Home ព័ត៌មានសំខាន់ៗ ការដ្ឋានធ្វើឲ...

ការដ្ឋានធ្វើឲ្យប្រសើរឡើង​ផ្លូវជាតិ​លេខ​២ និង​ផ្លូវជាតិ​លេខ​២២ សម្រេចបាន​ជាង​២៧​ភាគរយ​ហើយ​

ដោយៈ​បូព៌​ព្រឹក្ស​,​សុផល​/​ភ្នំពេញៈ​ការដ្ឋាន​ធ្វើឲ្យប្រសើរឡើងផ្លូវជាតិ​លេខ​២ និង​ផ្លូវជាតិ​លេខ​២២ គិត​ត្រឹម​ថ្ងៃទី​១៨ ខែកុម្ភៈម្សិលមិញសម្រេចបាន​២៧,១០%​ហើយ​។​លទ្ធផល​នេះ​ត្រូវបាន​បង្ហាញ​ក្នុង​ឱកាសលោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ​និង​ដឹកជញ្ជូន ដឹកនាំ​ក្រុមការងារ​បច្ចេកទេស​ក្រសួង​ចុះ​ពិនិត្យ​គុណភាព​នៃ​ការសាងសង់​ផ្លូវ​នៅព្រឹកនេះ។

នៅ​ព្រឹក​ថ្ងៃទី​១៩ ខែកុម្ភៈ​លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ដឹកនាំ​គណៈប្រតិភូ​ក្រសួង​អញ្ជើញ​ចុះ​ពិនិត្យ​គុណភាព​នៃ​ការសាងសង់​ផ្លូវជាតិ​លេខ​២ និង​ផ្លូវជាតិ​លេខ​២២(រូបថតក្រសួងសាធារណការ)

​ទំព័រ​ហ្វេ​ស​ប៊ុ​ក​ផ្លូវការ​របស់​ក្រសួង​សាធារណការ​បានបញ្ជាក់​ថា​នៅ​ព្រឹក​ថ្ងៃទី​១៩ ខែកុម្ភៈ​លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ដឹកនាំ​គណៈប្រតិភូ​ក្រសួង​អញ្ជើញ​ចុះ​ពិនិត្យ​គុណភាព​នៃ​ការសាងសង់​ផ្លូវជាតិ​លេខ​២ និង​ផ្លូវជាតិ​លេខ​២២ ដោយមាន​ការចូលរួម​ក្រុមការងារ​បច្ចេកទេស​ក្រសួង​តំណាង​ក្រុមហ៊ុន​សាងសង់​និង​ក្រុមហ៊ុន​ទីប្រឹក្សាបច្ចេកទេស និង​ភាគី ពាក់ព័ន្ធ​ផង​។

​ការចុះពិនិត្យ​នេះ​ធ្វើឡើង​ក្នុង​គោលបំណង​ពិនិត្យមើល​គុណភាព និង​វឌ្ឍនភាព​នៃ​ការសាងសង់​ថា​តើ ក្រុមហ៊ុន​សាងសង់ និង​ក្រុមហ៊ុន​ទីប្រឹក្សាបច្ចេកទេស​អនុវត្តតាម​បទដ្ឋាន​បច្ចេកទេស និង​សៀវភៅ​បន្ទុក ដែល​បានកំណត់​ដែរ​ឬ​យ៉ាងណា និង​លើសពីនេះ​ទៀត ដើម្បី​ស្វែងរក​ដំណោះស្រាយ និង​ផ្ដល់​អនុសាសន៍ បន្ថែម​ដល់​ភាគី​សាងសង់ ដែល​អាច​ធានា​ដល់​ការសាងសង់​ផ្លូវ​បាន​រឹងមាំ ប្រើប្រាស់​បានយូរ​អង្វែង​។

​គួររំលឹកថា​គម្រោង​ធ្វើឱ្យ​ប្រសើរ​ឡើងវិញ​កំណាត់​ផ្លូវជាតិ​លេខ​២ និង​ផ្លូវជាតិ​លេខ​២២​នេះ​បាន​បើក​ការដ្ឋាន​សាងសង់​នៅ​ថ្ងៃទី​១១ ខែកុម្ភៈ ឆ្នាំ​២០២០ ក្រោម​អធិបតី ភាព​ដ៏​ខ្ពង់ខ្ពស់​របស់​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​។​គម្រោង​ផ្លូវ​នេះ​មាន​ប្រវែង​សរុប ៧២,១៧ គីឡូម៉ែត្រ ។​ក្នុងនោះ​កំណាត់​ផ្លូវជាតិ​លេខ​២ ចាប់ពី​រង្វង់​មូល​តាខ្មៅ ដល់​អូរ​ចំបក់ មាន​ប្រវែង ៦២,៥៦ គីឡូម៉ែត្រ និង​ផ្លូវជាតិ​លេខ​២២ ពី​អូរ​ចំបក់ ដល់ អង្គតាសោម មាន​ប្រវែង ៩,៦១​គីឡូម៉ែត្រ ស្ថិតក្នុង​ភូមិសាស្ត្រ ខេត្តតាកែវ​។

