Home ព័ត៌មានសំខាន់ៗ ​សម្តេច​វិបុល...

​សម្តេច​វិបុល​សេនា​ភក្តី សាយ ឈុំ ទទួល​ជួប​ឯកអគ្គរដ្ឋទូត នៃ​សាធារណរដ្ឋ​ហ្វីលីពីន​ថ្មី​

​ដោយៈ សុផល / ភ្នំពេញៈ សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា នៃ​ព្រះរាជាណាចក្រ​កម្ពុជា នា​ព្រឹក​ទី​១៩ ខែកុម្ភៈ ឆ្នាំ​២០២១ បានអនុញ្ញាត​ឱ្យ លោកស្រី ម៉ា​រៀ អ៊ែ​មើ​លី​តា ស៊ី​.​អាគី​ណូ (Maria Amelita C. Aquino) ឯកអគ្គរដ្ឋទូត​វិសាមញ្ញ និង​ពេញ​សមត្ថភាព នៃ​សាធារណរដ្ឋ​ហ្វីលីពីន​ថ្មី ប្រចាំ​ព្រះរាជាណាចក្រ​កម្ពុជា ចូលជួប​ធ្វើ​សវនាការ និង​សម្តែង​ការគួរសម នៅ​វិមាន​ព្រឹទ្ធសភា​។​

​ក្នុងនាម​ព្រឹទ្ធសភា នៃ​ព្រះរាជាណាចក្រ​កម្ពុជា និង​ក្នុងនាម​សម្តេច​ផ្ទាល់ សម្តេច​វិបុល​សេនា​ភក្តី សាយ ឈុំ បាន​សម្តែង​នូវ​ការអបអរសាទរ ជូន​ចំពោះ​លោកជំទាវ ម៉ា​រៀ អ៊ែ​មើ​លី​តា ស៊ី​. អាគី​ណូ ដែល​ត្រូវបាន​រដ្ឋាភិបាល នៃ​សាធារណរដ្ឋ​ហ្វីលីពីន តែងតាំង​ជា ឯកអគ្គរដ្ឋទូត​វិសាមញ្ញ និង​ពេញ​សមត្ថភាព នៃ​សាធារណរដ្ឋ​ហ្វីលីពីន ប្រចាំ​ព្រះរាជាណាចក្រ​កម្ពុជា​។​

​សម្តេច​វិបុល​សេនា​ភក្តី មាន​ជំនឿ​ជឿជាក់ថា ក្នុង​អាណត្តិ​បេសកកម្ម​ការទូត របស់លោក​ស្រី ឯកអគ្គរដ្ឋទូត នឹង​បន្ត​ខិតខំ​លើកកម្ពស់ ទំនាក់ទំនង និង​កិច្ចសហប្រតិបត្តិការ លើ​គ្រប់​វិស័យ រវាង​ព្រះរាជាណាចក្រ​កម្ពុជា និង​សាធារណរដ្ឋ​ហ្វីលីពីន ឱ្យ​កាន់តែ​ល្អប្រសើរ បន្ថែមទៀត ដើម្បី​ជា​គុណប្រយោជន៍ ដ៏​សំខាន់ សម្រាប់​ប្រជាជន​នៃ ប្រទេស​ទាំងពីរ ទាំង​ពេលបច្ចុប្បន្ន និង​ក្នុង​ពេលអនាគត​។​

​ក្នុងឱកាស​នោះ លោកស្រី ម៉ា​រៀ អ៊ែ​មើ​លី​តា ស៊ី​. អាគី​ណូ បាន​ថ្លែងអំណរគុណ យ៉ាង​ជ្រាលជ្រៅ ចំពោះ​សម្តេច​ប្រធានព្រឹទ្ធសភា ដែល​បានអនុញ្ញាត ឱ្យ​ចូលជួប​សម្តែង​ការគួរសម នាពេលនេះ​។ លោកស្រី ឯកអគ្គរដ្ឋទូត បាន​សន្យាថា ក្នុង​អាណត្តិ​បេសកកម្ម​ការទូត របស់លោក​ស្រី នៅ​ព្រះរាជាណាចក្រ​កម្ពុជា លោកស្រី នឹង​ខិតខំ​ប្រឹងប្រែង​បន្ត​ពង្រឹងពង្រីក ទំនាក់ទំនង និង​កិច្ចសហប្រតិបត្តិការ រវាង​ប្រទេស​ទាំងពីរ ជាពិសេស លើ​វិស័យ​ពាណិជ្ជកម្ម សេដ្ឋកិច្ច និង​វិស័យ​វិនិយោគ ដើម្បី​ជា​ផលប្រយោជន៍ សម្រាប់​ប្រទេស​ទាំងពីរ ឱ្យ​កាន់តែ​ប្រសើរ ឡើង​ថែមទៀត​។​

