Home ព័ត៌មានសំខាន់ៗ ប្រទះឃើញ​ដំរី...

ប្រទះឃើញ​ដំរីព្រៃ​មួយ​ហ្វូង​ប្រមាណ​ជាង​១០​ក្បាល នៅក្រោយ​សាលាស្រុក​កែវ​សី​ម៉ា ខេត្តមណ្ឌលគិរី​

ដោយ​: ដេប៉ូ / មណ្ឌលគិរី​: មន្ត្រីជាន់ខ្ពស់​នៃ​ក្រសួងបរិស្ថាន​បាន​ថ្លែងថា​ដំរីព្រៃ​មួយ​ហ្វូង មាន​ចំនួន​ប្រមាណ​ជាង ១០ ក្បាល​ត្រូវបាន​គេ​ប្រទះឃើញ​ពួកវា​កំពុង​ផឹកទឹក​នៅ​ពី​ខាងក្រោយ​សាលាស្រុក​កែវ​សី​ម៉ា ក្នុង​ដែនជម្រកសត្វព្រៃ​កែវ​សី​ម៉ា ស្រុក​កែវ​សី​ម៉ា ខេត្តមណ្ឌលគិរី​។​

​ការប្រទះឃើញ​សត្វព្រៃ​ដ៏​កម្រ និង កំពុងមាន​វត្ត​មាននៅ​ប្រទេស​កម្ពុជា​កាន់តែ​ច្រើនឡើង​នេះ​កាលពី​ល្ងាច​ថ្ងៃទី​២៥ ខែកុម្ភៈ ឆ្នាំ​២០២១ ។​

​គួរ​បញ្ជាក់ថា​ក្នុងអំឡុង​ខែកុម្ភៈ​ជា​រៀងរាល់ឆ្នាំ ហ្វូង​ដំរីព្រៃ​តែងតែ​មក​ទីតាំង​នេះ​ដើម្បី​រកស៊ី និង​ផឹកទឹក​។ ជាមួយ​ការ​ប្រទះ​សត្វព្រៃ​ដ៏​មានតម្លៃ​មហាសាល​នេះដែរ លោក នេត្រ ភក្ត្រា មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​បាន​អំពាវនាវ​ដល់​ប្រជាពលរដ្ឋ កុំ​រំខាន​សត្វ​ដំរីព្រៃ​ទាំងនេះ និង​សូម​ចូលរួម​ការពារ​និង​អភិរក្ស​។​

​លោក​ថា នៅ​ប្រទេស​កម្ពុជា សត្វ​ដំរីព្រៃ​មាន​ចន្លោះ​ពី ៤០០ ទៅ ៦០០​ក្បាល​ដែល​កំពុង​រស់នៅក្នុង​តំបន់ការពារធម្មជាតិ​ក្នុងប្រទេស​កម្ពុជា​ក្នុងនោះ​ភូមិភាគ​ឦសាន​ដែល​រួមមាន​ខេត្តមណ្ឌលគិរី និង​រតនគិរី​គឺ​សម្បូណ៌​ដោយ​សត្វ​ដំរីព្រៃ​។​

​ទាក់ទិន​ទៅនឹង​សត្វ​ដំរី​នេះដែរ លោក​រដ្ឋលេខាធិការ​បា​ន​បញ្ជាក់​ប្រាប់ថា បើ​គេ​យោងតាម​ការសិក្សា​ស្រាវជ្រាវ​របស់​អ្នកជំនាញ ក្នុង​រយៈពេល ៦០ ទៅ ៧០ ឆ្នាំ​ចុង​ក្រោយនេះ ចំនួន​ដំរី អាស៊ី​នៅលើ​ពិភពលោក​បាន​ថយចុះ​ប្រហែលជា ៥០​ភាគរយ ចំណែកឯ​ទីជម្រក​របស់​វា​បាន​បាត់បង់​អស់​ជិត ៩០​ភាគរយ​។ ក្នុងចំណោម​ដំរី​អាស៊ី​សរុប​ប្រមាណ​ពី ៣៩ ៤៦៣ ក្បាល​ទៅ ៤៧ ៤២៧ ក្បាល​ដែល​កំពុង​រស់នៅ​ក្នុងព្រៃ​សត្វ​ថ្ងៃ ក្នុងនោះ​ប្រហែល ៧៥​ភាគរយ​រស់នៅក្នុង ប្រទេស​ឥណ្ឌា និង​ស្រីលង្កា​។ ដំរី​អាស៊ី​ត្រូវបាន​ចាត់ទុកថា​ជា​ប្រភេទ​សត្វ​បង្គោល​ដ៏​សំខាន់​ដោយសារ​សារៈ សំខាន់​ផ្នែក​វប្បធម៌ តួនាទី​ក្នុង​ប្រព័ន្ធ​អេកូឡូស៊ី និង​សក្តានុពល​ដែល​អាច​ការពារ​ប្រភេទ​សត្វ​ផ្សេងទៀត​នៅ ក្នុង​ដែន​ជម្រក​របស់​វា​។​

