Home ព័ត៌មានជាតិ សេដ្ឋកិច្ច ចាប់ផ្តើម​ដាំ...

ចាប់ផ្តើម​ដាំ​ផ្កា និង​បង្គោល​ភ្លើង​បំភ្លឺ​មហាវិថី​៣០​ម៉ែត្រ​

ដោយ​: ប​.​ខុន / ភ្នំពេញ​: គម្រោង​សាងសង់​មហាវិថី​៣០​ម៉ែត្រ ចូលដល់​ដំណាក់កាល​ដាំ​ផ្កា ក្រាល​ស្មៅ​ជប៉ុន​នៅលើ​សួន​ពុះ​ចែក​ទ្រូង​មហាវិថី​នេះ ជាមួយនឹង​ការ​តម្លើង ប​ង្គោ ល​ភ្លើង​បំភ្លឺ​ផ្លូវ​ចំនួន​១០០​ដើម ឱ្យបាន​រួចរាល់​ថ្ងៃ​សម្ពោធ​ដាក់ឱ្យ​ប្រើប្រាស់​ជា​ផ្លូវ ការ​ទីស្តីការក្រសួង​រៀបចំ​ដែនដី​នា​ដើមខែ​មេសា​ដែលមាន​ទីតាំង​តាម​មហាវិថី នេះ​។​

​លោក ជា សុវណ្ណ ប្រធាន​អង្គភាព​អគ្គិសនី និង​បំភ្លឺ​សាធារណៈ​នៃ​មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៨​ខែមីនា​ឆ្នាំ​២០២១​ថា ការដាំ​បង្គោល​ភ្លើង​ថ្មី​នៅលើ​មហាវិថី​៣០​ម៉ែត្រ ចាប់ពី​បុរី​អង្គរ ភ្នំពេញ ទៅដល់​មុខ​ទី​ស្តី​ថ្មី​របស់​ក្រសួង​រៀបចំ​ដែនដី​នគរូបនីយកម្ម​និង​សំណង់ បានចាប់ផ្តើម​នៅថ្ងៃនេះ​(៨​មីនា​) មាន​ចំនួន​១០០​ដើម គ្រោង​តម្លើង​ឱ្យបាន​រួចរាល់​នៅ ក្នុង​សប្តាហ៍​នេះ​។​

​ប្រធាន​អង្គភាព​ខាងលើ​និយាយ​ឱ្យដឹងទៀតថា បន្ទាប់ពី​ការ​តម្លើង​បង្គោល រួចរាល់​គឺ​ចាប់​គោម ត​ភ្ជាប់​បណ្តាញ និង​ចរន្ត​នៅ​សប្តាហ៍​បន្ទាប់​តាម​កម្មវិធី ដែល​បាន​គ្រោងទុក គឺ​ទាន់​ការសម្ពោធ​អគារ​ទីស្តីការ​ថ្មី​របស់​ក្រសួង​រៀបចំ​ដែនដី​នគរូបនីយកម្ម និង​សំណង់ នៅ​ដើមខែ​មេសា​។​

​លោក សំ សាមុត ប្រធាន​អង្គភាព​សួនច្បារ នៃ​មន្ទីរ​សាធារណការ និង​ដឹកជញ្ជូន​រាជធានី​ភ្នំពេញ បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៨​ខែមីនា​ដែរ​ថា ការងារ​ធ្វើ​សួនច្បារ​ពុះ​ចែក​ទ្រូង​មហាវិថី​៣០​ម៉ែត្រ ចាប់ពី​បុរី​អង្គរ​ភ្នំពេញ​ដល់​ក្រុង រណប ហ្ក្រេ​ន​ភ្នំពេញ​អន្តរជាតិ​ជាប់​ក្រសួង​រៀបចំ​ដែនដី​នគរូបនីយកម្ម​និង​សំណង់​ថ្មី​បានចាប់ផ្តើម​ដាំ​ផ្កា​ហើយ​នៅថ្ងៃនេះ​(៨​មីនា​) ក្នុង​គម្រោង​មាន​ដាំ​ផ្កាក្រដាស​ដើម តែ​ដើម​ជ្រៃ​លាស់ និង​ក្រាល​ស្មៅ​ជប៉ុន ធ្វើយ៉ាងណា​ឱ្យ​ការសម្ពោធ​អគារ​ទីស្តីការ​ថ្មី របស់​ក្រសួង​រៀបចំ​ដែនដី​នគរូបនីយកម្ម​និង​សំណង់​។​

