ដោយៈ ទេព មង្គល / ភ្នំពេញៈ លោក សំហេង បូរ៉ា អនុរដ្ឋលេខាធិការ​ក្រសួងពាណិជ្ជកម្ម បាន​ដឹកនាំ​កិច្ចប្រជុំ​អន្តរក្រសួង តាម​ប្រព័ន្ធ​វីដេអូ នា​ព្រឹក​ថ្ងៃ​អង្គារ ទី​២ ខែមីនា ឆ្នាំ​២០២១ នៅ​ទីស្តីការ​ក្រសួងពាណិជ្ជកម្ម ដើម្បី​ពិភាក្សា​លើ (១) របៀបវារៈ​សម្រាប់​កិច្ចប្រជុំ​ក្រុម​ជំនាញ រវាង​កម្ពុជា និង​គណៈកម្មការ​សេដ្ឋកិច្ច អឺរ៉ុប​-​អាស៊ី (​គ​.​ស​.​អ​.​អ​) , (២) បទ​បង្ហាញ ស្តីពី​កាលានុវត្តភាព​ពាណិជ្ជក​ម្ម និង​វិនិយោគ នៅ​កម្ពុជា (៣) សេចក្តីព្រាង​សង្ខេប​លទ្ធផល នៃ​កិច្ចពិភាក្សា (Summary of Discussion) និង (៤) សំណួរ​ពាក់ព័ន្ធ​បញ្ហា​បច្ចេកទេស សម្រាប់​ពិភាក្សា ជាមួយ​ក្រុម​ជំនាញ គ​.​ស​.​អ​.​អ ។​

​កិច្ចប្រជុំ​នេះ មានការ​អញ្ជើញ​ចូលរួម ពី​តំណាង​ក្រសួង​-​ស្ថាប័ន​ពាក់ព័ន្ធ ចំនួន​៩ និង​អ្នកចូលរួម​ប្រមាណ ២០ រូប​។​

​លោក​អនុរដ្ឋលេខាធិការ និង​ជា​ប្រធាន​អង្គប្រជុំ បាន​ជម្រាបជូន អំពី​គោលបំណង នៃ​កិច្ចប្រជុំ គឺ​ពិនិត្យ​លើ​វឌ្ឍនភាព​ការងារ និង​ប្រមូល​ធាតុ​ចូល​នានា ពី​អន្តរក្រសួង​-​ស្ថាប័ន ដែល​ពាក់ព័ន្ធ​នឹង​កិច្ចសហប្រតិបត្តិការ រវាង​កម្ពុជា និង​គណៈកម្មការ​សេដ្ឋកិច្ច អឺរ៉ុប​-​អាស៊ី (EEC: Eurasian Economic Commission) ដើម្បី​ត្រៀម​រៀបចំ កិច្ចប្រជុំ​ក្រុម​ជំនាញ រវាង​កម្ពុជា និង គ​.​ស​.​អ​.​អ នឹង​ប្រព្រឹត្តទៅ នា​ថ្ងៃទី​១០ ខែមីនា ឆ្នាំ​២០២១ តាម​ប្រព័ន្ធ​វីដេអូ​។​

​លោក សំហេង បូរ៉ា បាន​ជម្រាបជូន​អង្គប្រជុំ ឱ្យបាន​ជ្រាប អំពី​សាវតា និង​លទ្ធផល​នៃ​កិច្ចសហប្រតិបត្តិការ រវាង​កម្ពុជា និង​គ​.​ស​.​អ​.​អ កន្លងមក​។
​អង្គប្រជុំ បាន​ពិភាក្សា និង​ផ្លាស់ប្តូរ​យោបល់ លើ​របៀបវារៈ នៃ​កិច្ចប្រជុំ រួមមាន​៖ (១) បទ​បង្ហាញ​ស្តីពី​កាលានុវត្តភាព​ពាណិជ្ជក​ម្ម និង​វិនិយោគ នៅ​កម្ពុជា (២) សេចក្តីព្រាង​សង្ខេប​លទ្ធផល នៃ​កិច្ចពិភាក្សា (Summary of Discussion) និង​(៣) របៀបវារៈ​សម្រាប់​កិច្ចប្រជុំ​ក្រុម​ជំនាញ រវាង​កម្ពុជា និង គ​.​ស​.​អ​.​អ ផ្តោតលើ​ប្រធានបទ​សំខាន់ៗ ចំនួន​៦៖ (១) នីតិវិធី​គយ (២) បច្ចុប្បន្នភាព នៃ​ប្រព័ន្ធ​អនុគ្រោះ​ពន្ធ របស់ EEC ផ្តល់ជូន​កម្ពុជា និង​នីតិវិធី​នៃ​ដំណើរការ បង្កើត​កិច្ចព្រមព្រៀង ពាណិជ្ជកម្ម​សេរី រវាង​ភាគី​ទាំងពីរ (៣) វិធាន​អនាម័យ និង​ភូតគាម​អនាម័យ (៤) សកម្មភាព​ពាក់ព័ន្ធ​សហគ្រិនភាព (៥) គោលនយោបាយ ក​សិ​-​ឧស្សាហកម្ម និង​(៦)​ការដឹកជញ្ជូន​។​

​លោក សំហេង បូរ៉ា បានស្នើ​ឱ្យ​តំណាង​ក្រសួង​ស្ថាប័ន​ពាក់ព័ន្ធ បញ្ជូន​បទ​បង្ហាញ​សង្ខេប​របស់ខ្លួន (​ដែល​បាន​កែសម្រួល​រួច​) មក​ក្រសួងពាណិជ្ជកម្ម ឱ្យទាន់​ពេលវេលា​កំណត់ និង​អញ្ជើញ​ចូលរួម​កិច្ចប្រជុំ​ក្រុម​ជំនាញ រវាង​កម្ពុជា និង គ​.​ស​.​អ​.​អ ដែល​នឹង​ប្រព្រឹត្តទៅ នា​ថ្ងៃទី​១០ ខែមីនា ឆ្នាំ​២០២១ តាម​ប្រព័ន្ធ​វីដេអូ ឱ្យបាន​គ្រប់ៗ​គ្នា​៕/V