មេបញ្ជាការរង​កងទ័ព​ជើងគោក : កងកម្លាំង​ត្រូវ​ជឿជាក់​លើ​វាក់​សាំង

ដោយៈ មុនី​រ័ត្ន​/​ភ្នំពេញ​៖ មេបញ្ជាការ​កងពលតូច​លេខ​៧០ និង​ជា​មេបញ្ជាការរង​កងទ័ព ជើងគោក លោក​ឧ​ត្ត​ម​សេនីយ៍​ឯក ម៉ៅ សុផាន់ បាន​មានប្រសាសន៍​ទៅកាន់​នាយទាហាន ពលទាហាន​ទាំងអស់​ថា ត្រូវ​ជឿជាក់​លើ​វ៉ាក់សាំង​ស៊ី​ណូ​ហ្វា​ម ព្រោះ​ទម្រាំ​ផលិត​បាន វ៉ាក់សាំង​មួយ គឺមាន​ការគិតគូរ និង​សិក្សា​ល្អិតល្អន់​ជាទីបំផុត ដូច្នេះ​កុំ​មានការ​ព្រួយបារម្ភ នៅពេល​ចាក់ ដោយ​គ្រាន់តែ​អនុវត្តតាម​ការណែនាំរ​បស់​គ្រូពេទ្យ​ជំនាញ​ឲ្យ​បាន​ត្រឹមត្រូវ​។

​ការបញ្ជាក់​នេះ លោក​ឧ​ត្ត​ម​សេនីយ៍​ឯក ម៉ៅ សុផាន់ បាន​ធ្វើឡើង​នៅក្នុង​ពិធី​ដែល កងពលតូច​លេខ​៧០ បានរៀបចំ​ចាក់​វ៉ាក់សាំង​ការពារ​កូ​វីដ​-១៩ នៅ​ទីបញ្ជាការ​កងពល ដែលមាន​អង្គភាព​ចំណុះ​បញ្ជាការដ្ឋាន​កងទ័ពជើងគោក ចំនួន​៥​អង្គភាព​រួមមានៈ កងពលតូច​លេខ​៧០ យោធភូមិភាគ​១ យោធភូមិភាគ​២ បញ្ជាការដ្ឋាន​វិស្វកម្ម ក​.​ទ​.​គ បញ្ជាការដ្ឋាន​ការពារ​អាកាស ក​.​ទ​.​គ នៅ​ថ្ងៃទី​២២ ខែកុម្ភៈ ឆ្នាំ​២០២១ ក្រោម​អធិបតីភាព នាយ​ឧ​ត្ត​ម​សេនីយ៍ នាង ផាត រដ្ឋលេខាធិការ​ប្រចាំការ​ក្រសួងការពារជាតិ ។​

​លោក​ឧ​ត្ត​ម​សេនីយ៍​ឯក ម៉ៅ សុផាន់ បានបញ្ជាក់​ទៀតថា ពលទាហាន​ទាំងអស់​ត្រូវ​ជឿជាក់ លើ​ការសម្រេចចិត្ត​ដ៏​ត្រឹមត្រូវ និង​ខ្ពង់ខ្ពស់​បំផុត​របស់​ស​ម្ដេច​តេ​ជោ ហ៊ុន សែន ដែល​ទទួល យក​វ៉ាក់សាំង​ស៊ី​ណូ​ហ្វា​ម មកចាក់​ជូន​ប្រជាពលរដ្ឋ​កម្ពុជា​ដោយ​ឥតគិតថ្លៃ ពី​សំណាក់ សាធារណៈរដ្ឋ​ប្រជាមានិត​ចិន​។ ការចាក់​វ៉ាក់សាំង​ការពារ​ជំងឺ​កូ​វីដ​-១៩​នេះ ឧ​ត្ត​ម​សេនីយ៍ ឯក ម៉ៅ សុផាន់ បាន​ដឹកនាំ​មេបញ្ជាការរង នាយទាហាន នាយទាហានរង និង​ពល ទាហាន​ទាំងអស់ ចាក់​វ៉ាក់សាំង​ស៊ី​ណូ​ហ្វា​ម ប្រឆាំង​ជំងឺ​កូ​វីដ​-១៩ ដែលជា​ជំនួយ​របស់ រដ្ឋាភិបាល សាធារណៈរដ្ឋ​ប្រជាមានិត​ចិន​។​

​សូមជម្រាបថា វ៉ាក់សាំង​បង្ការ​ជំងឺ​កូ​វីដ​-១៩ របស់​ចិន ចំនួន​៦០​ម៉ឺន​ដូ​ស​នេះ​ជា​ប្រភេទ​វ៉ា​ក់ សាំង​ស៉ី​ណូ​ហ្វា​ម ដែល​ផលិត​ដោយ​រដ្ឋាភិបាល​ចិន បាន​បញ្ជូន​មកដល់​ប្រទេស​កម្ពុជា កាលពី​រសៀល​ថ្ងៃទី​៧ ខែកុម្ភៈ​។ ក្រោយ​មកដល់​ប្រទេស​កម្ពុជា វ៉ាក់សាំង​ស៉ី​ណូ​ហ្វា​ម ទាំងនេះ បាន​ត្រូវ​ប្រគល់ជូន​ក្រសួងការពារជាតិ​ចំនួន ៣០​ម៉ឺន​ដូ​ស និង​ប្រគល់ជូន​ក្រសួង សុខាភិបាល​ចាត់ចែង​ចំនួន ៣០​ម៉ឺន​ដូ​ស​៕​/PC

ទីតាំងផ្សាយពាណិជ្ជកម្ម

- Advertisment -

Most Popular