Home ព័ត៌មានសំខាន់ៗ មេបញ្ជាការអង្...

មេបញ្ជាការអង្គរក្ស : ឧក្រិដ្ឋជនជម្រិតទារប្រាក់ដែលប៉េអឹមបាញ់សម្លាប់មិនមែនជាមន្ត្រីបញ្ជាការដ្ឋានអង្គរក្សទេ

ដោយៈ មុនីរ័ត្ន/ភ្នំពេញៈ មេបញ្ជាការដ្ឋាន បញ្ជាការដ្ឋានអង្គរក្ស នាយឧត្តមសេនីយ៍ ហ៊ីង ប៊ុនហៀង បានបដិសេធថា ឧក្រិដ្ឋជនដែលកងកម្លាំងកងរាជអាវុធហត្ថរាជធានីភ្នំពេញ បាញ់សម្លាប់នៅក្នុងប្រតិបត្តិការបង្ក្រាបក្រុមឧក្រិដ្ឋជនជម្រិតទារប្រាក់ ១លានដុល្លារ ពីជនរងគ្រោះនៅក្នុងភូមិគ្រឹះ ក្នុងបុរីអង្គរភ្នំពេញ ភូមិបន្លាស្អិត សង្កាត់ឃ្មួញ ខណ្ឌសែនសុខ មិនជាមន្ត្រីនៅបញ្ជាការដ្ឋានអង្គរក្សនោះទេ។

ការបដិសេធរបស់នាយឧត្តមសេនីយ៍ ហ៊ីង ប៊ុនហៀង បានធ្វើឡើងបន្ទាប់ពីបណ្តាញសង្គមហ្វេសប៊ុកបានបង្ហោះរូបភាពបុរសម្នាក់ស្លៀកឯកសណ្ឋានពាក់ប៉ារ៉ា និងកាតសម្គាល់ខ្លួន ដោយបានភ្ជាប់រូបភាពជនល្មើសម្នាក់ដែលកងរាជអាវុធហត្ថបាញ់សម្លាប់។

នាយឧត្តមសេនីយ៍ ហ៊ីង ប៊ុនហៀង បានមានប្រសាសន៍ប្រាប់រស្មីកម្ពុជានៅយប់ថ្ងៃទី១ ខែមីនានេះថា រូបភាពដែលបង្ហោះនៅក្នុងបណ្តាញសង្គមហ្វេសប៊ុកនោះ គឺមិនមែនជាមន្ត្រីបញ្ជាការដ្ឋានអង្គរក្សនោះទេ គឺក្លែងក្លាយ។
នាយឧត្តមសេនីយ៍ ហ៊ីង ប៊ុនហៀងបានបញ្ជាក់យ៉ាងដូច្នេះថា “រូបភាពនេះ អត់មានឈ្មោះនៅក្នុងបញ្ជីអង្គរក្សទេ ភាគច្រើនប័ណ្ណពាក់កររបស់បញ្ជាការដ្ឋានអង្គរក្ស គឺមានលេខកូដត្រឹមត្រូវ មានបញ្ជីស្នាមត្រឹមត្រូវ ហើយការធ្វើនេះ គឺក្លែងក្លាយ ពីព្រោះខាងខ្ញុំមានលក្ខណៈពិសេសសម្គាល់ខាងខ្ញុំ ហើយអត់មានពាក់ព័ន្ធជាមួយបញ្ជាការដ្ឋានអង្គរក្ស”។

កម្លាំងកងរាជអាវុធហត្ថរាជធានីភ្នំពេញ បានបើកប្រតិបត្តិការបង្ក្រាបក្រុមឧក្រិដ្ឋជនជម្រិតទារ ប្រាក់ ១លានដុល្លារ ពីជនរងគ្រោះនៅក្នុងបុរីអង្គរភ្នំពេញ ក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ កាលពីវេលាម៉ោងប្រមាណា ១១ព្រឹកថ្ងៃទី១ ខែមីនា ។ នៅក្នុងប្រតិបត្តិការបង្ក្រាបក្រុមឧក្រិដ្ឋជនបានបាញ់ប្រហារមកលើកម្លាំងអាវុធហត្ថ ដោយប្រើសិទ្ធិការពារខ្លួនកម្លាំងអាវុធហត្ថបានបាញ់តបតទៅលើក្រុមឧក្រិដ្ឋជនបណ្តាលឲ្យស្លាប់ចំនួន ៤នាក់។
ជនរងគ្រោះនៅក្នុងផ្ទះវិឡាក្នុងបុរីអង្គរភ្នំពេញ ត្រូវបានរំដោះចេញពីកន្លែងកើតហេតុដោយសុវត្ថិភាព។

