រាជរដ្ឋាភិបាល​ដាក់ចេញ​ឱ្យ​អនុវត្ត​គោលនយោបាយ​ស្តីពី​ការគ្រប់គ្រង​សំរាម សំណល់​រឹង ទីប្រជុំជន ឆ្នាំ​២០២០-២០៣០

​ដោយ​៖​ដេប៉ូ-រ៉ាម៉ន​/​ភ្នំពេញ​៖រាជរដ្ឋាភិបាល​កម្ពុជា​បានដាក់​ចេញ​ឱ្យ​អនុវត្ត​នូវ​«​គោលនយោបាយ​ស្តីពី​ការគ្រប់គ្រង​សំរាម សំណល់​រឹង​ទីប្រជុំជន ឆ្នាំ​២០២០-២០៣០»​។

​ពាក់ព័ន្ធ​ក្នុង​រឿងនេះ​សម្តេច តេ​ជោ ហ៊ុន សែន នាយករដ្ឋមន្ត្រី កម្ពុជា មានប្រសាសន៍ថា ការដាក់ចេញ​ឱ្យ​អនុវត្ត​គោលនយោបាយ​នេះ គឺជា​ផ្នែក​មួយ​នៃ​ការអនុវត្ត​យុទ្ធសាស្ត្រ ចតុកោណ​ដំណាក់កាល​ទី​៤ នៅក្នុង​មុំ​ទី​៤ «​ការធានា​ចីរភាព​បរិស្ថាន និង​ការ​រៀបចំខ្លួន ឆ្លើយតប​នឹង​ការប្រែប្រួល​អាកាសធាតុ​» នៃ​ចតុកោណ​ទី​៤ «​ការអភិវឌ្ឍ​ប្រកបដោយ​ចីរភាព និង​បរិ​យា​ប័ន្ន​»​។

​សម្តេច​តេ​ជោ​បានបញ្ជាក់​បន្ថែមថា រាជរដ្ឋាភិបាល​មាន​ភាពចាំបាច់​ត្រូវដាក់​ចេញ​ឱ្យ​អនុវត្ត នូវ​«​គោលនយោបាយ​ស្តីពី​ការគ្រប់គ្រង​សំរាម សំណល់​រឹង​ទីប្រជុំជន ឆ្នាំ​២០២០-២០៣០» ដែលមាន​ចក្ខុវិស័យ​ដូចជា​«​រួមចំណែក​ធ្វើឱ្យ​ព្រះរាជាណាចក្រ​កម្ពុជា​កាន់​តែមាន​បរិស្ថាន​ស្អាត ការរស់នៅ​ប្រកបដោយ​ផាសុខភាព សុខុមាលភាព និង​សោភ័ណភាព​ទាក់ទាញ សមស្រប​នឹង​កំណើន​នៃ​នគរូបនីយកម្ម និង​ការអភិវឌ្ឍ​សេដ្ឋកិច្ច​ឆាប់រហ័ស​» និង​មាន​គោល បំណង​«​រៀបចំ​បង្កើត និង​ដាក់ឱ្យអនុវត្ត​ប្រព័ន្ធគ្រប់គ្រង​សំរាម សំណល់​រឹង​ទីប្រជុំជន មាន​លក្ខណៈ​ទំនើប គ្រប់​ជ្រុងជ្រោយ ដោយ​គិតគូរ​ពី​ប្រសិទ្ធភាព​សេដ្ឋកិច្ច​លទ្ធភាព​ធនធាន ហិរញ្ញវត្ថុ និរន្តរភាព​បរិស្ថាន និង​ទិដ្ឋភាព​សង្គម​»​។​