នៅ​ព្រឹក​ថ្ងៃទី​១៩ ខែកុម្ភៈ​លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ដឹកនាំ​គណៈប្រតិភូ​ក្រសួង​អញ្ជើញ​ចុះ​ពិនិត្យ​គុណភាព​នៃ​ការសាងសង់​ផ្លូវជាតិ​លេខ​២ និង​ផ្លូវជាតិ​លេខ​២២(រូបថតក្រសួងសាធារណការ)

​ការស្ថាបនា​ផ្លូវជាតិ​ទាំងពីរ​ខ្សែ​ខាងលើ ចែកចេញជា​បី​ផ្នែក រួមមាន ផ្នែក​ទី​១- កំណាត់​ផ្លូវជាតិ​លេខ​២ ចាប់ពី​រង្វង់​មូល​តាខ្មៅ ដល់​ផ្លូវ​ប្រសព្វ​មហាវិថី សម្តេច​តេ​ជោ​ហ៊ុនសែន មាន​ប្រវែង ៤,៣៤​គីឡូម៉ែត្រ ដែល​នឹងត្រូវ​ពង្រីក​ទទឹង​តួ​ផ្លូវ​រហូតដល់ ២០​ម៉ែត្រ ដោយ​ក្រាល​បេតុង​កៅស៊ូ អា​សេ​(AC) ទទឹង ១៥​ម៉ែត្រ ចែកចេញជា​បួន​គន្លង (២​គន្លង​ទៅ ២​គន្លង​មក​) ខ័​ណ្ឌ​ដោយ​គំនូស​ចែក​ទ្រូងផ្លូវ​។ ចិញ្ចើមផ្លូវ​សង ខាង​ទទឹង ០,៥​ម៉ែត្រ ផ្លូវ​ថ្មើរជើង​សងខាង​ទទឹង ២,៥​ម៉ែត្រ ប្រព័ន្ធ​រំដោះ​ទឹក បំពាក់​ផ្លាកសញ្ញា​ចរាចរណ៍ គំនូស​ចរាចរណ៍ បង្គោលគីឡូម៉ែត្រ បង្គោល​សុវត្ថិភាព និង​អំពូល​អគ្គិសនី​បំភ្លឺ​ផ្លូវ នៅតាម​ទីប្រជុំជន​។​

​ផ្នែក​ទី​២- កំណាត់​ផ្លូវជាតិ​លេខ​២ ចាប់ពី​ផ្លូវ​ប្រសព្វ​មហាវិថី សម្តេច​តេ​ជោ​ហ៊ុនសែន ដល់​រង្វង់​មូល​កួរស្រូវ ប្រវែង ៤,៤១​គីឡូម៉ែត្រ ត្រូវ​ពង្រីក​ទទឹង​តួ​ផ្លូវ​រហូតដល់ ២០,៥០​ម៉ែត្រ ក្រាល​បេតុង​កៅស៊ូ AC ទទឹង ២០,៥០​ម៉ែត្រ មាន​បួន​គន្លង (២​គន្លង​ទៅ ២​គន្លង​មក​) រួមមាន គន្លង​ផ្លូវ​ធ្វើ​ចរាចរណ៍​សម្រាប់​រថ​យន្ដ ទទឹង​សរុប ១៤​ម៉ែត្រ និង​ម៉ូតូ​ទទឹង​សរុប ៥​ម៉ែត្រ ខ័​ណ្ឌ​ដោយ​របាំង​ថ្ម​ពុះ​ចែក​ទ្រូងផ្លូវ បំពាក់​ផ្លាកសញ្ញា​ច​រា ចរណ៍ គំនូស​ចរាចរណ៍ បង្គោលគីឡូម៉ែត្រ បង្គោល​សុវត្ថិភាព និង​អំពូល​អគ្គិសនី​បំភ្លឺ​ផ្លូវ នៅតាម​ទីប្រជុំ ជន​។​

