មន្ត្រីជាន់ខ្ពស់​ក្រសួងបរិស្ថានៈ របាយការណ៍​របស់​អង្គការ លើកលែងទោស​អន្តរជាតិ ជា​របាយការណ៍​រិះគន់ ដើម្បី​បំផ្លាញ និង​បង្កប់​ដោយ​របៀបវារៈ នយោបាយ​ទុច្ចរិត ការពារ​អ្នក​បំពាន​ច្បាប់​


​ដោយៈ ដេប៉ូ / ភ្នំពេញៈ នៅ​ថ្ងៃទី​២៦ ខែកុម្ភៈ ឆ្នាំ​២០២១ នេះ មន្ត្រីជាន់ខ្ពស់​ក្រសួងបរិស្ថាន បានធ្វើការ​វាយបក លើ​សេចក្តីថ្លែងការណ៍ របស់​អង្គការ​លើកលែង ទោស​អន្តរជាតិ (Amnesty International) ទាក់ទង​នឹង​ស្ថានភាព នៃ​ការការពារ និង​អភិរក្ស​ដែន​ជម្រក សត្វព្រៃ​ព្រៃ​ឡង់ ដែល​អង្គការ​នេះ បាន​ប្រើប្រាស់​រូបភាព ផ្សាយរ​ណ​ពិពណ៌នា ពីបទ​ល្មើស និង​ការទាមទារ ឱ្យ​ក្រុម​បណ្តាញ​សហគមន៍​ព្រៃ​ឡង់ គ្មាន​ច្បាប់​បន្តសកម្មភាព​បែប អនាធិបតេយ្យ​របស់ខ្លួន នៅក្នុង​វិស័យ​បរិស្ថាន និង​ធនធានធម្មជាតិ​។​

​ជុំវិញ​បញ្ហា​នេះ លោក នេត្រ ភក្ត្រា​រដ្ឋលេខាធិការ​ក្រសួងបរិស្ថាន បានចាត់ទុក សេចក្តីថ្លែងការណ៍ បែប​ទម្លាប់​អាក្រក់ ដែល​អង្គការ​មួយ​នេះ ធ្វើឡើង ក្នុង​ចរិត​រិះគន់ ដើម្បី​បំផ្លាញ​កម្ពុជា ជ្រក​ក្រោម​ស្លាក​សិទ្ធិមនុស្ស សេរីភាព និង​ប្រជាធិបតេយ្យ និង​ការពារ​ក្រុម​ជន​បំពាន​ច្បាប់​។​

​រដ្ឋលេខាធិការ​ក្រសួងបរិស្ថាន បាន​មានប្រសាសន៍ថាៈ ” អង្គការ​លើកលែងទោស​អន្តរជាតិ តែងតែ​ចេញ​សេចក្តីថ្លែងការណ៍ ផ្តល់​ការគាំទ្រ និង​លើកទឹកចិត្ត ក្រុម​ជន​បំពាន​ច្បាប់ និង​ញុះញង់ ដោយ​មិនចេះ​ខ្មាសអៀន ឱ្យ​ជន​ទាំងនោះ បន្ត​ប្រព្រឹត្ត​ល្មើសច្បាប់​។ អង្គការ​នេះ គួរ​ប្រកាន់យក​ភាពស្មោះត្រង់ សុ​ច្ចរិតភាព និង​វិជ្ជាជីវៈ​ក្នុង​ការចេញ​សេចក្តីថ្លែងការណ៍ ណាមួយ ” ។​

​ជុំវិញ​បញ្ហា​នេះ លោក នេត្រ ភក្ត្រា បាន​ថ្លែងថាៈ ” ដើម្បី​ធ្វើឱ្យ​សេចក្តីថ្លែងការណ៍ របស់ខ្លួន ទាក់ទាញ​ការចាប់អារម្មណ៍ អង្គការ​លើកលែងទោស​អន្តរជាតិ បាន​បំភ្លៃ​ការពិត​លើ ការប្រើប្រាស់​រូបភាព ផ្កាយរណប អំពី​រថយន្ត​ដឹកនាំ​ឈើ និង​ការសម្អាត​ដៃ ដែល​តាម​ការពិត ទីតាំង​មួយចំនួន ដែល​អង្គការ​នេះ​ថា ស្ថិតក្នុង​ដែន​ជម្រក សត្វព្រៃ​ព្រៃ​ឡង់ គឺជា​ទីតាំង ដែល​បាន​បោសសម្អាត នៅក្នុង​គម្រោង សម្បទាន​ដី​សេដ្ឋកិច្ច របស់​ក្រុមហ៊ុន​ឯកជន​។​

