Home ព័ត៌មានសំខាន់ៗ ព្យុះ​ទី​១ សម...

ព្យុះ​ទី​១ សម្រាប់​ឆ្នាំ​២០២១ ចាប់ផ្តើម​ចូល​សមុទ្រ​ចិន​ខាងត្បូង​

ដោយៈ ប​.​ខុន / ភ្នំពេញៈ វិ​សម្ពាធ ធី​ឌី (TD) នៅក្នុង​សមុទ្រ​ប៉ាស៊ីហ្វិក ខាងកើត ប្រទេស ហ្វីលីពីន បាន​វិ​វត្ត​ទៅជា​ព្យុះ​ទី​១ មានឈ្មោះ ឌូ​ចៀន (DUJUAN) សម្រាប់​ឆ្នាំ​២០២១ ដោយមាន​ដំណើរ​កាត់​ប្រទេស​ហ្វីលីពីន ចូលមកក្នុង​សមុទ្រ​ចិន​ខាងត្បូង នៅ​ដើម​សប្តាហ៍ ក្រោយនេះ តែ​មិនទាន់​ឃើញ​មាន​សញ្ញាណ ឥទ្ធិពល​អ្វី​មកលើ​ប្រទេស​កម្ពុជា នៅឡើយ​ទេ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២០ ខែកុម្ភៈ ឆ្នាំ​២០២១​ថាៈ វិ​សម្ពាធ ធី​ឌី (TD ) នៅក្នុង​សមុទ្រ​ប៉ាស៊ីហ្វិក ខាងកើត​ប្រទេស​ហ្វីលីពីន ច្រើន​ថ្ងៃ​មកហើយ​បាន​វិ​វត្ត​ទៅជា ព្យុះ​ទី​១ មានឈ្មោះ ឌូ​ចៀន (DUJUAN) សម្រាប់​ឆ្នាំ ២០២១ ដោយមាន​ដំណើរ​កាត់ ប្រទេស​ហ្វីលីពីន ចូលមកក្នុង​សមុទ្រ​ចិន​ខាងត្បូង​។​

​អ្នកនាំពាក្យ​ក្រសួង​ជំនាញ ខាងលើ បាន​និយាយ​ឱ្យដឹងទៀតថាៈ ព្យុះ​នេះ ស្ថិតនៅលើ ប្រទេស​ហ្វីលីពីន រហូតដល់​ថ្ងៃ​ច័ន្ទ​ទី ២២ ខែកុម្ភៈ ទើប​ឆ្លង​ចូល ក្នុង​សមុទ្រ​ចិន ខាងត្បូង ដោយមាន​ដំណើរ​ឡើងទៅ​លើ (​ទិស​ខាងជើង​) ហើយ​ថយឥទ្ធិពល ទៅជា​វិ​សម្ពាធ​វិញ នៅក្នុង​សមុទ្រ​ចិន​ខាងត្បូង ដោយ​បង្កឱ្យមាន ភ្លៀង ធ្លាក់​ច្រើន នៅលើ​ប្រទេស​ហ្វីលីពីន​។​

​លោក ចាន់ យុ​ត្ថា បានបញ្ជាក់​ថាៈ ព្យុះ​ទី​១​នេះ នៅ​ចំពោះមុខ មិនទាន់​ឃើញ​មាន​ឥទ្ធិពល​អ្វី មកលើ​ប្រទេស​កម្ពុជា នៅឡើយ​ទេ​មន្ត្រី​ជំនាញ​របស់​ក្រសួង កំពុងធ្វើការ​តាមដាន យ៉ាង​យកចិត្តទុកដាក់ បើ​មាន​អ្វី​ប៉ះពាល់ ដល់​ប្រទេស​កម្ពុជា ពី​ព្យុះ​នេះ ក្រសួង នឹងធ្វើ​ការជូនដំណឹង នៅពេល​បន្ទាប់​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular