Home ព័ត៌មានអន្តរជាតិ ពួក​អាយ​ស៊ី​ស...

ពួក​អាយ​ស៊ី​ស​បាញ់សម្លាប់​បុគ្គលិក​ស្រី​៣​នាក់​មកពី​ទូរទស្សន៍​និង​វិទ្យុ​អា​ហ្វ​ហ្គានី​ស្ថាន​

​ប្រែ​សម្រួល : កញ្ញា​ដា​លី​ស ៖​ អង្គការរដ្ឋ​អ៊ីស្លាម​បាន​ប្រកាស​ទទួលខុសត្រូវ​ចំពោះ​ការសម្លាប់​ស្ត្រី​បី​នាក់​ដែល​ធ្វើការ​ឱ្យ​ស្ថានីយ​វិទ្យុ​និង​ទូរទស្សន៍​ក្នុងស្រុក​មួយ​នៅ​ភាគ​ខាងកើត​ប្រទេស​អា​ហ្វ​ហ្គានី​ស្ថាន​កាលពី​ថ្ងៃ​អង្គារ​ទី​២​មីនា​។​

​ការវាយប្រហារ​នៅ​ទីក្រុង​ចា​ឡា​ឡា​បាដ​គឺ​ជា​ការកើនឡើង​នៃ​ការសម្លាប់​ដែល​គេ​ដាក់​គោលដៅ​ទៅលើ​ចៅក្រម​អ្នកកាសែត​និង​អ្នកជំនាញ​ដទៃទៀត ដែល​ពួកនេះ​ឆ្មក់​វាយប្រហារ​ឬ​សម្លាប់​ដោយ​គ្រាប់បែក​រថយន្ត​។​

​ការសម្លាប់​បាន​កើនឡើង​ចាប់តាំងពី​ការចរចា​សន្តិភាព​បាន​ចាប់ផ្តើម​កាលពី​ឆ្នាំមុន​រវាង​រដ្ឋាភិបាល​អា​ហ្វ​ហ្គានី​ស្ថាននិង​ពួកតា​លីបង់ ដែល​បង្ក​ឱ្យមាន​ការភ័យខ្លាច​ថា ក្រុម​បះបោរ​កំពុង​កម្ចាត់​គូប្រជែង​។​

​ស្ត្រី​ទាំង​បី​នាក់​នោះ​គឺ​មានឈ្មោះ​ថា ម៉ួ​សាល់ វ៉ា​ហ៊ី​ឌី​, សាឌា សា​ដា​ត និង ស្ត្រី​ម្នាក់​ទៀត​មានឈ្មោះ​ត្រឹម​ថា សា​ណាស់ មាន​អាយុ​ចន្លោះ​ពី ១៨ ទៅ ២០ ឆ្នាំ​។ ពួក​នាង​ត្រូវបាន​បាញ់សម្លាប់​នៅក្នុង​ការវាយប្រហារ​ពីរ​ដាច់​ដោយឡែក​ពី​គ្នា​បន្ទាប់​ពី​ពួកនាង​បាន​ចាកចេញ​ពី​ស្ថានីយទូរទស្សន៍ Enikass កន្លែង​ដែល​ពួកនាង​ធ្វើការ​កាលពី​ថ្ងៃ​អង្គារ​។​

​កាលពី​ថ្ងៃ​ពុធ មនុស្ស​រាប់​សិប​នាក់​បាន​ប្រមូលផ្តុំ​គ្នា​ដើម្បី​កាន់ទុក្ខ​នៅឯ​ពិធី​បុណ្យសព​របស់​ស្ត្រី​ទាំងបី​។​

​ក្រុមមន្ត្រី​អា​ហ្វ​ហ្គានី​ស្ថាន​និយាយថា ប៉ូលិស​ចាប់​បាន​ឃាតករ​ឈ្មោះ ការី បា​សឺ ដែល​ទទូច​ថា​រូបគេ​ជា​សមាជិក​ក្រុម​តា​លី​បង់​។ ការអះអាង​នេះ​ត្រូវបាន​បដិសេធ​ភ្លាមៗ​ដោយ​អ្នកនាំពាក្យ​តា​លី​បង់ លោក ហ្សា​ប៊ី​ហ៊ូ​ឡា មូចា​ហ៊ីដ​។

​មេ​ប៉ូលិស​ក្រុង​ណាន​ហ្គា​ហា គឺ​លោក​ឧត្តមសេនីយ៍ ហ្គុល ហេ​ម៉ា​ត និយាយថា បា​សឺ​បាន​ប្រើ​កាំភ្លើងខ្លី​ត​កាណុង​ស្ងាត់​សំឡេង​នៅក្នុង​ការវាយប្រហារ និង​ត្រូវបាន​ចាប់ខ្លួន​ក្រោយ​ប្រព្រឹត្ត​សកម្មភាព​បាញ់ប្រហារ​។​

​នៅ​ល្ងាច​ថ្ងៃ​អង្គារ​ក្រុម​អាយ​ស៊ី​សបាន​អះអាង​ទទួលខុសត្រូវ​ចំពោះ​ការសម្លាប់​នេះ ដោយ​និយាយថា ស្ត្រី​ទាំង​បី​ត្រូវបាន​ដាក់​គោលដៅ​សម្លាប់ចោល ព្រោះ​ធ្វើការ​ឱ្យ​ស្ថានីយទូរទស្សន៍ ដែល​ស្មោះត្រង់​នឹង​រដ្ឋាភិបាល​បំបង់បាយ​អា​ហ្វ​ហ្គានី​ស្ថាន​៕

​បុគ្គលិក​ស្រី​របស់​ស្ថានីយ​ទូរទស្សន៍​និង​វិទ្យុ Enikass ត្រូវបាន​ពួក​អាយ​ស៊ី​ស​សម្លាប់​កាលពី​ថ្ងៃ​អង្គារ​។​កាលពី​ថ្ងៃ​ពុធ មនុស្ស​រាប់​សិប​នាក់​បាន​ប្រមូលផ្តុំ​គ្នា​ដើម្បី​កាន់ទុក្ខ​នៅឯ​ពិធី​បុណ្យសព​របស់​ស្ត្រី​ទាំងបី​។​

ទីតាំងផ្សាយពាណិជ្ជកម្ម

- Advertisment -

Most Popular