​លោក​បាន​ចាត់ទុកថាៈ នេះ​គឺជា​កំហុស​វិជ្ជាជីវៈ​មួយ ដែល​អង្គការ​លើកលែង ទោស​អន្តរជាតិ ដែល​តាំងខ្លួន​ជា​ជើងឯក ផ្នែក​សិទ្ធិមនុស្ស បាន​បំភ្លៃ​លើ​ទិន្នន័យ​ផ្កាយរណប ដើម្បី​ពិពណ៌នា ការបាត់បង់​ព្រៃឈើ តាមរបៀប​វារៈ​ទុច្ចរិត​របស់ខ្លួន ក្នុងទិសដៅ​បំភ្លៃ​ការពិត​។​

​មន្ត្រីជាន់ខ្ពស់ ក្រសួងបរិស្ថាន​រូបនេះ បាន​ថ្លែង​បន្ថែមថាៈ បទល្មើស​ធនធានធម្មជាតិ ពិតជា​នៅ​បន្ត​កើតមាន នៅក្នុង​តំបន់ការពារធម្មជាតិ រួម​នឹង​ដែន​ជម្រក សត្វព្រៃ​ព្រៃ​ឡង់ បើទោះបីជា​មន្ត្រី​ឧ​ទ្យា​នុ​រក្ស និង​កម្លាំង​សមត្ថ កិច្ច​ពាក់ព័ន្ធ​រួម​នឹង​សហគមន៍ តំបន់ការពារធម្មជាតិ ខិតខំ​ប្រឹងប្រែង​ទាំងយប់ ទាំង​ថ្ងៃ ក្នុង​ការចុះ​ល្បាត ទប់ស្កាត់​បង្ក្រាប​បទល្មើស​។ ប៉ុន្តែ​បទល្មើស​ទ្រង់ទ្រាយ​ធំ​លែងមានទៀតហើយ នៅមាន​កើតឡើង​បទល្មើស ទ្រង់ទ្រាយ​តូចៗ ដែល​ជនល្មើស មួយចំនួន បន្ត​លួច​ធ្វើ​សកម្មភាព ដោយ​លួចលាក់​កាប់​ឈើ និង​ទន្ទ្រាន​កាន់កាប់​ដីព្រៃ ដោយ​ខុសច្បាប់​។ លោក​បានបញ្ជាក់​បន្ថែម​ថាៈ ស្ថានភាព វា​មិនអាក្រក់ ដូច​អ្វីដែល​ក្រុម​អង្គការ​សង្គម​ស៊ីវិល​ខ្លះ និង​ក្រុម​សកម្មជន នយោបាយ ព្យាយាម​បំប៉ោង​ព័ត៌មាន​នោះទេ​។​

​ជាមួយគ្នានេះ លោក​រដ្ឋលេខាធិការ បានលើកឡើង​ថាៈ ក្នុងការ​អនុវត្ត​ច្បាប់ ដើម្បី​ទប់ស្កាត់ និង​បង្ក្រាប​បទល្មើស ធនធានធម្មជាតិ នៅ​ឆ្នាំ​២០២០ កន្លងទៅនេះ មន្ត្រី​ឧ​ទ្យា​នុ​រក្ស នៃ​ក្រសួងបរិស្ថាន និង​សហគមន៍ តំបន់ការពារធម្មជាតិ ដោយមាន​ការគាំទ្រ ពី​គម្រោង​ព្រៃ​ឡង់​បៃតង​របស់ USAID ផង បាន​ចុះ​ល្បាត​ចំនួន ១.៧២៨ លើក បង្ក្រាប​បទល្មើស បាន​ចំនួន ១.០១៩ ករណី ក្នុង​នោះបាន​បញ្ជូន​សំណុំរឿង ទៅ​តុលាការ​ចំនួន ៤៧ ករណី រឹបអូស​រណា​យន្ត បាន​ចំនួន ៤៨១ គ្រឿង គោយន្ត​កន្ត្រៃ ចំនួន ១១៦ គ្រឿង រឹបអូស​ម៉ូតូ​ចំនួន ៤៧ គ្រឿង ដោះ​អន្ទាក់​ចេញពី​តំបន់​ព្រៃ​ឡង់ បាន​ចំនួន ២.៦៣០ អន្ទាក់ ដកហូត​កាំភ្លើង​កែច្នៃ ចំនួន ១១៧​ដើម ដកហូត​ឈើ​បាន​ចំនួន ២៧៥ ម៉ែត្រគូប ពិន័យ​អន្តរការណ៍ ចំនួន ៦៩ ករណី និង​ធ្វើ​កិច្ចសន្យា និង​អប់រំ ចំនួន ៣៧៩ ករណី​។​

