​ទោះជា​កូ​វីដ ក៏​អ្នក​ចូលចិត្ត​ជួបជុំ​ផឹកស៊ី មិន​ខ្វល់​!

​ដោយ​៖ ម៉េង​ឆៃ / ភ្នំពេញ​៖ កាលពី​ម៉ោង ១០:៣៥​នាទី យប់​ថ្ងៃទី​២៦ ខែកុម្ភ​: ឆ្នាំ​២០២១ ស្នងការដ្ឋាន​នគរបាល​រាជធានី​ភ្នំពេញ ទទួលបាន​ខំ​មិន​តាម​ហ្វេ​ស​ប៊ុ​ក​ពី​ប្រជាពលរដ្ឋ​ភ្លាម ក្រុមការងារ​ព័ត៌មាន និង​ប្រតិកម្ម​រហ័ស​នៃ​ស្នងការដ្ឋាន​នគរបាល​រាជធានី​ភ្នំពេញ បាន​ផ្តល់ព័ត៌មាន ទៅ​សមត្ថកិច្ច​ប៉ុស្តិ៍នគរបាល​រដ្ឋបាល ច្រាំង​ចំរេះ​២ ខណ្ឌ​ឬ​ស្សី​កែវ ចុះ​ដល់ទី​តាំង​ជួបជុំ​ផឹកស៊ី ចាក់ធុងបាស់ បង្ក​សំឡេង​រំខាន​ដល់​អ្នកជិតខាង ឲ្យ​បញ្ឈប់​សកម្មភាព​ភ្លាម​។​

​កងកម្លាំង​ប៉ូលិស ក៏បាន​ណែនាំ​ដល់​ប្រជាពលរដ្ឋ ពិសេស​ក្រុម​អ្នក​ចូលចិត្ត​ជួបជុំ​ផឹកស៊ី ចាក់ធុងបាស​ច្រៀង​រាំ អា​ឡេ​អា​ឡូ មិន​ស្គាល់​យប់ មិន​ស្គាល់​ថ្ងៃ​ទាំងនោះ សូម​ចូលរួម​អនុវត្តតាម​ការណែនាំរ​បស់​ក្រសួងសុខាភិបាល ដើម្បី​បង្ការ និង​ទប់ស្កាត់​ការឆ្លង​រាលដាល​វីរុស​កូ​វីដ​១៩​។

​ក្រុម​អ្នក​ចូលចិត្ត​ផឹកស៊ី អា​ឡេ​អា​ឡូ​របៀបនេះ មាន​កាន់តែ​ច្រើនឡើងៗ ពិសេស​នៅតាម​ផ្ទះជួល មិន​ថា ទីណា​ណា​ទេ ក្នុង​រាជធានី​ភ្នំពេញ គឺ​ក្រុម​នេះ មិនដឹងថា ថ្ងៃ​ឈប់សម្រាក សៅរ៍​អាទិត្យ ចុង​សប្តាហ៍ ឬក៏​ថ្ងៃ​ចន្ទ​អង្គារ​ទេ ហើយក៏​មិនដឹង​ថ្ងៃ ឬ​យប់ ឬក៏​បង្ក​ការរំខាន​ដល់​អ្នកជិតខាង​ណា​ឡើយ ពួកគេ​ដឹង​តែ​ពី​ជួបជុំ ផឹកស៊ី ចាក់ធុងបាស ច្រៀង​រាំ​តាម​អំពើ​ចិត្ត​។​

​អ្នក​ដែល​គេ​មានផ្ទះ​សម្បែង និង​អ្នកមាន​ទ្រព្យ គឺ​មិន​ចូលចិត្ត​សកម្មភាព​បែប​ពាលា​ដូច្នេះ​ទេ​។ តែ​ដោយ​ច្រើន​នោះ ជា​ក្រុម​អ្នក​ជួល​ផ្ទះ​គេ​ស្នាក់នៅ ជា​អ្នករត់ម៉ូតូឌុប ម៉ូតូ​កង់​បី ជា​អ្នកលក់​តាម​រទេះ កម្មករ​រោងចក្រ កម្មករសំណង់​មួយ​ភាគ​ណាមួយ ច្រើនតែ​និយម​ផឹកស៊ី ច្រៀង​រាំ បង្ក​ការរំខាន​ដល់​គេឯង​។​

​អ្នក​ចូលចិត្ត​ផឹកស្រា ក្លែម​ចំរៀង​នេះ បែប​មិន​បានដឹង​ទេ​ថា ការផឹក​ស្រា​គ្រឿង​ស្រវឹង នាំមក​នូវ​វិនាស ៦​ប្រការ រួមមាន​៖ ១-​អស់​លុយកាក់ ២-​បង្កជម្លោះ ៣-​កើត​ជំងឺ ៤-​ខូច​ឈ្មោះ ៥-​បង្ហាញ​កេរ្តិ៍ខ្មាស់​ទាំង​រស់ និង​៦-​បាត់បង​បញ្ញា​។

​ក្នុងពេល​បច្ចុប្បន្ននេះ​ទៀត ការផឹក​ស្រា​ស្រវឹង​ជោគជាំ ហើយ​បើកបរ មិន​ថា ម៉ូតូ ឬ​ឡាន​ទេ គឺ បង្ក​គ្រោះថ្នាក់ បណ្តាល​ឲ្យ​របួស ហើយ​រហូតដល់​ស្លាប់ មិន​ត្រឹមតែ​ខ្លួនឯង​ទេ គឺ​បង្ក​គ្រោះថ្នាក់​ដល់​អ្នកដទៃ​ថែមទៀត​។​