​លោកស្រី ឯកអគ្គរដ្ឋទូត បាន​ជម្រាបជូន​សម្តេច​ប្រធានព្រឹទ្ធសភា ជ្រាបថា ក្នុង​បេសកកម្ម​ការទូត របស់លោក​ស្រី គឺ​ផ្តោត​សំខាន់​លើ​ការជួយ​ជំរុញ ឱ្យមាន​ទំនាក់ទំនង និង​កិច្ចសហប្រតិបត្តិការ​ល្អ រវាង​ប្រជាជន នៃ​ប្រទេស​ទាំងពីរ ពីព្រោះ ចាប់តាំងពី​ការចាប់ផ្តើម នៃ​ទំនាក់​ទង​ការទូត នៃ​ប្រទេស​ទាំងពីរ ទំនាក់ទំនង​ទៅវិញទៅមក រវាង​ប្រជាជន នៃ​ប្រទេស​ទាំងពីរ មាន​តាំងពី​យូរលង់​ណាស់​មក​។​

​លោកស្រី ឯកអគ្គរដ្ឋទូត បាន​សន្យាថា នឹង​ខិតខំ​ចូលរួមចំណែក ក្នុងការ​អភិវឌ្ឍ​ធនធានមនុស្ស នៅ​ព្រះរាជាណាចក្រ​កម្ពុជា ពីព្រោះ កត្តា​ធនធានមនុស្ស មាន​សារសំខាន់​ណាស់ សម្រាប់​ជួយ​អភិវឌ្ឍន៍ ប្រទេស​កម្ពុជា ឱ្យមាន​ការរីកចម្រើន​។ ក្រៅពីនេះ ប្រទេស​ហ្វីលីពីន បានផ្តល់​អាហារ​រូបករណ៍ ដល់​និស្សិត​កម្ពុជា ទៅ​សិក្សា​វិស័យ​វិទ្យាសាស្ត្រ និង​វិស័យ​ផ្សេងៗ​ទៀត នៅ​ប្រទេស​ហ្វីលីពីន​។ លោកស្រី ក៏បាន​សន្យា​ផងដែរ​ថា នឹង​ខិតខំ​ប្រឹងប្រែង ស្វែងរក​អាហារូបករណ៍ បន្ថែមទៀត សម្រាប់​និស្សិត​កម្ពុជា ព្រមទាំង​សហការ រៀបចំ​វគ្គ​បណ្តុះបណ្តាល តាមរយៈ​ស្ថាប័ន​អប់រំ នៅ​ព្រះរាជាណាចក្រ​កម្ពុជា​។​

​លោកស្រី ឯកអគ្គរដ្ឋទូត បាន​គួសបញ្ជាក់ អំពី​ទំនាក់ទំនង អន្តរ​សភា ជាពិសេស​សភា នៃ​ប្រទេស​ទាំងពីរ តែងមាន​ការផ្លាស់ប្តូរ គណៈប្រតិភូ គ្នា​ទៅវិញទៅមក​។ នាពេលខាងមុខ ប្រទេស​កម្ពុជា នឹង​ធ្វើជា​ម្ចាស់ផ្ទះ​រៀបចំ កិច្ចប្រជុំ​ភាពជា​ដៃគូ​សភា​អាស៊ី​-​អឺរ៉ុប (ASEP) លើក​ទី​១១ នៅ​ឆ្នាំ​២០២១ និង​មហាសន្និបាត អន្តរ​សភា​អាស៊ាន (AIPA) លើក​ទី​៤៣ នៅ​ឆ្នាំ​២០២២ ព្រមទាំង​ការរៀបចំ ការប្រកួត​កីឡា​ស៊ី​ហ្គេម នៅ​ឆ្នាំ​២០២៣​។ លោកស្រី សូម​គាំទ្រ និង​អញ្ជើញ​ភាគី ហ្វីលីពីន ចូលរួម​ក្នុង​ព្រឹ​តិ្ត​ការណ៍​សំខាន់ៗ ទាំងអស់នេះ​ផងដែរ​។​

