​ប្រែ​សម្រួលៈ​វាសនា​/​យ៉ាងហ្គោន​៖​ប៉ូលិស​មី​យ៉ាន់​ម៉ា​បាន​ចាប់ខ្លួន​អ្នកកាសែត​ជប៉ុន​ម្នាក់​នៅ​ឯ​កន្លែង​ប្រឆាំង​តវ៉ា​មួយ​ក្នុង​ទីក្រុង​យ៉ាងហ្គោន នេះ​បើ​តាម​ការ​បញ្ជាក់ប្រាប់​ពី​សហការី​ម្នាក់​កាលពី​ថ្ងៃ​សុក្រ​​ទី​២៦​កុម្ភៈ​។​

​វា​ជា​ការចាប់ខ្លួន​អ្នកយក​ព័ត៌មាន​បរទេស​លើកដំបូង​នៅ​ក្នុងប្រទេស​នេះ​ចាប់​តាំងពី​យោធា​ធ្វើ​រដ្ឋប្រហារ​ទម្លាក់​រដ្ឋាភិបាល​ស៊ីវិល​កាលពី​ថ្ងៃ​០១​កុម្ភៈ​មក​។​

​លោក​យូគី គី​តា​ហ្ស៊ុ​យ​មី ដែល​មាន​ក្រុមហ៊ុន​សារព័ត៌មាន​មួយ​និង​ធ្លាប់​ជា​អ្នកសារព័ត៌មាន​របស់​កាសែត​ពាណិជ្ជកម្ម​ជប៉ុន​Nikkei ត្រូវបាន​ចាប់ខ្លួន​កាលពី​ព្រឹក​ថ្ងៃ​សុក្រ​។​

​សហការី​ជនជាតិ​មី​យ៉ាន់​ម៉ា​របស់លោក ឈ្មោះ លីន នី​យ៉ាន់ ទុន បាន​និយាយ​បង្ហោះ​ក្នុង​ទំព័រ​ហ្វេ​សប៊ុក​ថា « យោង​តាម​សាក្សី លោក​ត្រូវបាន​វាយដំ តែ​ដោយសារ​ពាក់មួក​សុវត្ថិភាព វា​មិន​បង្ក​ការប៉ះពាល់​​ខ្លាំង​ដល់​គាត់​ទេ​។​ខ្ញុំ​បាន​ទាក់ទង​ស្ថានទូត​តែ​មិន​ទាន់​ទទួលបាន​ព័ត៌មាន​ទេ​»​។​

​លីន នី​យ៉ាន់ ទុន បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័រតាម​ទូរស័ព្ទថា « ខ្ញុំ​អត់​បានឃើញ​វា​ទេ តែ​បាន​ទទួល​សារ​មួយ​ពី​គាត់​នៅ​ម៉ោង​ប្រមាណ​១១​កន្លះ​ព្រឹក ថា​គាត់​ត្រូវបាន​ចាប់ខ្លួន​។​បន្ទាប់ពី​នោះ​ទៅ ខ្ញុំ​ដាច់​ការទាក់ទង​ជាមួយ​គាត់​»​។​

​ក្នុងពេល​ជាមួយគ្នា នាយខុទ្ទកាល័យ​ជប៉ុន លោក កាត់​ស៊ូ​ណូ​ប៊ូ កា​តុ បាន​ប្រាប់​សន្និសីទកាសែត​មួយ​ថា ជប៉ុន​នៅ​បន្ត​ស្វែងរក​ការបញ្ជាក់​ការ​ពិត​នៃ​រឿងនេះ នៅ​ពេល​ប៉ូលិស​មី​យ៉ាន់​ម៉ា​មិន​បាន​ឆ្លើយ​សំ​​ណួ​រនិង​ការសុំ​ធ្វើ​អត្ថាធិប្បាយ​ពី​អ្នកសារព័ត៌មាន​ទេ​។​

​សូមបញ្ជាក់​ថា មី​យ៉ាន់​ម៉ា ស្ថិតក្នុង​ភាពវឹកវរ​នយោបាយ សង្គម​និង​សេដ្ឋកិច្ច​ចាប់តាំងពី​យោធា​ដណ្តើម​អំណាច​ពី​រដ្ឋាភិបាល​ជាប់ឆ្នោត​របស់​លោកស្រី អ៊ុង​សាន ស៊ូ​ជី និង​ចាប់ខ្លួនអ្ន​ប្រឆាំង​ខ្លួនប្រមាណ​៧០០​នាក់​តាំងពី​ពេល​ខ្លួន​ធ្វើ​រដ្ឋប្រហារ​០១​កុម្ភៈ​មក​៕

​រូប​បង្ហាញ​ក្នុង​បណ្តាញ​សង្គម ទំនង​ជា​លោក​លោក​យូគី គី​តា​ហ្ស៊ុ​យ​មី ត្រូវ​ប៉ូលិស​នាំខ្លួន​

​ប៉ូលិស​បង្ក្រាប​បាតុកម្ម ឈរ​ត្រៀម​នៅ​ផ្លូវ​មួយ​ក្នុង​ក្រុង​យ៉ាងហ្គោន​នៅ​ថ្ងៃ​សុក្រ​ទី​២៦​កុម្ភៈ​នេះ​