Home ព័ត៌មានជាតិ សន្តិសុខ ​ស្លាប់​ក្មេង...

​ស្លាប់​ក្មេងប្រុស​ម្នាក់​, របួស​ប្រាំ​បីនាក់ ដោយសារ​ក្រឡាប់​រថយន្ត ដឹក​ក្រុម​តន្ត្រី នៅ​ស្រុក​តំបែរ​

​ដោយ​: គង់​ហេង / ត្បូងឃ្មុំ​: រថយន្ត​ដឹក​ក្រុម​តន្ត្រី ឈ្មោះ « ពេជ្រ​រចនា​តន្ត្រី ពណ៌​លឿង » បាន​ក្រឡាប់​នៅលើ​កំណាត់​ផ្លូវជាតិ​លេខ​៧៣ ស្ថិតក្នុង​ភូមិ​បេង​ថ្មី ឃុំ​សេ​ដា ស្រុក​តំបែរ បណ្តាលឱ្យ​ក្មេងប្រុស អាយុ ១៦ ឆ្នាំ​ម្នាក់ បាន​ស្លាប់ និង​មនុស្ស​ប្រុស ស្រី ចំនួន​ប្រាំ​បីនាក់​ផ្សេងទៀត បាន​រងរបួស នា​វេលា​ម៉ោង ប្រមាណ​ជាង ១ រំលងអធ្រាត្រ ឈានចូល​ថ្ងៃទី​២២ ខែកុម្ភ​: ឆ្នាំ​២០២១ ។​

​លោក​វរសេនីយ៍ សុខ បូ​រិ​ន មេបញ្ជាការ​មូលដ្ឋាន កងរាជអាវុធហត្ថ ស្រុក​តំបែរ បានឱ្យដឹងថាៈ ជនរងគ្រោះ​ដែល​ស្លាប់ ឈ្មោះ យ៉​ន គឹម​យ៉េត អាយុ ១៦ ឆ្នាំ មាន​ទីលំនៅ ភូមិ​ល្ងៀង ឃុំ​ល្ងៀង ស្រុក​ត្បូងឃ្មុំ ជាមួយ​អ្នកបើកបរ រថយន្ត​ម៉ាក​ទី​តាន់ ពាក់​ផ្លាកលេខ កំពង់ធំ 3A-0165 ជា​បុរស​ឈ្មោះ ធួន ធា អាយុ​៣៩ ឆ្នាំ​។ ចំណែក​អ្នករបួស​ចំនួន ប្រាំបី នាក់​នោះ មាន​លក្ខណៈ​ស្រាល​ទាំងអស់​។​

​លោក​មេបញ្ជាការ អាវុធហត្ថ​ស្រុក​តំបែរ បាន​បន្តថាៈ តាម​ការពិនិត្យ​កន្លែងកើតហេតុ គ្រោះថ្នាក់​ក្រឡាប់​រថយន្ត ខាងលើ របស់​មន្ត្រី​ជំនាញ ករណីនេះ បណ្តាលមកពី​អ្នកបើកបរ ប្រើប្រាស់​ល្បឿន​លឿន ហើយ​បាន​ប្រទះ​នឹង​ផ្លូវ​កោង​។ ចំណែក​សាកសព​ជនរងគ្រោះ បាន​ប្រគល់ជូន​ក្រុមគ្រួសារ ធ្វើបុណ្យ​តាម​ប្រពៃណី និង​រថយន្ត​ជា​វត្ថុតាង បាន​ដកហូត រក្សាទុក​នៅ​អធិការដ្ឋាន​នគរបាល ស្រុក​តំបែរ ដើម្បី​ចាត់ការ តាម​នីតិវិធី​៕/V​.mara

ទីតាំងផ្សាយពាណិជ្ជកម្ម

- Advertisment -

Most Popular