​គួររំលឹកថា​សត្វ​ដំរី​អាស៊ី​កំពុងតែ​ទទួលរង​ការគំរាមកំហែង​ធ្ងន់ធ្ងរ នៅ​ទូទាំង​ដែន​ជម្រក​របស់​វា នៅលើ​សកលលោក ហើយ​ត្រូវបាន​ចាត់បញ្ចូល​ជា​ប្រភេទ​ជិត​ផុត​ពូជ នៅក្នុង​បញ្ជី​ក្រហម​របស់​អង្គការ​សហភាព​អន្ដរជាតិ ដើម្បី​ការអភិរក្ស​ធម្មជាតិ (IUCN)​។ ការ​រិច​រិល​ទីជម្រក​បានធ្វើឱ្យ​ដំរី​អាស៊ី​រស់នៅ​បែកខ្ញែក​ពីគ្នា និង​ជះឥទ្ធិពល​អវិជ្ជមាន​ដល់​ស្ថិរភាព​យូរអង្វែង​របស់​ប្រភេទ​ដ៏​សំខាន់​នេះ​។

​បើតាម​លោក នេត្រ​ភក្ត្រា បានឱ្យដឹង​ដែរ​ថា “​យោងតាម​របាយការណ៍​សិក្សា នៅក្នុង​តំបន់​ជួរ​ភ្នំក្រវាញ មិនមាន​របាយការណ៍ ណាមួយ​ស្តីពី​ឧបទ្ទវហេតុ​នៃ​ការ​បរបាញ់​សត្វ​ដំរី​ខុសច្បាប់​តាំងពី​ឆ្នាំ​២០០៣ មកម្ល៉េះ​”​។​

លោក​បានឱ្យដឹង​បន្ថែមថា​ចំណែក​នៅក្នុង​តំបន់​ទេសភាព​ភាគ​ខាងកើត មានការ​កត់សម្គាល់ថា​មាន​ដំរី​ស្លាប់​ចំនួន ៨ ក្បាល​ក្នុងនោះ​មាន​ទាំង​កូនដំរី និង​ដំរី​ធំ​ដែល​ករណី​ដំរី​ធំ​ស្លាប់​ត្រូវបាន​សង្ស័យថា មានការ​ពាក់ព័ន្ធ​នឹង​ការ​បរបាញ់​។ កាលពីដើមឆ្នាំ​២០១៩ សត្វ​ដំរីព្រៃ​វ័យ​ចំណាស់​មួយ​ក្បាល​ត្រូវបាន​ប្រទះឃើញ​ស្លាប់ ដោយ​ត្រូវគេ​បាញ់​ងាប់​នឹង​គ្រាប់កាំភ្លើង​កែច្នៃ​នៅ​ចំណុច​ចម្ការ​ស្វាយចន្ទី​របស​ប្រជាពលរដ្ឋ នៅក្បែរ​ដែនជម្រកសត្វព្រៃ​កែ​សីមា ស្ថិតក្នុង​ខេត្តមណ្ឌលគិរី ហើយ​ភ្លុក​និង​កន្ទុយ​របស់​វា​ត្រូវបាន​គេ​លួច​កាត់​យកទៅ​បាត់​។ នៅ​ឆ្នាំ​២០២០​នេះ កូនដំរី​ព្រៃ​ចំនួន ២ ក្បាល​បាន​រកឃើញ​ស្លាប់​នៅក្នុង​ខេត្តមណ្ឌលគិរី ក្នុងនោះ ១ លង់ទឹក​ស្លាប់​ដោយសារ​ជើង​ជាប់​នឹង​ល្បាក់​ថ្ម និង​មួយទៀត​កើតមក​មិនមាន​សុខ ភាពល្អ បាន​ស្លាប់​ទៅវិញ​ក្រោយ​ក្រុមមន្ត្រី​ជួយសង្គ្រោះ​។​

​លោក​បាន​មានប្រសាសន៍​ដែរ​ថា បើតាម​លទ្ធផល​ពី​ការបំពាក់​ម៉ា​ស៊ី​ថត​ស្វ័យប្រវត្តិ​នៅក្នុង​ឧទ្យាន​ជាតិ​ជូរ​ភ្នំក្រវាញ​ខាងត្បូង​ថ្មីៗ​នេះ ក្នុងចំណោម​កូនដំរី ៧ ក្បាលមាន ៤​ក្បាល​ដែលមាន​អន្ទាក់​នៅ ជាប់​នឹង​ជើង​របស់​ពួកវា ហើយក៏​មានកូន​ដំរីព្រៃ​មួយ​ក្បាល​ដែរ​ដែល​បាន​ស្លាប់​ដោយ​ជាប់អន្ទាក់​។

