Home ព័ត៌មានអន្តរជាតិ បៃ​ដិន ៖ ការទ...

បៃ​ដិន ៖ ការទម្លាក់​គ្រាប់បែក​នៅ​ស៊ី​រី​ជាការ​ព្រមាន​ដល់​អ៊ីរ៉ង់​

​ប្រែ​សម្រួល : កញ្ញា​ដា​លី​ស ៖ ប្រធានាធិបតី​ចូ បៃ​ដិនបាន​និយាយ​កាលពី​ថ្ងៃ​សុក្រ​ថា​ការវាយប្រហារ​តាម​អាកាស​របស់​សហរដ្ឋ​អាម៉េរិក​ប្រឆាំង​នឹង​កងជីវពល​ដែល​គាំទ្រ​ដោយ​អ៊ីរ៉ង់​នៅ​ភាគ​ខាងកើត​ប្រទេស​ស៊ី​រី​គួរតែ​ត្រូវបាន​អ៊ីរ៉ង់​ចាត់ទុក​ជា​ការព្រមាន​។​

​នៅពេល​សួរ​ថា​តើ​សារ​ពី​ការវាយប្រហារ​តាម​អាកាស​នោះ​គឺជា​អ្វី លោកបៃ​ដិ​ននិយាយថា “​អ្នក​មិន​អាច​ធ្វើ​សកម្មភាព​ដោយ​គ្មា​ននិទណ្ឌភាព​បានទេ​”​។​

​និយាយ​នៅ​ទីក្រុង​ហ៊ូស្តុន​ក្នុងអំឡុង​ដំណើរ​ចុះ​ផ្តល់​ជំនួយ​សង្គ្រោះបន្ទាប់​ពី​ព្យុះ​រដូវរងា​ដ៏​ធំ​នៅក្នុង​រដ្ឋ​តិច​សាស លោក​បាន​បន្ថែមថា “​ត្រូវ​ប្រយ័ត្ន​ខ្លួន​”​។​

​មុន​នេះ​រដ្ឋមន្ត្រី​ព័ត៌មាន​របស់​លោកបៃ​ដិន​លោកស្រី ជេ​ន ភី​សា​គី បាន​ហៅ​ការ​វាយ​តាម​អាកាស​នេះ​ថា​ជា “​សារ​ច្បាស់លាស់​” ថា​លោកបៃ​ដិន “​នឹង​ចាត់​វិធានការ​ដើម្បី​ការពារ​ជនជាតិ​អាម៉េរិក ហើយ​នៅពេល​ការគំរាមកំហែង​បាន​លេចឡើង គាត់​មាន​សិទ្ធិ​ចាត់វិធានការ​តាម​ពេលវេលា​និង​តាម​ចរិតលក្ខណៈ​នៃ​ការជ្រើសរើស​របស់គាត់​”​។​

​មន្ទីរ​បញ្ច​កោណ​បាន​និយាយថា ការវាយប្រហារ​កាលពី​ថ្ងៃ​ព្រហស្បតិ៍ ដែល​យោង​តាម​ក្រុម​ឃ្លាំ​មើល​សង្គ្រាម​ស៊ី​រី​បាន​សម្លាប់​សមាជិក​កង​ជីវ​ពល ២២ នាក់ គឺជា​ការឆ្លើយតប​នឹង​ការវាយប្រហារ​ដោយ​រ៉ុក្កែត​ជា​បន្តបន្ទាប់​សំដៅ​ទៅលើ​ទាហាន​អាម៉េរិក​នៅក្នុង​ប្រទេស​អ៊ីរ៉ាក់​។​

​ការវាយប្រហារ​មួយ​ក្នុងចំណោម​ការវាយប្រហា​រ​ជាច្រើន​ទៅលើ​ទីតាំង​យោធា​មួយ​ក្នុង​រដ្ឋធានី​អាប៊ី​លរបស់​ពួក​ឃឺ​ដ​កាលពី​ថ្ងៃទី ១៥ ខែ​កុម្ភៈ​បាន​សម្លាប់​ជន​ស៊ីវិល​ម្នាក់​និង​អ្នកម៉ៅការ​បរទេស​ម្នាក់​ដែល​ធ្វើការ​ជាមួយ​កងកម្លាំង​ចម្រុះ និង​បណ្តាលឱ្យ​របួស​អ្នកម៉ៅការ​អាម៉េរិក​ជាច្រើន​នាក់​និង​ទាហាន​អាម៉េរិក​ម្នាក់​។​

​លោកស្រី​ភី​សា​គី​និយាយ​ថា​ការសម្រេចចិត្ត​នៅ​ពីក្រោយ​ការវាយប្រហារ​នេះ​គឺជា “​ការគិតគូរ​ពិចារណា​ហ្មត់ចត់​” ហើយ​គោលបំណង​របស់​លោកបៃ​ដិន​គឺ​ដើម្បី “​បន្ថយ​សកម្មភាព​វាយប្រហារ​ទាំង​នៅ​ស៊ី​រី​និង​អ៊ីរ៉ាក់​”​។​

​អ្នកនាំពាក្យ​មន្ទីរ​បញ្ច​កោណ​លោក ច​ន កឺ​ប៊ី និយាយថា យន្តហោះ F-15E “Strike Eagles” ចំនួន ២ គ្រឿង​បាន​ទម្លាក់​គ្រាប់បែក​ចំនួន ៧ គ្រាប់ ដោយ​បំផ្លាញ​ទាំងស្រុង​នូវ​ទីតាំង​ចំនួន ៩ និង​បំផ្លាញ​ផ្នែក​ខ្លះ​នៃ​ទីតាំង​ចំនួន ២ ទៀត​។​

​លោក​កឺប៊ី​និយាយថា ទីតាំង ដែល​ត្រូវបាន​កំណត់​គោលដៅ​វាយ​កម្ទេចចោល​នៅ​ជិត​ព្រំដែន​ស៊ី​រី​-​អ៊ីរ៉ាក់ ត្រូវបាន​គេ​ដឹងថា​ជួយ​សម្រួល​ដល់​សកម្មភាព​របស់​ក្រុម​ជីវពល​ដែល​គាំទ្រ​ដោយ​អ៊ីរ៉ង់​។​

​លោក​និយាយថា មន្ទីរ​ប៉ង់​បញ្ច​កោណ​មាន “​សេចក្តីលម្អិត​បឋម​អំ​ពី​ការស្លាប់​និង​របួស​” ប៉ុន្តែ​បដិសេធ​មិន​បង្ហាញ​តួលេខ​នេះ​ទេ​៕

​លោកបៃ​ដិន​ព្រមាន​អ៊ីរ៉ង់​តាមរយៈ​ការវាយប្រហារ​នៅ​ស៊ី​រី ក្នុងអំឡុង​ដំណើរ​ចុះ​ផ្តល់​ជំនួយ​សង្គ្រោះ​បន្ទាប់​ពី​ព្យុះ​រដូវរងា​ដ៏​ធំ​នៅក្នុង​រដ្ឋ​តិច​សាស​

ទីតាំងផ្សាយពាណិជ្ជកម្ម

- Advertisment -

Most Popular