​រដ្ឋលេខាធិការ ក្រសួងបរិស្ថាន បាន​ថ្លែងថាៈ សេចក្តីថ្លែងការណ៍ ដែល​បង្កប់ ដោយ​របៀបវារៈ នយោបាយ​ទុច្ចរិត របស់​អង្គការ​លើកលែងទោស​អន្តរជាតិ​នេះ នឹង​បន្ទរ​ដោយ​ក្រុម​សង្គម​ស៊ីវិល ក្នុងស្រុក ដែល​ភាគច្រើន ធ្វើ​សកម្មភាព ដោយ​គ្មាន​ច្បាប់ ហើយ​ព្យាយាម​បន្ត​តាំងខ្លួន ជា​តួឯក​ផ្នែក​សិទ្ធិមនុស្ស និង​ប្រជាធិបតេយ្យ ដើម្បី​ផលចំណេញ​នយោបាយ សម្រាប់​ក្រុម​ខ្លួន ដោយ​មិន​គិតពី គោលការណ៍​ច្បាប់​ជាធំ​។​

​ទាក់ទង​នឹង​បណ្តាញ សហគមន៍​ព្រៃ​ឡង់​វិញ ត្រូវបាន​លោក នេត្រ ភក្ត្រា លើកឡើងថាៈ បណ្តាញ​សហគមន៍​ព្រៃ​ឡង់ គឺជា​យន្តការ​ប្រតិបត្តិ​ការ ក្រោម​ទម្រង់ សមាគម និង​អង្គការ​មិនមែន​រដ្ឋាភិបាល ប៉ុន្តែ​មិនបាន​ចុះបញ្ជី​ទទួលស្គាល់​តាមផ្លូវ​ច្បាប់ ជាពិសេស​ច្បាប់ ស្តីពី​សមាគម និង​អង្គការ​មិនមែន រដ្ឋាភិបាល ហើយ​ថ្មីៗ​នេះ យោងតាម​សេចក្តីជូនដំណឹង របស់​ទីស្តីការគណៈរដ្ឋមន្ត្រី ចុះ​ខែសីហា ឆ្នាំ​២០២០ ក៏បាន​តម្រូវ បណ្តាញ​នេះ​ទៅ​ចុះបញ្ជី​ត្រឹមត្រូវ តាម​នីតិវិធី​ច្បាប់ ដើម្បី​មាន​នីតិសម្បទា​គ្រប់គ្រាន់ ក្នុងការ​សហការ និង​អនុវត្ត​សកម្មភាព ការងារ​របស់ខ្លួន ជាមួយ​ក្រសួង ស្ថាប័ន មាន​សមត្ថកិច្ច​របស​រាជរដ្ឋាភិបាល​។​

​លោក​បាន​ថ្លែងថាៈ អ្វីដែល​សមាជិក​នៃ បណ្តាញ​សហគមន៍​ព្រៃ​ឡង់​នេះ បាននិងកំពុង​ធ្វើ ស្ថិតក្រោម​ការសម្របសម្រួល និង​គាំទ្រ​មួយ​ច្បាស់លាស់ ពី​ក្រុម​ជន​មួយក្រុម​តូច ដែលមាន​របៀប​វារៈន​យោ​បាយ ក្នុងការ​បំផ្លាញ​កេរ្តិ៍ឈ្មោះ​កម្ពុជា បង្កើត​ភាពអនាធិបតេយ្យ និង​ចិញ្ចឹម​ទំនាស់ លើ​វិស័យ​បរិស្ថាន និង​ធនធានធម្មជាតិ​។​

​ទន្ទឹមគ្នានេះ លោក រដ្ឋលេខាធិការ ក្រសួងបរិស្ថាន បានប្រកាសថាៈ ក្រសួងបរិស្ថាន រីករាយ និង​ស្វាគមន៍​ជានិច្ច នូវ​រាល់​ការចូលរួម​ការពារ និង​អភិរក្ស ធនធានធម្មជាតិ និង​ជីវៈចម្រុះ​នានា ក្នុង​តំបន់ការពារធម្មជាតិ សម្រាប់​ដៃគូ​ទាំងឡាយណា ដែល​បាន​គោរព តាម​គោលការណ៍​ណែនាំ នីតិវិធី​ច្បាប់ និង​លិខិតបទដ្ឋាន គតិយុត្ត​ត្រឹមត្រូវ​។ ក្រសួងបរិស្ថាន​គ្មាន​ផលប្រយោជន៍​អ្វី​ទៅ​ប្រឆាំងនឹង​អ្នក​ស្រឡាញ់ និង​ចូលរួម​ការពារ​ធនធាន​ធម្មជាតិ​ឡើយ ប៉ុន្តែ​តម្រូវឱ្យ​ទាំងអស់គ្នា គោរព​ច្បាប់​ជា​ធរមាន និង​ធ្វើ​សកម្មភាព ស្របតាម​ច្បាប់​កំណត់ និង​ដោយ​ក្តី​ស្មោះត្រង់ ក្នុង​ភាពជា​ដៃគូ ដើម្បី​រួម​កម្លាំង​គ្នា ថែរក្សា​ធនធានធម្មជាតិ​កម្ពុជា ឱ្យបាន​គង់វង្ស សម្រាប់​មនុស្ស រាប់​ជំនាន់ ត​ទៅមុខទៀត​។​