​ផ្នែក​ទី​៣- កំណាត់​ផ្លូវជាតិ​លេខ​២ និង​ផ្លូវជាតិ​លេខ​២២ ចាប់ពី​រង្វង់​មូល​កួរស្រូវ ដល់​ផ្លូវបំបែក​ផ្លូវជាតិ លេខ​៣ (​អង្គតាសោម​) ប្រវែង ៦៣,៤២​គីឡូម៉ែត្រ ត្រូវ​ពង្រីក​ទទឹងផ្លូវ​រហូត​ដល់ ១៣​ម៉ែត្រ ដោយ​ក្រាល បេតុង​កៅស៊ូ AC ទទឹង ១៣​ម៉ែត្រ ចែកចេញជា​ពីរ​គន្លង (១​គន្លង​ទៅ ១​គន្លង​មក​) ក្នុងនោះ​រួមមាន គន្លង​ផ្លូវ​ធ្វើ​ចរាចរណ៍​សម្រាប់​រថ​យន្ដ​ទទឹង​សរុប ៧​ម៉ែត្រ និង​ម៉ូតូ​ទទឹង​សរុប ៦​ម៉ែត្រ ខ័​ណ្ឌ​ដោយ គំនូស​ចែក​ទ្រូងផ្លូវ សាងសង់​ប្រព័ន្ធ​រំដោះ​ទឹក​នៅតាម​ទីប្រជុំជន បំពាក់​ផ្លាកសញ្ញា​ចរាចរណ៍ គំនូស ចរាចរណ៍ បង្គោលគីឡូម៉ែត្រ បង្គោល សុវត្ថិភាព និង​អំពូល​អគ្គិសនី​បំភ្លឺ​ផ្លូវ នៅតាម​ទីប្រជុំជន​។​

នៅ​ព្រឹក​ថ្ងៃទី​១៩ ខែកុម្ភៈ​លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ដឹកនាំ​គណៈប្រតិភូ​ក្រសួង​អញ្ជើញ​ចុះ​ពិនិត្យ​គុណភាព​នៃ​ការសាងសង់​ផ្លូវជាតិ​លេខ​២ និង​ផ្លូវជាតិ​លេខ​២២(រូបថតក្រសួងសាធារណការ)

​គម្រោង​ធ្វើឱ្យ​ប្រសើរ​ឡើងវិញ​នេះ​គ្រោង​ចំណាយ​ថវិកា ៥៦,១​លាន​ដុល្លា​អាម៉េរិក ដែលជា​ហិរញ្ញប្បទាន​ពី​រដ្ឋាភិបាល​នៃ​សាធារណរដ្ឋ កូរ៉េខាងត្បូង និង​ថវិកាបដិភាគ​របស់​រា​ជ​រដ្ឋាភិបាល​កម្ពុជា​។ គម្រោង​នេះ សាងសង់​ដោយ​យ​ក្រុមហ៊ុន Hasan Engineering & Constructions Co., Ltd និង​ត្រួតពិនិត្យ​បច្ចេកទេស​សាងសង់​ដោយ​សម្ព័ន្ធ​ក្រុមហ៊ុន Dasan Constructions Co., Ltd, Dong II Engineering Consultants Co., Ltd និង Seoyoung Engineering Co., Ltd Join Venture ប្រើប្រាស់​រយៈពេល​៣០​ខែ គឺ​ពី​ខែតុលា ឆ្នាំ​២០១៩ ដល់​ខែមេសា ឆ្នាំ​២០២២​។​

​ថ្លែង​ទៅកាន់​តំណាង​ក្រុមហ៊ុន​សាងសង់​ក៏ដូចជា​តំណាង​ក្រុមហ៊ុន​ទីប្រឹក្សាបច្ចេកទេស​ក្នុងអំឡុងពេល​នៃ​ការចុះពិនិត្យ​នេះ លោក​ទេសរដ្ឋមន្ត្រី បាន​គូសបញ្ជាក់ថា ក្រសួង​អាច​ចរចា​រយៈពេល​នៃ​ការសាងសង់​បាន ប៉ុន្តែ​ក្រុមហ៊ុន​ត្រូវគោរព​និង​អនុវត្តតាម​បទដ្ឋាន​បច្ចេកទេស​ឲ្យ​បានជា​ដាច់ខាត​ដើម្បី​ធានា​គុណភាព​រឹងមាំ​របស់​ផ្លូវ និង​អាច​ប្រើប្រាស់​បានយូរ​អង្វែង កាត់បន្ថយ​ការ​ខ្ជះខ្ជាយ​ថវិកាជាតិ និង​ចំណេញ​ពេលវេលា​ផង​៕​សរន​

នៅ​ព្រឹក​ថ្ងៃទី​១៩ ខែកុម្ភៈ​លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ដឹកនាំ​គណៈប្រតិភូ​ក្រសួង​អញ្ជើញ​ចុះ​ពិនិត្យ​គុណភាព​នៃ​ការសាងសង់​ផ្លូវជាតិ​លេខ​២ និង​ផ្លូវជាតិ​លេខ​២២(រូបថតក្រសួងសាធារណការ)

ទីតាំងផ្សាយពាណិជ្ជកម្ម

- Advertisment -

Most Popular