជកម្ម

- Advertisment -

Most Popular