​លោក នេត្រ ភក្ត្រា បានលើកឡើង​ថាៈ កន្លងទៅនេះ ក្រសួងបរិស្ថាន បាន​ពិនិត្យឃើញថា មាន​អង្គការ​មិនមែន​រដ្ឋាភិបាល និង​សមាគម​មួយចំនួន ដែល​ពុំបាន​ចុះបញ្ជី ឬ​កិច្ចព្រមព្រៀង​ត្រឹមត្រូវ តាមច្បាប់ បាននិងកំពុង​ធ្វើ​សកម្មភាព យ៉ាង​អនាធិបតេយ្យ ក្នុង​តំបន់ការពារធម្មជាតិ ដែល​ស្ថិតនៅក្រោម​សមត្ថកិច្ច គ្រប់គ្រង​របស់​ក្រសួងបរិស្ថាន​។ សកម្មភាព​បំពាន​លើ​ច្បាប់ យ៉ាង​គឃ្លើន​បែបនេះ ដោយ​ជ្រក​ក្រោម​ស្លាក ជា​អ្នក​ស្រឡាញ់​បរិស្ថាន និង​ធនធានធម្មជាតិ គឺជា​ចេតនា​ទុច្ចរិត ក្នុង​ការធ្វើ​វិទ្ធង្សនា ប្រឆាំងនឹង​រាជរដ្ឋាភិបាល លើ​ការងារ​គ្រប់គ្រង និង​អភិរក្ស​ធនធានធម្មជាតិ តែប៉ុណ្ណោះ​។ ចំពោះ​អង្គការ​មិនមែន​រដ្ឋាភិបាល ឬ​សមាគម​ណា ដែល​នៅតែ​បន្ត​បំពាន ធ្វើ​សកម្មភាព យ៉ាង​អនាធិបតេយ្យ និង​ខុសច្បាប់ ក្នុង​តំបន់ការពារធម្មជាតិ ក្រសួងបរិស្ថាន គ្មាន​ជម្រើស​អ្វី ក្រៅពី​ការអនុវត្ត វិធានការ​ច្បាប់ ជាពិសេស​ច្បាប់ ស្តីពី​តំបន់ការពារធម្មជាតិ ដើម្បី​ទប់ស្កាត់ និង​បញ្ឈប់​សកម្មភាព បែបនេះ​ទេ ហើយ​ក្រសួង ក៏​ស្នើ​សុំឱ្យ​អាជ្ញាធរ​ពាក់ព័ន្ធ ជួយ​តាមដាន ពិនិត្យ និង​ចាត់វិធានការ​តាមច្បាប់ ទៅលើ​អង្គការ​មិនមែន​រដ្ឋាភិបាល ឬ​សមាគម​ណា ដែល​ធ្វើ​សកម្មភាព ដោយ​មិនមាន​ច្បាប់​ត្រឹមត្រូវ​។

​ពាក់ព័ន្ធ​ក្នុង​រឿងនេះ លោក​រដ្ឋលេខាធិការ ក្រសួងបរិស្ថាន បាន​ប្រាប់​ទៅ​ក្រុម​អង្គការ​សង្គម​ស៊ីវិល និង​ក្រុម​សកម្មជន នយោបាយ ជ្រក​ក្រោម​ស្លាក អ្នក​ស្រឡាញ់​បរិស្ថាន និង​ធនធានធម្មជាតិ​ថាៈ ” សូម​អស់លោក​កុំ​មាន​ជំងឺ តួឯក​ក្នុង​វិស័យ​បរិស្ថាន និង​ធនធានធម្មជាតិ​! យើងខ្ញុំ​គ្មាន​ជំងឺ​តួឯក​នេះ​ដូច​អ្នក​ទេ​។ តួឯក​របស់​យើងខ្ញុំ គឺ​ធនធានធម្មជាតិ និង​ជីវៈចម្រុះ​ដែល​កម្ពុ​ជាមាន ហើយ​យើងខ្ញុំ ខិតខំ​ប្រឹងប្រែង​ការពារ និង​អភិរក្ស ដើម្បី​ប្រយោជន៍​មនុស្ស រាប់​ជំនាន់​ទៅមុខទៀត “៕/V

ទីតាំងផ្សាយពាណិជ្ជកម្ម

- Advertisment -

Most Popular