កម្ពុជា​បន្ត​បញ្ជូន​កង​យោធា​មួក​ខៀវ​ទៅ​តំបន់​បេសកកម្ម អ​.​ស​.​ប នៅ​សាធារណរដ្ឋ​អាហ្វ្រិក កណ្តាល​

ដោយៈ​យោធិន​/ភ្នំពេញៈ កាលពី​រាត្រី​ថ្ងៃទី​១៩ ខែកុម្ភៈ ឆ្នាំ​២០២១​កង​យោធា​មួក​ខៀវ កម្ពុជា​នៃ​កងឯកភាព​កងអនុសេនាធំ​វិស្វកម្ម​សំណង់​លេខ​៥៧៦​ដែលមាន​កម្លាំង​សរុប ចំនួន​២០៤​នាក់​នៅក្នុង​នោះ​មាន​នារី​១៥​នាក់​បានចេញ​បំពេញបេសកកម្ម​នៅ​សាធារណរដ្ឋ​អាហ្វ្រិក​កណ្តាល​។​

​ពិធី​ជូន​ដំណើរ​ត្រូវបាន​ប្រារព្ធ​ឡើងជា​ផ្លូវការ​នៅ​ព្រលានយន្តហោះ​អន្តរជាតិ​ភ្នំពេញ ក្រោម​អធិបតីភាព​នាយ​ឧ​ត្ត​ម​សេនីយ៍ សែម សុវណ្ណនី អនុប្រធាន​គណៈកម្មាធិកា​រ​ជាតិ និង​ជា​អគ្គនាយក​មជ្ឈមណ្ឌល​ជាតិ​រក្សា​សន្តិភាព​។​

​ថ្លែង​ក្នុង​ពិធី​សំណេះសំណាល​ជាមួយ កង​យោធា​មួក​ខៀវ​មុនពេល​ឡើង​យន្តហោះ ដែល​ចាត់ចែង​ឡើង​ដោយ​អង្គការសហប្រជាជាតិ នាយ​ឧ​ត្ត​ម​សេនីយ៍ សែម សុវណ្ណនី បាន​បញ្ជាក់ថា ដោយសារតែ​ការរីក​រាលដាល​នៃ​មេរោគ​កូ​វីដ​-១៩​បណ្តាល​ឲ្យ​ការប្តូរ​វេន​កង កម្លាំងយោធា​មួក​ខៀវ​សម្រាប់​បេសកកម្ម​អង្គការសហប្រជាជាតិ​មានការ​អាក់ខាន​និង​ត្រូវបាន​ពន្យា​ពេល​ខុសពី​ការគ្រោងទុក​ដែល​តែង​ធ្វើឡើង​ជាប្រចាំ​ជា​រៀងរាល់​មួយឆ្នាំ​ម្តង ព្រមទាំង​ទាមទារ​ឲ្យ​មានការ​អនុវត្ត​យ៉ាង​ម៉ឺងម៉ាត់ ទាំង​ការពិនិត្យ​សំណាក​និង​ការធ្វើ​ច​ត្តា ឡី​ស័ក​ទាំង​កម្លាំង​ទៅ​បំពេញបេសកកម្ម​និង​កម្លាំង​និវត្តន៍​មកពី​តំបន់​បេសកកម្ម​រយៈពេល​១៤​ថ្ងៃជា​កំហិត​។​

​ដើម្បី​ការពារ​ខ្លួន​ក្នុង​ស្ថានការណ៍​ដែល​ប្រឈម​នឹង​ឧបសគ្គ​ខ្ពស់​ពិសេស​ការយល់ដឹង​ពី​វិធាន​នៃ​ការការពារ​ប្រយុទ្ធប្រឆាំង​មេរោគ​កូ​វីដ​-១៩ នាយ​ឧ​ត្ត​ម​សេនីយ៍​សែម​សុវណ្ណនី​បាន ក្រើន​រំ​ឮ​ក​ដល់​កង​យោធា​មួក​ខៀវ​ទាំងអស់​ត្រូវ​បន្ត​យកចិត្តទុកដាក់​អនុវត្ត​ឲ្យ​មាន​ប្រសិទ្ធភាព​ខ្ពស់​នូវ​ការធ្វើ​ច​ត្តា​ឡី​ស័ក តាម​ការណែនាំ​របស់​ក្រសួងសុខាភិបាល​ទាំង​នៅក្នុង​ប្រទេស និង​នៅតាម​តំបន់​បេសកកម្ម​។ ត្រូវ​យកចិត្តទុកដាក់​ផ្លាស់ប្តូរ​បទពិសោធន៍រ​វាង​អ្នក​ចាស់ និង​អ្នកថ្មី ទំនាក់ទំនង​ល្អជា​មួយ​បណ្តា​ប្រទេស​បរិច្ចាគ​កម្លាំង​ដោយ​ប្រកាន់ខ្ជាប់​ប្រពៃណី ទំនៀមទម្លាប់​មូលដ្ឋាន​នៃ​ប្រទេស​បេសកកម្ម​។​

