Home ព័ត៌មានសំខាន់ៗ ជំនួយ​ជា​ថវិក...

ជំនួយ​ជា​ថវិកា​ពី ២៥.០០០ ដល់ ៣០.០០០ ដុល្លារ​អាមេរិក កំពុង​រង់ចាំ​គម្រោង ទាក់ទង​នឹង​ខួប​លើក​ទី​៣០ នៃ​កិច្ចព្រមព្រៀង​សន្តិភាព ទីក្រុង​ប៉ារីស​

ដោយៈ​សុផល / ភ្នំពេញៈ ការិយាល័យ​ផ្នែក​កិច្ចការ​សាធារណៈ នៃ​ស្ថានទូត​អាមេរិក នៅ​រាជធានី​ភ្នំពេញ របស់​ក្រសួងការបរទេស សហរដ្ឋអាមេរិក កំពុង​ស្វែងរក​ដៃគូ អង្គការ​នានា ឲ្យ​ចូលរួម​ដាក់​គម្រោង ស្នើ​ជំនួយ​ជា​ថវិកា ក្នុងការ​ផលិត​នូវ របាយការណ៍ ការសិក្សា​ស្រាវជ្រាវ ឬ​ភាពយន្ត​ឯកសារ ដើម្បី​រំលឹក​នូវ​ខួប​លើក​ទី​៣០ នៃ​កិច្ចព្រមព្រៀង សន្តិភាព ទីក្រុង​ប៉ារីស នា​ថ្ងៃទី ២៣ ខែតុលា ឆ្នាំ​២០២១ ធ្វើការ​វិភាគ និង​វាយតម្លៃ ពី​វឌ្ឍនភាព​របស់ ប្រទេស​កម្ពុជា គិត​មកដល់ពេលនេះ ក្នុងការ​បំពេញបាន តាម​ការសន្យា ដែលមាន​ចែង នៅក្នុង​កិច្ចព្រមព្រៀង ហើយ​ផ្តល់​អនុសាសន៍ ស្តីពី​ជំហាន​បន្ទាប់ ជូន​រាជរដ្ឋាភិបាល​កម្ពុជា និង​ប្រទេស ដែល​បាន​ចុះហត្ថលេខា លើ​កិច្ចព្រមព្រៀង​នេះ​។​

​ជំនួយ​ជា​ថវិកា​សរុប សម្រាប់​គម្រោង​ស្នើ​នេះ ទទួលបាន​ក្នុង​រង្វង់ ចាប់ពី ២៥.០០០ ដុល្លារ ដល់ ៣០.០០០ ដុល្លារ​អាមេរិក​។ ស្ថានទូត​អាមេរិក ប្រចាំ​នៅ​ភ្នំពេញ សូម​អញ្ជើញ ក្រុម​អ្នកជំនាញ ផ្តល់​ប្រឹក្សា ឬ​អង្គការ​ស្ថាប័ន​នានា សរសេរ​គម្រោង​ផ្សេងៗ​ទាក់ទង​នឹង ការសិក្សា​ស្រាវជ្រាវ និង​ចេញ​របាយការណ៍ គ្រប់​ជ្រុងជ្រោយ ឬ​ចងក្រង​ឯកសារ ដែល​វិភាគ​លើ​វឌ្ឍនភាព របស់​ប្រទេស​កម្ពុជា គិត​មកដល់ពេលនេះ ក្នុងការ​បំពេញបាន តាម​ការសន្យា ដែលមាន​ចែង នៅក្នុង​កិច្ចព្រមព្រៀង​សន្តិភាព ទីក្រុង​ប៉ារីស ឆ្នាំ ១៩៩១​។​

​ថ្ងៃ​កំណត់ ត្រូវ​ចេញផ្សាយ​ឯកសារ គឺ​នៅ​ចុងខែ​តុលា ដើម្បី​ឲ្យ​ត្រូវ​នឹង​ខួប​លើក​ទី​៣០ នៃ​កិច្ចព្រមព្រៀង​សន្តិភាព នា​ថ្ងៃទី​២៣ ខែតុលា ឆ្នាំ ២០២១​។ កាលបរិច្ឆេទ​ឈប់​ទទួល ពាក្យ នៅ​ថ្ងៃទី​៣០ ខែមីនា ឆ្នាំ​២០២១ ហើយ​ជំនួយ​ដែល​អនុម័ត នឹង​ផ្តល់​ត្រឹម​ថ្ងៃទី​៣០ ខែមេសា ឆ្នាំ ២០២១ ។ គម្រោង​ដែល​អនុម័ត គួរ​ត្រូវអនុវត្ត​បញ្ចប់​ត្រឹម ថ្ងៃទី​៣១ ខែតុលា ឆ្នាំ ២០២១៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular