ការចិញ្ចឹម​ដង្កូវនាង​អ៊ី​រី (ERI-SILKWORM)

3255

ដង្កូវនាង​អ៊ី​រី (philosamia ricini) គឺជា​ដង្កូវនាង​ពូជ​ព្រៃ​ដែល​ស៊ី​ស្លឹក​រុក្ខជាតិ ដូចជា ល្ហុង​ប្រេង ដំឡូង​មី ។ នៅក្នុង​ផលិតកម្ម សំបុក​របស់​ដង្កូវនាង​ពូជ​នេះ​ត្រូវបាន​គេ​យកទៅ​ធ្វើជា​ក្រណាត់ គ្រឿងសំអាង និង​វត្ថុ​តាំង​លម្អ​ផ្សេងៗ ។ ដឹកដឿ​របស់​ដង្កូវនាង​នេះ អាច​ហូប​បាន និង​អាច យក​ធ្វើជា​ចំណី​សត្វ​ដ៏​ល្អ​ព្រោះ​វា​មាន​ប្រូ​តែ​អ៊ី​ន​ខ្ពស់ ។ សីតុណ្ហភាព​ដែល​ប្រសើរ​បំផុត សម្រាប់​ដង្កូវនាង​ពូជ​នេះ​គឺ​២៦-២៨ អង្សា​សេ ហើយ​សំណើម​គឺ ៧៥-៩០ ភាគរយ ។ ប៉ុន្តែ​វា​ក៏​អាច​រស់​បានដែរ នៅ​សីតុណ្ហភាព និង​សំណើម​ទាប ឬ​ខ្ពស់ជាង​នេះ ។​

​នៅ​ប្រទេស​កម្ពុជា​យើង ដំណាក់កាល​ដង្កូវ​ដល់​ឡើង​រុំ​សំបុកមាន​រយៈពេល​១៣-១៥​ថ្ងៃ ។ នៅពេលដែល​សីតុណ្ហភាព​ទាប ការលូតលាស់​របស់​វា ក៏មាន​រយៈពេល​យូរ ផ្ទុយ​មកវិញ នៅពេលដែល​សីតុណ្ហភាព​ឡើង​ខ្ពស់ (៣០-៣៥ អង្សា​សេ​) អាយុកាល​នៃ​ការលូតលាស់ របស់​វា​ក៏មាន​រយៈពេល​ខ្លី ។​

​ជាទូទៅ​នៅ​ដំណាក់​ដង្កូវ​ចែកជា​៥​វគ្គ គឺ​វគ្គ​ទី​១​មាន​រយៈពេល​៣-៤​ថ្ងៃ វគ្គ​ទី​២ មាន​រយៈពេល ៣-៤​ថ្ងៃ វគ្គ​ទី​៣ មាន​រយៈពេល ៣-៤ ថ្ងៃ វគ្គ​ទី​៤ មាន​រយៈពេល ៤-៥​ថ្ងៃ និង​វគ្គ​ទី​៥ មាន​រយៈ ពេល ៤-៥​ថ្ងៃ ។ ដំណាក់កាល​រុំ​សំបុកមាន​រយៈពេល​៣​ថ្ងៃ ដំណាក់កាល​ដឹកដឿ​មាន​រយៈ ពេល​៧​ថ្ងៃ ដំណាក់កាល​មេអំបៅ​មាន​រយៈពេល​៣​ថ្ងៃ និង​ដំណាក់កាល ស៊ុត មាន​រយៈពេល ៩​ថ្ងៃ ។​

​ដង្កូវនាង​អ៊ី​រី ត្រូវ​ចិញ្ចឹម​នៅក្នុង​ផ្ទះ ដែលមាន​ពន្លឺ និង​ខ្យល់​ចេញចូល​គ្រប់គ្រាន់ ប៉ុន្តែ​មិនត្រូវ ឲ្យ​មាន​ពន្លឺ​ថ្ងៃ​ចាំង​មក​ផ្ទាល់​នោះទេ ។ កន្លែង​ចិញ្ចឹម​ត្រូវតែ​ស្អាត​មាន​អាន​ម័​យ​ល្អ ហើយ​ត្រូវ នៅ​ឲ្យ​ឆ្ងាយ​ពីសារ​ធាតុគីមី និង​ផ្សែង​ពុល ។ ការចិញ្ចឹម​ដង្កូវនាង​អ៊ី​រី​មាន​លក្ខណៈសាមញ្ញ ដែល​មិន​ទាមទារ​នូវ​អ្នកបច្ចេកទេស​ជំនាញ​នោះទេ ។ ដើម្បី​ជោគជ័យ​ក្នុងការ​ចិញ្ចឹម អ្នក ចិញ្ចឹម​ត្រូវតែ មាន​ចំណី​គ្រប់គ្រាន់ ការថែទាំ ដោយ​រក្សា​សំណើម ពន្លឺ និង​ខ្យល់​ចេញចូល ឲ្យ​បាន​ស្រម​ស្រប ៕/PC ប្រភព​: ក្រសួងកសិកម្ម រុក្ខាប្រមាញ់ និង​នេសាទ​