Home កម្សាន្ត ​ក្រសួងបរិស្ថ...

​ក្រសួងបរិស្ថាន ប្រគល់​រង្វាន់ និង​វិញ្ញាបនបត្រ ដល់​ជ័យលាភី ការប្រកួត​វីដេអូ បែប​អត្ថាធិប្បាយ​

​ដោយៈ ដេប៉ូ / ភ្នំពេញៈ ក្រសួងបរិស្ថាន បានរៀបចំ​ពិធី​ប្រគល់​រង្វាន់ និង​វិញ្ញាបនបត្រ ដល់​ជ័យលាភី ការប្រកួត​វីដេអូ បែប​អត្ថាធិប្បាយ (​វិ​ដេ​អូ​សំណេរ​) ក្នុង​យុទ្ធនាការ ការពារ​ព្រៃឈើ និង​សត្វព្រៃ ក្នុង​តំបន់​ទេសភាព​ព្រៃ​ឡង់ តាមរយៈ​ការផ្លាស់ប្តូរ ឥរិយាបថ​សង្គម​។​

​ក្នុង​ពិធី​ដែល​បាន​រៀបចំឡើង កាលពី​ថ្ងៃទី​២២ ខែ កុម្ភៈ ឆ្នាំ​២០២១ នេះ គេ​ឃើញ​មានការ​ចូលរួម ពី​សំណាក់​លោកស្រី មាស ច័ន្ទ​ធីតា អគ្គនាយករង អគ្គនាយកដ្ឋាន ចំណេះដឹង និង​ព័ត៌មាន​បរិស្ថាន លោក រី​ឆាត ឈិន ប្រធានការិយាល័យ សន្តិសុខ​ស្បៀង និង​បរិស្ថាន ទីភ្នាក់ងារ​ជំនួយ​អាមេរិក USAID លោក ថៃ សីលា នាយក​គ្រប់គ្រង​ទូទៅ ក្រុមហ៊ុន ខាំ​បូ​ធី​ក​ឃី​ក និង​បេក្ខជន បេ​ក្ខ​នារី ប្រកួត​ផលិត​វីដេអូ បែប​អត្ថាធិប្បាយ ជាច្រើនរូប​ទៀត​។​

​លោក រី​ឆាត ឈិន ប្រធានការិយាល័យ សន្តិសុខ​ស្បៀង និង​បរិស្ថាន ទីភ្នាក់ងារ​ជំនួយ​អាមេរិក USAID បានលើកឡើង​ថាៈ ការបង្កើត​ការប្រកួត​ផលិត​វីដេអូ បែប​អត្ថាធិប្បាយ (​វីដេអូ​សំណេរ​) ស្តីអំពី​បរិស្ថាន គឺ​ផ្តល់ឱកាស ដល់​យុវជន​បញ្ចេញ​សមត្ថភាព ផលិត​វីដេអូ តាម​ជំនាញ​របស់ខ្លួន លើ​ប្រធានបទ ការការពារ ព្រៃឈើ ការអភិរក្ស​ជីវៈចម្រុះ និង​ការអភិវឌ្ឍ ប្រកបដោយ​ចីរភាព​។ ការប្រកួត​ផលិត​វីដេអូ​សំណេរ​នេះ ប្រព្រឹត្តទៅ បី​សប្តាហ៍ ដែល​បានបញ្ចប់ នៅ​ថ្ងៃទី​១៥ ខែតុលា ឆ្នាំ​២០២០ កន្លងទៅ​។ ការប្រកួត​ផលិត​វី​ដែ​អូ អម​ជាមួយ បទ​អត្ថាធិប្បាយ​នេះ ទទួលបាន​ចំណាប់ អារម្មណ៍​ទូទាំងប្រទេស ហើយ​ត្រឹម​ថ្ងៃ​កំណត់ យើង​ទទួលបាន ១៨ វីដេអូ លើ​ប្រធានបទ​បរិស្ថាន ក្នុង​តំបន់​ទេសភាព​ព្រៃ​ឡង់​។​

​នេះ​គឺជា​ជោគជ័យ​មួយ ដែល​បង្ហាញ​ច្បាស់​តា មរយៈ​ការប្រកួត​ផលិត វីដេអូ​នេះ​។ លើសពីនេះ យើង​សង្ឃឹមថា ដំណើរការ​ប្រកួត ផលិត​វីដេអូ​នេះ នឹង​ផ្តល់ព័ត៌មាន និង​ជំនាញ​ចាំបាច់ ដល់​ប្រជាពលរដ្ឋ​កម្ពុជា ក្នុងការ​ផ្លាស់ប្តូរ ឥរិយាបថ​វិជ្ជមាន ក៏ដូចជា ជំរុញ​លើកទឹកចិត្ត អ្នក​ដទៃទៀត ឱ្យ​ផ្លាស់ប្តូរ​ឥរិយាបថ វិជ្ជមាន​ដូចគ្នា​ផងដែរ​។​

