Home ព័ត៌មានអន្តរជាតិ អាស៊ាន ទទូច​អ...

អាស៊ាន ទទូច​អោយ​យោធា​មី​យ៉ាន់​ម៉ា​បញ្ចប់​អំពើហិង្សា​និង​ធ្វើការ​ឆ្ពោះទៅ​កាន់​ការផ្សះផ្សារ​

​ប្រែ​សម្រួលៈ​វាសនា​/​បាងកក​៖​ក្រុម​រដ្ឋមន្ត្រីការបរទេស​អាស៊ាន កាលពី​ថ្ងៃ​អង្គារ​ទី​០២​មីនា បាន​ទទូច​អោយ​យោធា​មី​យ៉ាន់​ម៉ា​ឈប់​ប្រើ​អំពើហិង្សា​និង​គោរព​ឆន្ទៈ​របស់​ប្រជាជន​មី​យ៉ាន់​ម៉ា​នៅ​ពេល​របប​​សឹក​បន្ត​បង្ក្រាប​លើ​ការតវ៉ា​ប្រឆាំង​រដ្ឋប្រហារ​ទម្លាក់​រដ្ឋាភិបាល​ស៊ីវិល​។​

​សារ​នេះ​ត្រូវបាន​បញ្ជូន​ក្នុងអំឡុង​កិច្ចប្រជុំ​ក្រៅ​ផ្លូវការ​របស់​ក្រុម​រដ្ឋមន្ត្រីការបរទេស​អាស៊ាន​កាលពី​ថ្ងៃ​អង្គារ ដែល​ក៏​មាន​វត្តមាន​រដ្ឋមន្ត្រី​ការបរទេស​មី​យ៉ាន់​ម៉ា លោក​វុន​ណា មួង ល្វីន ដែល​ត្រូវ​បាន​តែង​​តាំង​ឡើង​ដោយ​យោធា​ជំនួស លោកស្រី អ៊ុង សាន ស៊ូ ជី ដែល​កំពុង​ជាប់​ឃុំ​។​

​ជំនួប​តាម​អន​ឡាញ​ផ្សាយ​បន្ត​ផ្ទាល់​នេះ​កើតឡើង​២​ថ្ងៃ​ក្រោយ​ពី​កម្លាំង​សន្តិសុខ​នៅ​មី​យ៉ាន់​ម៉ា បាន​សម្លាប់​មនុស្ស​យ៉ាង​តិច​១៨​នាក់ ក្នុង​ការបង្ក្រាប​បង្ហូរ​ឈាម​បំផុត​ចាប់តាំងពី​យោធា​ធ្វើ​រដ្ឋប្រហារ​កាល​​ពី​ថ្ងៃ​០១​កុម្ភៈ​។​

​រដ្ឋមន្ត្រីការបរទេស​សិង្ហ​បុរី បាន​ប្រាប់​សារព័ត៌មាន​ក្រោយ​ជំនួប​ថា «​អាស៊ាន​ចង់​បន្ត​ចូលរួម​ពាក់ព័ន្ធ ជួយ​ដោយ​ស្ថាបនា​។​តែ​នៅ​ទីបំផុត ដំណោះស្រាយ​ស្ថិតនៅលើ​មី​យ៉ាន់​ម៉ា​ខ្លួនឯង​។​ផ្លូវ​តែ​មួយ​ដែល​អ្នក​​ត្រូវ​ធ្វើ​ដំណើរ​ដើម្បី​ទទួលបាន​ដំណោះស្រាយ​ឋិតថេរ​យូរអង្វែង​មួយ គឺ​សំរាប់​ការផ្សះផ្សារ​ជាតិ​និង​និយាយ​ដោយឡែក​យើង​អំពាវនាវ​នាវ​អោយ​ដោះលែង​ប្រធានាធិបតី វីន មី​យីនត៍ និង​ក្រុមប្រឹក្សារដ្ឋ អ៊ុង​​សាន ស៊ូ ជី រួមទាំង​អ្នក​នយោបាយ​ដែល​ត្រូវ​ចាប់ខ្លួន​ដទៃទៀត​»​។​