​បើសិនជា​អ្នក​ក្បែរ​ខាង​របស់​ក្រុម​ស៊ីផឹក​នោះ ទៅប្រាប់ គឺ​ច្បាស់​ជា​ក្រុម​ផឹកស៊ី​នោះ បង្ករឿង​ឈ្លោះ​ជាមិនខាន​ឡើយ​។ ដូច្នេះ​នៅពេលនេះ ស្រួល​ដែរ ដោយសារតែ​ស្នងការដ្ឋាន​នគរបាល​រាជធានី​ភ្នំពេញ បានទទួល​ខម​មិន​តាម​ហ្វេ​ស​ប៊ុ​ក​ពី​ប្រជាពលរដ្ឋ ហើយក៏​ចាត់ការ​លឿន​ផង គឺ​អ្នក​ក្បែរ​ខាង​ក្រុម​អ្នកផឹកស៊ី​នោះ គ្រាន់តែ​ជូន​ព័ត៌មាន និង​ទីតាំង​ច្បាស់លាស់ ក៏មាន​ប៉ូលិស​សង្កាត់ ចុះទៅ​ណែនាំ​ក្រុម​អ្នកផឹកស៊ី​ទាំងនោះ​តែម្តង​។​

​គួរតែ​ក្រុម​អ្នក​និយម​ផឹកស៊ី​ទាំងនោះ ភ្ញាក់ខ្លួន ខិតខំ​រកស៊ី និង​បើ​ទំនេរ ដេក​យក​កម្លាំង ឬក៏​ទិញ​ម្ហូបអាហារ ហូបចុក ជួបជុំ​ប្រពន្ធ​កូន ហើយ​ដេក​ទៅ​។

​រីឯ​ម្ចាស់​ផ្ទះជួល ក៏​គួរតែ​ហាមឃាត់ និង​កំណត់​ឲ្យ​ច្បាស់ កុំ​ឲ្យ​មានការ​ជួបជុំ​ផឹកស៊ី ជាប្រចាំ​ដូច្នេះ​។ មិនមែន​ថា មិន​ឲ្យ​ផឹក​សោះ​ទេ តែ​ការជួបជុំ​ផឹកស៊ី ចាក់​ធុង​ប៉ាស់ រាំច្រៀង​នោះ មាន នៅ​ថ្ងៃ​ចុង​សប្តាហ៍ ឬ​ថ្ងៃ​បុណ្យទាន ចូលឆ្នាំ ភ្ជុំ ហើយក៏​មាន​ម៉ោង​ពេល​។ នៅពេល​យប់ៗ យ៉ាងយូរ ត្រឹម​ម៉ោង ១០ យប់ ដោយ​ទុកពេល​ឲ្យ​អ្នកជិតខាង បាន​សម្រាក ដេក​ពួន​ផង​។​

​អាជ្ញាធរ​សមត្ថកិច្ច ដែនដី ក៏​គួរតែ​អនុវត្ត ដូច​កងកម្លាំង​សមត្ថកិច្ច​យើង​បាន​អនុវត្ត​កន្លងមក​។ នៅពេល​ទទួលបាន​បណ្តឹង​របស់​ប្រជាពលរដ្ឋ ចុះ​ភ្លាម មិន​ថា យប់ មិន​ថា​ថ្ងៃ ដើម្បី​ទប់ស្កាត់​ជម្លោះ ព្រោះថា អ្នកផឹកស៊ី បើសិនជា អ្នកជិតខាង ហ៊ាន​ទៅប្រាប់ សុំ​ឲ្យ​ឈប់​ប​បង្ក​សំឡេង​រំខាន នោះ​ច្បាស់​ណាស់​ថា អ្នក​ផឹកស្រា តែងតែ​ជជែក និង​ស្រែក​ឡូឡា រករឿង​ឈ្លោះ ព្រោះ​វង្វេងស្មារតី ដោយសារ​ទឹកស្រវឹង ហើយ​បើ​មាន​ជន​ណាមួយ ហ៊ាន​មាត់ធំ​ដាក់​នោះ គឺ​ឈ្លោះ​គ្នា ឈានដល់​វ៉ៃតប់ ហើយ​បើ​មាន​កាំភ្លើង​បាញ់​ភ្លាម​។ ករណីនេះ បាន​កើតមាន​រួចហើយ ក្នុងសង្គម​យើង​។​

​ដូច្នេះ សូម​ឲ្យ​អ្នក​និយម​ផឹកស៊ី​តាម​ផ្ទះ បង្ក​សំឡេង​រំខាន​អ្នកជិតខាង គួរតែ​ភ្ញាក់ខ្លួន ព្រោះ​ពេលនេះ​កូ​វីដ​កំពុង​រាតត្បាត ហើយ​បើ​ថា ជួបជុំ​ស៊ីផឹក ក៏​ផឹក​ដោយ​ថ្លៃថ្នូរ មិន​បង្ក​ការរំខាន ក្តៅក្រហាយ​ដល់​អ្នកជិតខាង ក្រែងលោ អាច​បាន​ផឹកស៊ី សប្បាយ​បានយូរ​។ បើ​មិន​ដូច្នេះ​ទេ ច្បាស់​ជា​ត្រូវ​ប៉ូលិស ចុះមក​អប់រំ ណែនាំ ហើយ​ថត​បង្ហោះ​ហ្វេ​ស​ប៊ុ​ក ឲ្យ​ខ្មាស់​គេ ជាមិនខាន​។ មាន​លុយ​ផឹកស៊ី​ហើយ សូមកុំ​ឲ្យ​ខ្មាស់​គេ​៕​

ទីតាំងផ្សាយពាណិជ្ជកម្ម

- Advertisment -

Most Popular