​សម្តេច តេ​ជោ ហ៊ុន សែន បានលើកឡើង​បន្ថែមថា ការដែល​បង្កើតបាន​នូវ​ប្រព័ន្ធគ្រប់គ្រង សំរាម សំណល់​រឹង​ទីប្រជុំជន​ប្រកបដោយ​ប្រសិទ្ធភាព និង​ភាព​គ្រប់​ជ្រុងជ្រោយ គឺ​នៅ​មិន ទាន់​មាន​ភាព​គ្រប់គ្រាន់​នៅឡើយ​ទេ សម្រាប់​បុព្វហេតុ​នៃ​កិច្ច​គាំពារ​បរិស្ថាន​និង​ការអភិវឌ្ឍ ដោយ​ចីរភាព និង​បរិ​យា​ប័ន្ន​ប៉ុន្តែ​ចាំបាច់​ត្រូវមាន​ការចូលរួម​យ៉ាង​សកម្ម​ប្រកបដោយ ស្មារតី​ភ្ញាក់រលឹក និង​ការទទួលខុសត្រូវ​ខ្ពស់ ការផ្លាស់ប្តូរ​ឥរិយាបថ ទម្លាប់​របៀបរបប រស់នៅ របៀបរបប​នៃ​ការធ្វើ​អាជីវកម្ម​-​ផលិតកម្ម​ព្រមទាំង​ការយល់ដឹង​របស់​គ្រប់​តួអង្គ និង​ភាគី​ពាក់ព័ន្ធ​ទាំងអស់ ដែលជា​អ្នកបង្កើត​សំរាម សំណល់​រឹង​ទីប្រជុំជន​ដោយ​ត្រូវ អនុវត្ត​គោលការណ៍​សកល ៣ អ៊ែ (3Rs): កាត់បន្ថយ​(Reduce) ប្រើប្រាស់​ឡើងវិញ​(Reuse) និង​កែច្នៃ (Recycle) ហើយ​ត្រូវ​ចាត់ទុកថា​«​សំណល់​ជា​ធនធាន​» រីឯ «​អ្នកបង្កើត​សំរាម មាន​កាតព្វកិច្ច​បង់ថ្លៃ​សេវា​»​។​

​ជាមួយគ្នានេះ​សម្តេច​តេ​ជោ បាន​ណែនាំ​ផងដែរ​ឱ្យ​ក្រសួង​-​ស្ថាប័ន​ទាំងអស់​របស់​រាជ​រដ្ឋា ភិ​បាល ប្រកាន់ខ្ជាប់​នូវ​អភិក្រម​ការងារ​ប្រកបដោយ​បុ​រេ​សកម្ម និង​សកម្ម​ក្នុង​ស្មារតី​ទទួល ខុសត្រូវ​ខ្ពស់ ដើម្បី​ធានា​នូវ​ភាពជោគជ័យ​នៃ​ការអនុវត្ត​គោលនយោបាយ​នេះ​។ រាជ​រដ្ឋា ភិ​បាល​នឹង​ផ្តល់​ការលើកទឹកចិត្ត ដល់​ភាគី​បាក់​ព័ន្ធ​ដែល​នឹង​រួមចំណែក​ដោះស្រាយ​បញ្ហា ប្រឈម​ដែល​ពាក់ព័ន្ធ​នឹង​សំរាម សំណល់​រឹង​ទីប្រជុំ​ជននេះ​។ សម្តេច​តេ​ជោ ហ៊ុន សែន បាន​សំណូមពរ​ឱ្យ​ប្រជាពលរដ្ឋ​គ្រប់រូប ដៃគូ​អភិវឌ្ឍន៍ និង​តួអង្គ​ពាក់ព័ន្ធ​ទាំងអស់​សកម្ម ចូល​រូ​ម​អនុវត្ត​គោលនយោបាយ​នេះ និង​ប្រកាន់ខ្ជាប់​នូវ​កាតព្វកិច្ច ជា​ពលរដ្ឋ​ល្អ​ក្នុងការ ចូលរួមចំណែក​ថែរក្សា អភិរក្ស​បរិស្ថាន ក្រោម​ពាក្យស្លោក «​កម្ពុជា​ស្អាត​ផ្តើមចេញពី យើង​ម្នាក់ៗ​» ដែលជា​បុ​រេ​លក្ខខណ្ឌ​កំណត់​ភាពជោគជ័យ​នៃ​សមរភូមិ​កែទម្រង់ និង​ការដ្ឋាន​ការងារ​ថ្មី​មួយ​នេះ​៕​/PC

ទីតាំងផ្សាយពាណិជ្ជកម្ម

- Advertisment -

Most Popular