ប្រតិបត្តិការបង្ក្រាបក្រុមឧក្រិដ្ឋជន គឺដឹកនាំបញ្ជាផ្ទាល់ដោយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ។

តាមព័ត៍មានបឋម គឺក្រុមឧក្រិដ្ឋជនចំនួន ០៤នាក់ បានចូលប្លន់ក្នុងផ្ទះមួយកន្លែងនៅបុរីអង្គរភ្នំពេញ ដោយរៀបផែនការជំរិយកប្រាក់ មួយលានដុល្លារជាមុន ទើបប្លន់សម្លាប់ម្ចាស់ផ្ទះទាំងប្តីប្រពន្ធនិងកូនឈ្នួលពីរនាក់ ជាក្រោយ ប៉ុន្តែមិនបានសម្រេច។

ក្រុមឧក្រិដ្ឋជនបានប្រើប្រាស់កាំភ្លើងវែង AK មួយដើម និងកាំភ្លើងខ្លី ពីរដើម បានបើការបាញ់ប្រហារមកលើកម្លាំងកងរាជអាវុធហត្ថរាជធានីភ្នំពេញ ហើយកម្លាំងអាវុធហត្ថបានប្រើសិទ្ធិការពារខ្លួន បាញ់តបតត្រឡប់ទៅវិញ បណ្តាលឲ្យក្រុមឧក្រិដ្ឋជនទាំងបួននាក់ ស្លាប់នៅនឹងកន្លែង។

ក្នុងចំណោមឧក្រិដ្ឋជនទាំង ៤នាក់ គឺមានម្នាក់នាក់ ជាដៃកុងឡានរបស់ម្ចាស់ផ្ទះផ្ទាល់។

សេចក្តីរាយការណ៍បានឲ្យដឹងថា ជនរងគ្រោះឈ្មោះ ម៉ៅ ហួរ អាយុ ៥៨ឆ្នាំ ជាអតីតប្រធានសាខាអគ្គីសនីខេត្តកំពង់ចាម។
ចំណែកក្រុមឧក្រិដ្ឋជនទាំង ៤នាក់ ដែលកងរាជអាវុធហត្ថបាញ់សម្លាប់ មិនត្រូវបានបង្ហាញអត្តសញ្ញាណនៅឡើយទេ៕សរន

ទីតាំងផ្សាយពាណិជ្ជកម្ម

Previous articleកាលពីព្រឹកថ្ងៃទី ១ ខែមីនាលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងលោក MIKAMI Masahiro ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា បានអញ្ជើញចុះហត្ថលេខាលើលិខិតប្ដូរសារស្ដីពីការផ្ដល់ហិរញ្ញប្បទានឥតសំណងរបស់ជប៉ុន ដើម្បីអនុវត្ត «គម្រោងអភិវឌ្ឍន៍ចរាចរណ៍នាវា នៅកំពង់ផែស្វយ័តក្រុងព្រះសីហនុ» នៅទីកន្លែងរៀងៗខ្លួន៕
Next articleអភិបាល​រាជធានី​ឧបត្ថម្ភ​ថិ​វិកា​លើកទឹកចិត្ត​២០​លាន​រៀល ដល់​កម្លាំង​អាវុធហត្ថ​រាជធានី​ភ្នំពេញ ក្នុង​ព្រឹត្តិ​ការបង្ក្រាប​ក្រុមចោរប្លន់​និង​ជម្រិត​
- Advertisment -

Most Popular