​នាយ​ឧ​ត្ត​ម​សេនីយ៍​សែម​សុវណ្ណនី បាន​ថ្លែងបន្តថាៈ​ទោះបីជា​តំបន់​បេសកកម្ម​របស់ អង្គការសហប្រជាជាតិ​ជួបប្រទះ​គ្រោះថ្នាក់​យ៉ាងណាក្តី​ក៏​រាជរដ្ឋាភិបាល​កម្ពុជា​ក្រោម​ការដឹកនាំ​ប្រកបដោយ​ភាពឈ្លាសវៃ​របស់​សម្តេច តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជា ណា​ចក្រ​កម្ពុជា​នៅតែ​ប្តេជ្ញា​បន្ត​ចូលរួម​បេសកកម្ម មនុស្សធម៌​ខាងលើនេះ​ជានិច្ច​។​

​សូមបញ្ជាក់ថា គិត​ចាប់ពី​ឆ្នាំ​២០០៦ រហូតដល់​បច្ចុប្បន្ននេះ​កម្ពុជា​បាន​បញ្ជូន​កង​យោធា ចំនួន​៥១ កង​ដែលមាន​កម្លាំង​សរុប​ចំនួន​៧.៥១៧ នាក់​នៅក្នុង​នោះ​មាន​នារី​ចំនួន​៤៦៦ នាក់​ទៅកាន់​តំបន់​បេសកកម្ម​ចំនួន​១១​ក្នុង​៩​ប្រទេស​រួមមានៈ​សាធារណរដ្ឋ​ស៊ូដង់ ស៊ូដង់​ខាងត្បូង ឆាដ អាហ្វ្រិក​កណ្តាល លី​បង់ ម៉ាលី ស៊ី​រី សាយ​ប្រឺស និង​យេ​មែន លើ​ជំនាញ​បោសសំអាត​មីន វិស្វកម្ម​សំណង់​ផ្តេក​-​បញ្ឈរ អាវុធហត្ថ មន្ទីរពេទ្យ​កម្រិត​២ វិស្វកម្ម​ព្រលានយន្តហោះ កម្ទេច​គ្រាប់​មិនទាន់​ផ្ទុះ នាយទាហាន​សេនាធិការ និង​សង្កេតការណ៍​យោធា​។​

​បច្ចុប្បន្ន​កម្លាំង​កម្ពុជា​សរុប​ចំនួន​៧៧៨​នាក់ ដោយមាន​នារី​ចំនួន​១០៤​នាក់ បាននិងកំពុង បំពេញបេសកកម្ម​នៅ​ប្រទេស​ចំនួន​៥​រួមមានៈ​សាធារណរដ្ឋ​ស៊ូដង់​ខាងត្បូង ស៊ូដង់ លី​បង់ អាហ្វ្រិក​កណ្តាល​និង​ម៉ាលី​។​

​តាម​ការបញ្ជាក់​ឲ្យ​ដឹង​ផងដែ​រៈការ​ចេញដំណើរ​របស់​កង​យោធា​មួក​ខៀវ​លេខ​៥៧៦​នាពេល​អ​ធ្រា​ត​នេះ​គឺជា​កង​ទី​៧​សម្រាប់​បេសកកម្ម​នៅ​សាធារណរដ្ឋ​អាហ្វ្រិក​កណ្តាល​ដែល​បានចាប់ផ្តើម​ធ្វើឡើង​តាំងពី​ឆ្នាំ​២០១៤​។ កងកម្លាំង​យោធា​មួក​ខៀវ​កម្ពុជា​កង​ទី​៦​នឹង​វិល​មក ដល់​កម្ពុជា​វិញ​នា​រសៀល​ថ្ងៃទី​២១​ខែកុម្ភៈ ឆ្នាំ​២០២១​បន្ទាប់ពី​បានបញ្ចប់​បេសកកម្ម​នៅ សាធារណរដ្ឋ​អាហ្វ្រិក​កណ្តាល​៕​/PC

ទីតាំងផ្សាយពាណិជ្ជកម្ម

- Advertisment -

Most Popular