​លោកស្រី ឯកអគ្គរដ្ឋទូត បានបញ្ជាក់​ថាៈ នៅ​ឆ្នាំ​២០២២ ខាងមុខនេះ គឺជា​ខួប​លើក​ទី​៦០ នៃ​ទំនាក់ទំនង​ការទូត នៃ​ប្រទេស​ហ្វីលីពីន​-​កម្ពុជា​។ លោកស្រី បាន​ត្រៀមខ្លួន​ជាស្រេច ដើម្បី​សហការ ជាមួយនឹង​ភាគី​ពាក់ព័ន្ធ ក្នុងការ​រៀបចំ ពិធី​អបអរសាទរ​ខួប លើក​ទី​៦០ នៃ​ទំនាក់ទំនង​ការទូត នៃ​ប្រទេស​ទាំងពីរ ឱ្យបាន​កាន់តែ អធិកអធម​។ ជាមួយគ្នានេះ លោកស្រី ឯកអគ្គរដ្ឋទូត បាន​ថ្លែងអំណរគុណ ចំពោះ​រាជរដ្ឋាភិបាល​កម្ពុជា ដែល​បាន​ជួយ​ប្រជាជន ហ្វីលីពីន ដែល​កំពុង​ស្នាក់ នៅ​ប្រទេស​កម្ពុជា ដែល​បាន​បង្កើត​សភាពាណិជ្ជកម្ម កាលពីពេល​ថ្មីៗ​នេះ ហើយ​បន្ទាប់ពី​ជំងឺ​កូ​វីដ​១៩ នេះ ផុតរលត់​ទៅ សភាពាណិជ្ជកម្ម​នេះ នឹង​ខិតខំ​ពង្រឹងពង្រីក ទំនាក់ទំនង និង​កិច្ចសហប្រតិបត្តិការ ក្នុងការ​លើកកម្ពស់ ទំនាក់ទំនង​សេដ្ឋកិច្ច រវាង​ប្រទេស​ទាំងពីរ​។​

​សម្តេច​វិបុល​សេនា​ភក្តី សាយ ឈុំ បាន​សម្តែង​នូវ សេចក្តី​ពេញចិត្ត និង​វាយតម្លៃ​ខ្ពស់ ចំពោះ​ទំនាក់ទំនង​មិត្តភាព និង​កិច្ចសហប្រតិបត្តិការ រវាង​ប្រជាជន និង​ប្រទេស​ទាំងពីរ ដែលមាន​ការរីកចម្រើន ឥតឈប់ឈរ​។ ការរីកចម្រើន និង​ទំនាក់ទំនង​ដ៏​ល្អ​នេះ ស្តែងឡើង តាមរយៈ​ការផ្លាស់ប្តូរ ដំណើរ​ទស្សនកិច្ច របស់​ថ្នាក់ដឹកនាំ​កំពូល ថ្នាក់ដឹកនាំ​ជាន់ខ្ពស់ និង​ថ្នាក់ដឹកនាំ​តាម​ក្រសួង ស្ថាប័ន​នានា នៃ​ប្រទេស​ទាំងពីរ​។​

​សម្តេច​វិបុល​សេនា​ភក្តី បាន​ថ្លែងអំណរគុណ ដល់​រដ្ឋាភិបាល​ហ្វីលីពីន ចំពោះ​ការផ្តល់​អាហារូបករណ៍ ដល់​និស្សិត និង​មន្ត្រីរាជការ​កម្ពុជា ឱ្យបាន​ទៅ​សិក្សា ថ្នាក់​ឧ​ត្ត​មសិ​ក្សា និង​ក្រោយ​ឧ​ត្ត​មសិ​ក្សា នៅតាម​សកល​វិទ្យាល័យ​នានា នៅ​ប្រទេស​ហ្វីលីពីន​។ សម្តេច ក៏បាន​សម្តែង​នូវ​ស​ចេ​ក្តី​រីករាយ ចំពោះ​ការបង្កើត សភាពាណិជ្ជកម្ម ហ្វីលីពីន នៅ​ព្រះរាជាណាចក្រ​កម្ពុជា កាលពីពេល​ថ្មីៗ កន្លងទៅនេះ​។ សម្តេច​សង្ឃឹមថា បន្ទាប់ពី​បញ្ចប់​ជំងឺ​កូ​វីដ ១៩ យន្តការ​នេះ នឹង​បន្ត​ដំណើរការ ដែល​នឹង​ជួយ​ជំរុញ និង​លើកកម្ពស់​បន្ថែមទៀត ដល់​វិស័យសេដ្ឋកិច្ច និង​ពាណិជ្ជកម្ម រវាង​ប្រ​ទស​ទាំងពីរ​។​

