​ព្រះបរមរាជវាំង​ផ្សព្វផ្សាយ​នូវ «​វឌ្ឍនភាព អំពី​ការងារ​ជួសជុល អភិរក្ស និង​កែលម្អ​ប្រាសាទ​ចន្ទច្ឆាយា​»

​ដោយៈ ជា សីហៈ​/​ភ្នំពេញៈ នៅថ្ងៃនេះ​ព្រះបរមរាជវាំង​តាមរយៈ​បណ្តាញ​សង្គម​មួយ​ដែល​ស្និទ​នឹង​ខ្លួន​បានធ្វើការ​ផ្សព្វផ្សាយ​នូវ​«​វឌ្ឍនភាព អំពី​ការងារ​ជួសជុល អភិរក្ស និង​កែលម្អ​ប្រាសាទ​ចន្ទច្ឆាយា​»​។

​ប្រភព​ដដែល​បាន​ឲ្យ​ដឹងថា​ប្រាសាទ​ចន្ទច្ឆាយា​សម្ពោធ​នៅ​ឆ្នាំ​១៩១៣​ក្នុង​រាជ្យ​ព្រះបាទ​ស៊ីសុវត្ថិ​ដោយ​សម្ភារៈ​សំណង់​សំខាន់​នៃ​តួ​ប្រាសាទ​ផ្សំ​ឡើង​ដោយ​គ្រឿង​ផ្គុំ​បេតុង​ស​សៃ​ដែក​មាន​គ្រឹះ​សសរ​ធ្នឹម​និង​កម្រាល​បេតុង​។​សំណង់​នេះ​មាន​ជញ្ជាំង​ខណ្ឌ​និង​ជា​ជញ្ជាំងទ្រ​បន្ទុក​ត្រង់​អ័ក្ស​សសរ F និង I ។
​ប្រភព​ដដែល​បាន​បន្តថា សម្រាប់​គ្រឿង​ឈើ មាន​នៅលើ​គ្រោង​ដំបូល​ដូចជា ផ្ទោង និង​ដៃរណែង​ប្រក់​ដោយ​ក្បឿង​ដី​ដុត​មាន​ពណ៌​លឿង ខៀវ និង​បៃតង ដោយឡែក​ថ្នាំ​ពណ៌​គូស​គំនូរ វិញ ជា​ប្រភេទ​ក្រមួន​លាយ​ជ័រ​ឈើ គូស​លើ​ក្រណាត់​ក្រចៅ​(Canvas) បិទ​ផ្ទាល់​លើ​ពិតាន ។
​ប្រភព​ដដែល​ក៏បាន​រាយការណ៍​អំពី​ការខូចខាត​ផងដែរ​ដោយ​លើកឡើងថា​ដោយសារ​អគារ​ឈរលើ​ល្បាយ​ដី​ភក់​អាច​នៅក្បែរ​ទឹកទន្លេ​វា​អាចមាន​ចលនា​បំរែបំរួល​នីវ៉ូ​តិចតួច​ទៅតាម​រដូវ​កាល​នៃ​កំពស់​ទន្លេ​។​កន្លងមក​អគារ​នេះ​តែងតែ​មានការ​លិច​ទឹក​ជ្រាបចូល​ក្នុង​ជណ្តើរ​ក្រោម​ដី ជញ្ជាំង​ខណ្ឌ​មាន​សំណើម និង​មាន​ស្នាម​ប្រេះ​ត្រង់​ជញ្ជាំងទ្រ​ទំងន់ ។

​ប្រភព​ដដែល​បាន​បន្តថា​សត្វ​ព្រាប​និង​ប្រចៀវ​ក៏​ជា​ប្រភព​នៃ​ការខូចខាត​របស់​សំណង​នេះ​។​ប្រភព​ដដែល​បាន​លើកឡើងថា​ការ​មក​រស់នៅក្នុង​ប្រាសាទ របស់​សត្វ​ព្រាប និង​សត្វ​ប្រចៀវ​បង្កើតជា​លាមក​សម្រាម​រួមផ្សំ​និង​ទឹកភ្លៀង​បង្ក​ជា​អាស៊ីត​ធ្វើ​ឲ្យ​ពុកផុយ​បេតុង​បាយអ​បូក ក្បាច់លម្អ​ផ្សេងៗ គំនូរ ថ្នាំ​ពណ៌​…​។​