​លោក រី​ឆាត ឈិន បាន​ជំរុញ​លើកទឹកចិត្ត យុវជន​កម្ពុជា ឱ្យ​ចូលរួម​យ៉ាងសកម្ម ក្នុង​យុទ្ធនាការ និង​ការខិតខំ​ប្រឹងប្រែង របស់​ពួកគេ នាពេល​អនាគត​។ យុវជន​កម្ពុជា​ទាំងអស់ នឹង​ទទួលបាន​ឱកាស​ស្វែងយល់ និង​ឱ្យ​តម្លៃ​ដល់​ធម្មជាតិ ដែលមាន​ក្នុងប្រទេស​របស់ខ្លួន ក៏ដូចជា លើកកម្ពស់​កេរដំណែល​ជាតិ​បៃតង ក្នុងចំណោម​មិត្តភក្តិ ក្រុមគ្រួសារ សហគមន៍ និង​សង្គមជាតិ របស់ខ្លួន​ទាំងមូល​។​

​ដោយឡែក លោកស្រី មាស ច័ន្ទ​ធីតា អគ្គនាយករង តំណាង​លោក ជួប ប៉ារីស៍ អគ្គនាយក នៃ​អគ្គនាយកដ្ឋាន​ចំណេះដឹង និង​ព័ត៌មាន​បរិស្ថាន បាន​សម្តែង​នូវ ការកោតសរសើរ និង​វាយតម្លៃ​ខ្ពស់ ចំពោះ​ក្រុមការងារ គម្រោង​អនាគត​បៃតង ដែលមាន​គំនិត​ផ្តួចផ្តើម ក្នុង​ការរៀបចំ​កម្មវិធី​ប្រកួត​វីដេអូ​ខ្លី អំពី​ព្រៃ​ឡង់​នេះ​ឡើង ព្រមទាំង​អ្នកពាក់ព័ន្ធ​ទាំងអស់ ដែល​បាន​ខិតខំ​រៀបចំ​ការផ្សព្វផ្សាយ និង​ជម្រុះ​តាម​ដំណាក់កាល យ៉ាង​យកចិត្តទុកដាក់ និង​មាន​តម្លាភាព រហូត​រកឃើញ អ្នកឈ្នះ​រង្វាន់​ជ័យលាភី​។​

​លោកស្រី បានឱ្យដឹង​ទៀតថាៈ សម្រាប់​អគ្គនាយកដ្ឋាន​ចំណេះដឹង និង​ព័ត៌មាន​បរិស្ថាន នៃ​ក្រសួងបរិស្ថាន ជា​អង្គភាព​ជំនាញ​មួយ ក៏មាន​បេសកកម្ម​ចម្បង របស់ខ្លួន គឺ​លើកកម្ពស់​ចំណេះដឹង​បរិស្ថាន ដើម្បី​ផ្លាស់ប្តូរ​ផ្នត់គំនិត សាធារណជន ឱ្យ​ចូលរួម​ប្រតិបត្តិ មេត្រីភាព​បរិស្ថាន​។​

​ក្នុងនាម​អគ្គនាយកដ្ឋាន​ចំណេះដឹង និង​ព័ត៌មាន​បរិស្ថាន លោកស្រី សូម​លើកទឹកចិត្ត​ឲ្យ​ប្អូនៗ​យុវជន ឱ្យចូល​រួមការ​ប្រកួត​ប្រជែង របៀបនេះ​បន្តទៀត ប្រសិន​ជាមាន ទោះ​ស្ថាប័ន ឬ​គម្រោង​ផ្សេងៗ​ទៀត រៀបចំឡើង ក៏ដោយ ព្រោះ​លោកស្រី សង្ឃឹមថា ប្អូនៗ នឹង​ក្លាយជា​កម្លាំងចលករ ក្នុងការ​ជំរុញ​សាធារណជន ឱ្យ​ចូលរួម​ប្រែក្លាយ​ចំណេះដឹង​បរិស្ថាន ឱ្យទៅជា​ការប្រតិបត្តិ មេត្រីភាព​បរិស្ថាន​ល្អ និង​មានការ​ផ្លាស់ប្តូរ​ឥរិយាបថ ជា​វិជ្ជមាន ចំពោះ​បរិស្ថាន និង​ធម្មជាតិ នៃ​ព្រះរាជាណាចក្រ​កម្ពុជា​៕/V.mara


ទីតាំងផ្សាយពាណិជ្ជកម្ម

- Advertisment -

Most Popular