​ជាមួយគ្នានេះ សម្តេច​ប្រធានព្រឹទ្ធសភា ក៏បាន​ស្នើ​ដល់​លោកស្រី ឯកអគ្គរដ្ឋទូត ជួយ​ចលនា និង​លើកទឹកចិត្ត​អ្នកទេសចរ និង​អ្នក​វិនិយោគិន ហ្វីលីពីន មក​បណ្តាក់​ទុនវិនិយោគ នៅ​ប្រទេស​កម្ពុជា និង​ជួយ​ជំរុញ​ការផ្លាស់ប្តូរ ពាណិជ្ជកម្ម រវាង​ប្រទេស​ទាំងពីរ បន្ថែមទៀត ដើម្បី​ជា​គុណប្រយោជន៍ សម្រាប់​ប្រជាជន និង​ប្រទេស​ទាំងពីរ​។​

​សម្តេច​វិបុល​សេនា​ភក្តី បាន​ថ្លែងអំណរគុណ ដល់​ស្ថានទូត​ហ្វីលីពីន ប្រចាំ​ព្រះរាជាណាចក្រ​កម្ពុជា ដែល​បាន​ជួយ​រួមចំណែក លើកកម្ពស់​ការអភិវឌ្ឍ ធនធានមនុស្ស នៃ​អគ្គលេខាធិការដ្ឋាន​ព្រឹទ្ធសភា តាមរយៈ​ការផ្តល់​គ្រូបង្រៀន បណ្តុះបណ្តាល ភាសា​អង់គ្លេស ដល់​មន្ត្រី នៃ​អគ្គលេខាធិការដ្ឋាន​ព្រឹទ្ធសភា ក្នុងពេល​កន្លងទៅនេះ​។ សម្តេច​សង្ឃឹមថា​ស្ថានទូត​ហ្វីលីពីន​នឹង​បន្ត​គាំទ្រ​លើ​ការបណ្តុះបណ្តាល​ពង្រឹងសមត្ថភាព​ភាសា​អង់គ្លេស និង​ជំនាញ​នានាៗ ដល់​មន្ត្រី​នៃ​អគ្គលេខាធិការដ្ឋាន​ព្រឹទ្ធសភា​នាពេលខាងមុខ​បន្ថែមទៀត​។

​សម្តេច​វិបុល​សេនា​ភក្តី​បាន​គូសបញ្ជាក់ថា សភា​កម្ពុជា​នឹងធ្វើ​ជា​ម្ចាស់ផ្ទះ​រៀបចំ​កិច្ចប្រជុំ​ភាពជា​ដៃគូ​សភា​អាស៊ី​-​អឺរ៉ុប (ASEP) លើក​ទី​១១ នា​ខែតុលា ឆ្នាំ​២០២១ និង​មហាសន្និបាត​អន្តរ​សភា​អាស៊ាន (AIPA) លើក​ទី​៤៣ នៅ​ឆ្នាំ​២០២២​។ ជាមួយគ្នានេះ សម្តេច​ប្រធានព្រឹទ្ធសភា បាន​ស្នើសុំ​ការគាំទ្រ និង​អញ្ជើញ​សភា​ហ្វីលីពីន ចូលរួម​ក្នុង​កិច្ចប្រជុំ​ទាំងអស់នេះ​។ តាមរយៈ​លោកស្រី ឯកអគ្គរដ្ឋទូត សម្តេច​ប្រធានព្រឹទ្ធសភា បាន​ផ្តាំផ្ញើ​នូវ​ការសួរសុខទុក្ខ ដោយ​សេចក្តី​គោរព​រាប់អាន ដ៏​ខ្ពង់ខ្ពស់​ជូន​ចំពោះ ឯកឧត្តម​ប្រធានព្រឹទ្ធសភា នៃ​សាធារណរដ្ឋ​ហ្វីលីពីន​។​

​ក្នុងនាម​ព្រឹទ្ធសភា និង​ក្នុងនាម​សម្តេច​ផ្ទាល់ សម្តេច​ប្រធានព្រឹទ្ធសភា បាន​ត្រៀមខ្លួន នឹងធ្វើ​កិច្ចសហប្រតិបត្តិការ​ល្អ ជាមួយនឹង​លោកស្រី ឯកអគ្គរដ្ឋទូត និង​ស្ថានទូត​ហ្វីលីពីន ប្រចាំ​ព្រះ​រា​ណា​ចក្រ​កម្ពុជា​។ សម្តេច​ប្រធានព្រឹទ្ធសភា បាន​ប្រសិទ្ធពរ​ជូន លោកស្រី ឯកអគ្គរដ្ឋទូត សូម​មាន​សុខ​ភាពល្អ និង​ទទួលបាន​ជោគជ័យ ក្នុង​បេសកកម្ម​ការទូត​ដ៏​ឧត្តុង្គឧត្តម​នេះ ក្នុង​ព្រះរាជាណាចក្រ​កម្ពុជា​៕/V​.mara

ទីតាំងផ្សាយពាណិជ្ជកម្ម

- Advertisment -

Most Popular