​ប្រភព​ដដែល​បាន​បន្តថា ក្រៅពីនោះ អាយុកាល​នៃ​សម្ភារៈ​សំណង់​ក៏​ជា​ប្រភព​នាំ​ឲ្យ​បាត់បង់​គុណភាព​បេតុង ក្បឿង​កាវ​បិទ​ក្រណាត់​គំនូរ នឹង​ពិតាន ព្រមទាំង​គុណភាព​ក្រណាត់​គំនូរ​ផងដែរ​។​

​ដោយសារ​បញ្ហា​នេះ​ប្រភព​ដដែល​ក៏បាន​បង្ហាញ​នូវ​គម្រោង​ការងារ​ជួសជុល​ដោយ​ក្រុមការងារ​បាន​ជីក​ល្បាយ​ដី​ភក់​ដកចេញ​បង្ហាប់​ដោយ​ថ្ម ខ្សាច់​និង​ពង្រឹង​ទីតាំង​ដែលមាន​បញ្ហា​រួច​ចង​ដែក​ចាក់​កម្រាល​បេតុង​ទៅវិញ​រួចរាល់​១០០%​។ ចំពោះ​ការងារ​ជួសជុល​រចនាសម្ព័ន្ធ​បេតុង សសរ​ធ្នឹម​និង​ពិតាន​ជាន់​ផ្ទាល់​ដី​រួចរាល់​១០០%​។​ការងារ​ជួសជុល​ស្នាម​ប្រេះ​និង​ពង្រឹង​បេតុង​កម្រាល​ធ្នឹម​ពិតាន​ជាន់​ទីមួយ​និង​ដំបូល​បាន​១០០%​។ កំពុង​បន្ត​រៀបចំ​ប្រព័ន្ធ​បង្ហូរទឹក​ភ្លៀង​ជាន់​ទីមួយ និង​លាបថ្នាំ​ការពារ​ជម្រាប​ទឹក​ជាន់​ដំបូល​។ ចំណែក​ការងារ​តម្លើង​គ្រោង​ដំបូល​ឈើ ផ្ទោង ដៃរណែង​បាន​ចប់​រួចរាល់ រងចាំ​ក្បឿង​ដែល​កំពុង​ផលិត ។ ការងារ​ដំឡើង​ក្បាច់លម្អ​ផ្សេងៗ​ដូចជា​បង្កាន់ដៃ រងស្បូវ ដងក្តារ ជហ្វា និង​ក្បាច់លម្អ​បុស្បុក​ទាំង​៧​ថ្នាក់​បាន​រួចរាល់​១០០%​។​
​ប្រភព​ដដែល​បាន​បន្តថា​ដោយឡែក​ការងារ​ជួសជុល​គំនូរ​ត្រូវ​រងចាំ​ក្រុម​ជំនាញ​ជួសជុល​គំនូរ​មកពី​ប្រទេស​បារាំង​អំឡុង​ខែមិថុនា​ខាងមុខ ប៉ុន្តែ​អាច​នឹងមាន​ការកែប្រែ​ពេលវេលា ដោយសារ​បញ្ហា​កូ​វិត​១៩ )​។​

​ប្រភព​ដដែល​បាន​បញ្ជាកា់​ថា សរុបមក​ប្រាសាទ​ចន្ទច្ឆាយា​ឆ្នាំ​២០១៩-២០២០ បាន​ប្រមាណ​៦៧%​នៃ​ការងារ​សរុប​ទាំងមូល​ហើយ ៕​.mara

ទីតាំងផ្សាយពាណិជ្ជកម្ម

- Advertisment -

Most Popular