​អ្នក​ទាំង​២​កំពុង​ស្ថិត​ក្នុង​ការឃុំ​ឃាំង​រង់ចាំ​សវនាការ​តុលាការ​។​លោកស្រី​ស៊ូ​ជី ប្រឈម​ការចោទប្រកាន់​ចំនួន​៤ ពាក់ព័ន្ធ​នឹង​ការប្រើ​វិទ្យុទាក់ទង​ខុសច្បាប់ រំលោភ​វិធានការ​គ្រប់គ្រង​ជំងឺឆ្លង​និង​ផ្សាយ​​ព័ត៌មាន​ដែល​អាច​បង្ក​«​ការភ័យខ្លាច​និង​ការប្រកាសអាសន្ន​»​។​បើសិនជា​ត្រូវ​ដាក់ទោស លោកស្រី​អាច​នឹង​បាត់បង់​ឳ​កាស​ឈរឈ្មោះ​បោះឆ្នោត​នា​ពេលអនាគត​។​

​រដ្ឋមន្ត្រីការបរទេស​សិង្ហ​បុរី បានបញ្ជាក់​ថា សិង្ហ​បុរី​មិន​ទទួលស្គាល់​របប​យោធា​នៅ​មី​យ៉ាន់​ម៉ា​ទេ​។​

​សូមបញ្ជាក់​ថា អាស៊ាន​ដែល​ធ្វើការ​ក្រោម​គោលការណ៍​កុង​សង់​ស៊ី មិន​បាន​ថ្កោលទោស​រដ្ឋប្រហារ​នៅ​មី​យ៉ាន់​ម៉ា​ដែល​ជា​សមាជិក​របស់​ខ្លួន​ទេ មិន​ដូច​សហរដ្ឋ​អាម៉េរិក​និង​បណ្តា​ប្រទេស​លោកខាងលិច​ផ្សេង​​ទៀត​។​កិច្ចការ​ទូត​លើក​នេះ បាន​រក្សា​ទុក​ទ្វារ​នៅ​ចំហ​សំរាប់​ពិភាក្សា​ជាមួយ​យោធា​មី​យ៉ាន់​ម៉ា ក្នុង​គោលបំណង​បង្កើត​ការចរចា​ខ្លះ​រវាង​តួអង្គ​នយោបាយ​សំខាន់ៗ​ក្នុងប្រទេស​មី​យ៉ាន់​ម៉ា​។​

​តែ​កិច្ចពិភាក្សា​និង​កិច្ចការ​ទូត​កន្លងមក​បាន​បង្ក​ការមន្ទិលសង្ស័យ​ពី​ចលនា​ប្រឆាំង​រដ្ឋប្រហារ​នៅ​មី​យ៉ាន់​ម៉ា ដែល​កំពុង​តស៊ូ​ស្តារ​រដ្ឋាភិបាល​ស៊ីវិល​ឡើងវិញ​និង​ប្រឆាំង​ការទទួលស្គាល់​របប​យោធា​សំណាក់​​អន្តរជាតិ​។​

​ចំណែក​រដ្ឋមន្ត្រីការបរទេស​ឥណ្ឌូនេស៊ី បាន​និយាយ​ក្រោយ​ប្រជុំ​ថា «​ឥណ្ឌូនេស៊ី​បញ្ជាក់ថា ឆន្ទៈ ផលប្រយោជន៍​និង​សម្លេង​របស់​ប្រជាជន​មី​យ៉ាន់​ម៉ា ត្រូវតែ​គោរព​។​អាស៊ាន​ត្រៀម​ជួយ​អោយ​មាន​ការចរចា​​នៅពេល​ត្រូវការ​។​តែ​ក្តី​សង្ឃឹម​និង​បំណង​ល្អ​របស់​អាស៊ាន​នឹង​មិន​ចេញ​ជា​រូបរាង​បានទេ បើសិនជា​មី​យ៉ាន់​ម៉ា​មិន​បើក​ទ្វារ​របស់ខ្លួន​សំរាប់​អាស៊ាន​»៕

​កិច្ចប្រជុំ​ក្រៅ​ផ្លូវការ​របស់​ក្រុម​រដ្ឋមន្ត្រីការបរទេស​អាស៊ាន​កាលពី​ថ្ងៃ​អង្គារ អំពាវនាវ​អោយ​យោធា​មី​យ៉ាន់​ម៉ា​បញ្ចប់​អំពើហិង្សា​

 

 

ទីតាំងផ្សាយពាណិជ្ជកម្ម

- Advertisment -

Most Popular