Home ព័ត៌មានសំខាន់ៗ បិទ​ខ្លោងទ្វា...

បិទ​ខ្លោងទ្វារ​តា​កាវ ក្រុង​អង្គរ បណ្តោះអាសន្ន ដើម្បី​ធ្វើ​ពិធីបើកការដ្ឋាន​ជួសជុល​

ដោយ​: អង្គរតូច /​សៀមរាបៈ ខ្លោងទ្វារ​តា​កាវ ជា​ខ្លោងទ្វារ​មួយ ក្នុងចំណោម​ខ្លោងទ្វារ​ទាំង​៥ នៃ​ក្រុង​អង្គរធំ ដែល​ស្ថិតនៅ​ទិស​ខាងលិច​នៃ​ប្រាសាទបាយ័ន​។ ដោយសារ​អាយុកាល អាកាសធាតុ សង្គ្រាម កង្វះ​ការថែទាំ និង​ការ​ដុះដាល នៃ​ដើមឈើ បណ្តាលឱ្យ​រូបចម្លាក់ បង្កាន់ដៃ​យក្ស និង​ទេវតា​ជាច្រើន ដួលរលំ ហើយក៏​បានធ្វើឱ្យ​រចនា​សម្ព័ន្ធ របស់​ខ្លោងទ្វារ មួយ​ភាគ​ធំ ពិសេស​រូប​ដំរី​ទាំង ៤ បាន​រង​នូវ​ការខូចខាត​ជាខ្លាំង ដែល​តម្រូវឱ្យ​មានការ​ជួសជុល ដើម្បី​សង្គ្រោះ​និង​អភិរក្ស​។​

​អាជ្ញាធរ​ជាតិ​អប្សរា បាន​ជម្រាប និង​ជូនដំណឹង ដល់​សាធារណជន​ទាំងអស់ ឱ្យបាន​ដឹងថាៈ នៅ​ថ្ងៃទី​២១ ខែកុម្ភៈ ឆ្នាំ​២០២១ ខាងមុខនេះ អាជ្ញាធរ​ជាតិ​អប្សរា នឹង​បិទ​ការចេញចូល នៅ​ខ្លោងទ្វារ​នោះ បណ្តោះអាសន្ន ដើម្បី​ប្រារព្ធ​ពិធីបើកការដ្ឋាន ជួសជុល​ប្រាសាទបុរាណ ដ៍​វ័យ​ចំណាស់ នេះ​ឡើងវិញ​។​

​លិខិត​ជូនដំណឹង បានបង្ហាញ​ថាៈ ការជួសជុល​នេះ ត្រូវបាន​សហការ ជាមួយ​វិស័យ​ឯកជន ដែល​ប្រារព្ធ​ឡើង ក្រោម​អធិបតីភាព ដ៏​ខ្ពង់ខ្ពស់​របស់ លោកស្រី កិត្តិ​សង្គហ​បណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួង​ទំនាក់ទំនង រដ្ឋសភា​-​ព្រឹទ្ធសភា និង​អធិការកិច្ច​។​

​លិខិត បានបញ្ជាក់​ថាៈ នៅ​ថ្ងៃទី​២១ ខែកុម្ភៈ ខាងមុខនេះ អ្នកជំនាញ ចាប់ផ្ដើម​ជួសជុល ខ្លោងទ្វារ​ប្រាសាទ​តា​កាវ​។ អាជ្ញាធរ សង្ឃឹមថា សាធារណជន​ទាំងអស់ នឹង​យោគយល់ ហើយ​ចូលរួម​សហការ បាន​យ៉ាង​ល្អប្រសើរ ដើម្បី​ភាពរលូន នៃ​ដំណើរការ​អភិរក្ស សម្បត្តិ​ដូនតា​ទាំងអស់គ្នា​៕/V​

ទីតាំងផ្សាយពាណិជ្ជកម្ម

- Advertisment -

Most Popular