Home ព័ត៌មានសំខាន់ៗ អ្នកទេសចរ និង...

អ្នកទេសចរ និង​ចំណូល​ពី​អង្គរវត្ត បន្ត​ថយចុះ​ជិត ៩៩% ក្នុង​រយៈពេល ២​ខែ ដើមឆ្នាំ​២០២១

ដោយៈ ម៉េង​ឆៃ / ភ្នំពេញៈ គ្រឹះស្ថាន​អង្គរ បានប្រកាសថា ស្ថិតិ​ភ្ញៀវទេសចរ​បរទេស និង​ចំណូល ដែល​ទទួលបាន​ពី​ការលក់ បណ្ណ​ចូល​ទស្សនា រមណីយដ្ឋាន​អង្គរ ក្នុង​រយៈ ពេល ២ ខែ គឺ​នៅ​ខែមករា និង​ខែកុម្ភៈ ឆ្នាំ​២០២១ មាន​ភ្ញៀវទេសចរ​បរទេស សរុប ៤.១៩៤ នាក់ ធ្លាក់ចុះ ៩៨,៧៧% ធៀប​រយៈពេល​ដូចគ្នា កាលពី​ឆ្នាំ​២០២០ និង​ទទួលបាន​ចំណូល សរុប ១៧២.៨២៣ ដុល្លារ ធ្លាក់ចុះ ៩៨,៩៣% ធៀប​នឹង ២ ខែ​ដើមឆ្នាំ ២០២០​។​

​របាយការណ៍ បង្ហាញថាៈ នៅ​ខែកុម្ភៈ ឆ្នាំ​២០២១ ភ្ញៀវទេសចរ​បរទេស ដែល​បាន​ទិញ បណ្ណ​ចូល​ទស្សនា រមណីយដ្ឋាន​អង្គរ មាន​ចំនួន ២.៩៨១ នាក់ ធ្លាក់ចុះ ៩៧,៤៩% ធៀប​នឹង​ខែកុម្ភៈ ឆ្នាំ​២០២០ និង​ទទួលបាន​ចំណូល ១២២.៣៥៧ ដុល្លារ ធ្លាក់ចុះ ៩៧,៨៤% ធៀប​នឹង​ខែកុម្ភៈ ឆ្នាំ​២០២០​។​

​រីឯ​នៅ​ខែមករា ឆ្នាំ​២០២១ មាន​ភ្ញៀវទេសចរ​បរទេស ១.២១៣ នាក់ បាន​ទិញ​បណ្ណ​ចូល ទស្សនា រមណីយដ្ឋាន​អង្គរ គឺ​ថយចុះ ៩៩,៤៥% ធៀប​នឹង​ខែមករា ឆ្នាំ​២០២០ និង​ទទួល បាន​ចំណូល ៥០.៤៦៦ ដុល្លារ ថយចុះ ៩៩,៥២% ធៀប​នឹង​ខែមករា ឆ្នាំ​២០២០​។​

​យ៉ាងណាក៏ដោយ ក្នុង​រយៈពេល ២ ខែ​ដើមឆ្នាំ ២០២១ ចំណូល​ដែល​បានមកពី​អ្នកទេសចរ ចូល​ទស្សនា​រមណីយដ្ឋាន​អង្គរ នៅ​ខេត្តសៀមរាប ចំនួន ៨.៣៨៨ ដុល្លារ ត្រូវបាន​ឧបត្ថម្ភ ជូន មូលនិធិ​គន្ធបុប្ផា​កម្ពុជា​។​

​ក្នុងនោះ គ្រឹះស្ថាន​អង្គរ ក៏បាន​ប្រកាសថា ក្នុង​រយៈពេល ២​ខែ​ដើមឆ្នាំ ២០២១​ចំណូល​លក់ បណ្ណ នៅ​ប្រាសាទ​កោះកែរ មាន​ចំនួន ១.៩៨០ ដុល្លារ ដែល​បានមកពី​អ្នកទេសចរ​បរទេស ចំនួន ១៣២ នាក់​។ ក្នុង​ខែកុម្ភៈ ៧០ នាក់ ទទួលបាន​ចំណូល ១.០៥០ ដុល្លារ និង​នៅ​ខែ មករា ចំនួន ៦២ នាក់ ទទួលបាន ៩៣០ ដុល្លារ​។​

​ចំនួន​អ្នកទេសចរ​បរទេស បាន​ធ្លាក់ចុះ​យ៉ាងខ្លាំង ដោយសារតែ​បញ្ហា​ជំងឺ​កូ​វីដ ១៩​។ ក្នុងនោះ នៅ​ឆ្នាំ​២០២០ មាន​ភ្ញៀវទេសចរ​បរទេស ៤០០.៨៨៩ នាក់ បាន​ទិញ​ប័ណ្ណ​ចូល ទស្សនា រមណីយដ្ឋាន​អង្គរ នៅ​ខេត្តសៀមរាប ដែល​ធ្លាក់ចុះ ៨១,៨២% ធៀប​នឹង​ឆ្នាំ​២០១៩ និង​ទទួលបាន​ចំណូល ១៨.៦៥៤.៨២៨ ដុល្លារ ធ្លាក់ចុះ ៨១,១៧% ធៀប​នឹង​ឆ្នាំ​២០១៩៕/V-PC

ទីតាំងផ្សាយពាណិជ្ជកម្ម

- Advertisment -

Most Popular