Home ព័ត៌មានសំខាន់ៗ រោងចក្រ​ជាច្រ...

រោងចក្រ​ជាច្រើននៅតែ​បន្ត​ការប្រុងប្រយ័ត្ន​ខ្ពស់ ខណៈ​ជំងឺ​កូ​វីដ​១៩ បង្ហាញ​វត្តមាន​នៅឡើយ នៅ​កម្ពុជា​

ដោយៈ ពៅ​និមល / ភ្នំពេញៈ ខណៈដែល​វីរុស​កូ​វីដ ១៩ នៅតែមាន​វត្តមាន​នៅឡើយ ក្នុងប្រទេស​កម្ពុជា ជាពិសេស​ក្រោយ​ផ្ទុះ​ព័ត៌មាន វិជ្ជមាន​កូ​វីដ ទៅលើ​កម្មករ ដែល​ធ្វើការ​នៅ​រោងចក្រ​កាត់ដេរ ម្តុំ​ព្រៃ​ក​ជ្រៃ ក្នុង​ខណ្ឌដង្កោ ទន្ទឹមនេះ បាន​មើលឃើញថា នៅតាម​បណ្តា​រោងចក្រ សហគ្រាស ក្នុង​រាជធានី​ភ្នំពេញ បាន​បង្កើន​ការប្រុងប្រយ័ត្ន ទៅដល់​កម្មករ និយោជិត ក្នុង​ម៉ោង​បំពេញការងារ​។​

​ជួប​សម្ភាសន៍​ផ្ទាល់ រវាង​រស្មី​កម្ពុជា នៅ​ថ្ងៃទី​៣ ខែមីនា ឆ្នាំ​២០២១ នេះ អ្នកនាង ហែម ផា​រី អនុប្រធាន​រដ្ឋបាល នៃ​រោងចក្រ​កាត់ដេរ​សម្លៀកបំពាក់ អេស អិ​ល ជេ (​ខេ​ម​បូ​ឌា​) បានឱ្យដឹងថាៈ គិត​មកដល់​បច្ចុប្បន្ន​នេះ ក្រោយ​ករណី​ផ្ទុះ លើកដំបូង នៃ​ជំងឺឆ្លង​កូ​វីដ​១៩ ក្នុង​រោងចក្រ អ្នកនាង មិន​ការកើតមាន ឬ​សង្ស័យ​នោះទេ ដោយសារ​ថា កម្មករ និយោជិត​ទាំងអស់ សុទ្ធតែ​បានដឹង និង​យល់​អំពី​ហានិភ័យ នៃ​ជំងឺ​ដ៏​កាច​សាហាវ​មួយ​នេះ និង​ការពារ​ជាប់​ជានិច្ច នៅមុន និង​ក្រោយ ចប់​ការងារ ប្រចាំថ្ងៃ​។​

​ដោយឡែក អ្នកនាង អ៊ុក លី​ឡា ជំនួយការ​រដ្ឋបាល នៃ​រោងចក្រ​កាត់ដេរ​សម្លៀកបំពាក់ ប្រឹ​ភី​សីស (​ខេ​ម​បូ​ឌា​) ហ្គា​មេន អ៊ិ​ល​ធី​ឌី ដែល​ស្ថិតនៅ​ក្រុង​តាខ្មៅ ខេត្តកណ្តាល បាន​អះអាងថាៈ គិត​ចាប់ពី​វត្តមាន​កូ​វីដ​១៩ កើតឡើង រហូតមកទល់​ពេលនេះ ខាង​រោងចក្រ តែងតែ​ចុះ​ណែនាំ និង​រម្លឹក​ដល់ក​ម្មក​រ និយោជិត ជាប់​ជានិច្ច អំពី​បង្ការ​ការពារ ក៏ដូចជា បានរៀបចំ​នូវ ការ​ស្ទង់កម្តៅ បាញ់​ទឹក​អាល់កុល និង​រៀបចំ​ជា​កន្លែង​លាង​សម្អាត​ដៃ នៅតាម​មាត់ច្រក​ចេញចូល​អគារ ដើម្បីឱ្យ​បងប្អូន​កម្មករ និយោជិត លាង​សម្អាត​ដៃ មុន និង​ក្រោយ​បំពេញការងារ​។​

​ពាក់ព័ន្ធ​បញ្ហា​នេះ ក្រុមកម្មករ កម្ម​ការ​នី បាន​អំពាវនាវ​ឱ្យ​ចូលរួម​ទប់ស្កាត់ និង​បន្ត​អនុវត្ត តាម​ការណែនាំ​របស់ រដ្ឋាភិបាល​ទាំងអស់គ្នា ពិសេស​គោរព តាម​ការណែនាំ​របស់ ក្រសួងសុខាភិបាល ដូចជា រក្សា​គម្លាត​សង្គម ពាក់​ម៉ាស និង​លាងដៃ​ជាប់​ប្រចាំ ជាមួយនឹង​សាប៊ូ ឬ​ទឹក​អាល់កុល ដើម្បី​ចៀសវាង​ពី​ការឆ្លង ឬ​កើតមាន​ជំងឺ​កូ​វីដ ១៩​។​

​គិត​ត្រឹម​ព្រឹក ថ្ងៃទី​៣ ខែមីនា នេះ ស្ថានភាព​ជំងឺ​កូ​វីដ ១៩ នៅ​កម្ពុជា អ្នក​ឆ្លង​ថ្មី​វីរុស​កូ​វីដ ១៩ ចំនួន ៣៤ នាក់ ដែល​សុទ្ធសឹង​ជាប់​ពាក់ព័ន្ធ ទៅ​ព្រឹ​ត្ត​ការណ៍​សហគមន៍ ២០ កុម្ភៈ​។ ដោយឡែក អ្នក​ឆ្លង​វី​វុ​ស​កូ​វីដ ១៩ សរុប​ចំនួន ៨៧៨ នាក់ ក្នុងនោះ​អ្នក​ព្យាបាល ជាសះស្បើយ ចំនួន ៤៨២ នាក់ និង​កំពុង​សម្រាក​ព្យាបាល សរុប​ចំនួន ៣៩៦ នាក់​៕/V​

ទីតាំងផ្សាយពាណិជ្ជកម្ម

- Advertisment -

Most Popular