​ភស្តុតាង​នេះ​បាន​បញ្ជាក់ថា ការប្រើប្រាស់​អន្ទាក់​សម្រាប់​ចាប់​សត្វព្រៃ​នៅក្នុង​តំបន់ការពារធម្មជាតិ​ក្នុងប្រទេស​កម្ពុជា នៅតែ​ជា​ក្តី​ព្រួយបារម្ភ​ដ៏​ចម្បង​នៅឡើយ ហើយក៏​ជា​គ្រោះថ្នាក់​ដល់​សត្វ​ដំរី​អាស៊ី​ផង ដែរ​ព្រោះ​វា​អាច​បណ្តាលឱ្យ​សត្វ​ដំរី​រងរបួស និង​ស្លាប់​បាន​។

​លោក​រដ្ឋលេខាធិការ​បា​ន​លើកឡើងថា ដោយសារតែ​រយៈពេល​នៃ​ការបន្ត​ពូជ​របស់​ដំរី​អាស៊ី​យឺត (​ប្រាំ​ឆ្នាំ​បង្កើត​បានកូន​មួយ​) បើសិន​អាត្រា​ស្លាប់​នៃ​កូនដំរី​ព្រៃ​ខ្ពស់​ដោយសារតែ​រងរបួស​ពី​អន្ទាក់ នោះ​ចំនួន​ដំរីព្រៃ​នៅ​កម្ពុជា អាចមាន​បញ្ហា​ប្រឈម​ខ្ពស់​ក្នុងការ​ផុត​ពូជ​។ ពលរដ្ឋ​ខ្លះ​បាន​ប្រើប្រាស់​មធ្យោបាយ​ផ្សេងៗ​ដើម្បី​រំខាន​ដំរី​ដូចជា​ការធ្វើ​ក្តារ​ដាំ​ដែកគោល​ដាក់​តាមផ្លូវ​ដើម្បី​កុំឱ្យ​ដំរី​ចូល​ស៊ី​ដំណាំ​របស់ខ្លួន​ជាដើម​។ ការសាងសង់​ហេ​ដ្ឋ​រចនាសម្ព័ន្ធ ផ្ទះសម្បែង និង​ការដាំ​ដំណាំ​នៅតាម​ច្រករបៀង​ដែល​សត្វ​ដំរី ឆ្លងកាត់​ក៏​ជា​បញ្ហា​មួយ​ចោទ​ផងដែរ​។​

​ទាក់ទិន​ទៅនឹង​ការអភិរក្ស​សត្វ​ដំរី​នេះ​វិញ លោក​រដ្ឋលេខាធិការ​បា​ន​បញ្ជាក់​ថាបើ​យោងតាម​ការប៉ាន់ស្មាន​ផែនការ​សកម្មភាព​រយៈ​ពេល ១០ ឆ្នាំ​ដើម្បី​អភិរក្ស​សត្វ​ដំរីព្រៃ​អាស៊ី​នេះ​ត្រូវការ​ថវិកា​ចំនួន ៤០,៥​លាន​ដុល្លារ​សហរដ្ឋអាមេរិក​ដែលជា​គម្រោង​ថវិកា​រំពឹងថា​នឹង​បានមកពី​ប្រភព​រួមបញ្ចូល​គ្នា​ទាំង​កញ្ចប់​ថវិកា​រាជរដ្ឋាភិបាល អង្គការ​មិនមែន​រដ្ឋាភិបាល និង​ដៃគូ​អភិវឌ្ឍន៍​នានា​៕

ទីតាំងផ្សាយពាណិជ្ជកម្ម

Previous articleរដ្ឋបាលខេត្ត​ព្រះសីហនុ បាន​ជម្រាប​លោក លូ សាវ​ឡុង ( LU XIAOLONG) ម្ចាស់​អគារ​ស្នាក់នៅ​រួម​វីន​ភ្យូ​ឈ័​រ ខុន​ដូ អាជីវកម្ម ស្ថិតនៅ​ផ្លូវ​លេខ​២១០ ភូមិ​៣ សង្កាត់​លេខ​៤ ក្រុងព្រះសីហនុ ខេត្ត​ព្រះសីហនុ ដោយយោង​អនុ ក្រឹត្យ លេខ​២៧ អនក្រ​.​បក ចុះ​ថ្ងៃទី​១៨​ខែកុម្ភៈ​ឆ្នាំ​២០២១ ស្តីពី​វិធានការ​ច​ត្តា​ឡី​ស័ក ដើម្បី​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​១៩ និង​យោងតាម​ការចាំបាច់​រប​ស់​រដ្ឋបាលខេត្ត​ព្រះសីហនុ​។​
Next articleមន្ត្រីជាន់ខ្ពស់​នៃ​ក្រសួងបរិស្ថាន​បាន​ថ្លែងថា​ដំរីព្រៃ​មួយ​ហ្វូង មាន​ចំនួន​ប្រមាណ​ជាង ១០ ក្បាល​ត្រូវបាន​គេ​ប្រទះឃើញ​ពួកវា​កំពុង​ផឹកទឹក​នៅ​ពី​ខាងក្រោយ​សាលាស្រុក​កែវ​សី​ម៉ា ក្នុង​ដែនជម្រកសត្វព្រៃ​កែវ​សី​ម៉ា ស្រុក​កែវ​សី​ម៉ា ខេត្តមណ្ឌលគិរី​។​
- Advertisment -

Most Popular