​ទីស្តីការ​ថ្មី​របស់​ក្រសួង​រៀបចំ​ដែនដី​នគរូបនីយកម្ម​និង​សំណង់ បានចាប់ផ្តើម​សាងសង់​ជា​ផ្លូវការ កាលពី​ថ្ងៃទី​២៨​ខែកុម្ភៈ​ឆ្នាំ​២០២០ នៅលើ​ទីតាំង​ដីឡូត៍ លេខ​២០០៥ ផ្លូវ​៣០៧ ភូមិ​អន្លង់​ក្ងាន សង្កាត់​ឃ្មួញ ខណ្ឌ​សែន​សុខ រាជធានី​ភ្នំពេញ​។ កាលពី​ថ្ងៃទី​៣​ខែមីនា ក្រសួង​នេះ​បានប្រកាស​ជូនដំណឹង​ថា ឱ្យ​មន្ត្រី​ចូលធ្វើការ​កន្លែង​ថ្មី​នេះ នៅ​ថ្ងៃទី​១៥​ខែមីនា ឆ្នាំ​២០២១​។ តាម​ការគ្រោង​ទីស្តីការក្រសួង​នេះ នឹង​សម្ពោធ​ដាក់ឱ្យ​ប្រើប្រាស់​ជា​ផ្លូវការ ក្រោម​អធិបតីភាព​ដ៏​ខ្ពង់ខ្ពស់ របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា នា​ថ្ងៃទី​៤​ខែមេសា​ឆ្នាំ​២០២១ ដែលជា​ថ្ងៃ​ខួបកំណើត​របស់​សម្តេច​។​

​លោក ឃួ​ង ស្រេង អភិបាល​រាជធានី​ភ្នំពេញ បាន​និយាយ​ឱ្យដឹង​កាលពីពេល​ថ្មីៗ​កន្លងទៅនេះ​ថា ការសាងសង់​មហាវិថី​៣០​ម៉ែត្រ ដែល​សម្រេច​លទ្ធផល​បាន​ជាង​៧០​ភាគរយ នៃ​គម្រោង​ហើយ ជា​មហាវិថី​ធំ​ទូលាយ​មាន​លូបង្ហូរទឹក​នៅ​សងខាង មាន​សួនច្បារ និង​ភ្លើង​បំភ្លឺ​ផ្លូវ​ចំ​កណ្តាល ដែលជា​មហាវិថី​កើត​ពី​ការចូលរួមចំណែក​រប​ស់​អ្នកឧកញ៉ា លោក​ឧកញ៉ា​លើ​ផ្នែក​ថវិកា ជាមួយ​រដ្ឋបាល​រាជធានី​ភ្នំពេញ​។​

​រំលឹក​ឱ្យដឹងថា មហាវិថី​៣០​ម៉ែត្រ​ខាងលើនេះ បាន​បើក​ការដ្ឋាន​សាងសង់​ជា​ផ្លូវការ កាលពី​ថ្ងៃទី​៧​ខែកញ្ញា​ឆ្នាំ​២០២០ ក្រោម​គំនិត​ផ្តួចផ្តើម​របស់លោក ឃួ​ង ស្រេង អភិបាល​រាជធានី​ភ្នំពេញ ដោយមាន​ការគាំទ្រ ថវិកា​ពី​សប្បុរសជន​ដែលជា​ម្ចាស់​បុរី​នៅ​អម​សងខាង​មហាវិថី​នេះ គឺ​ចាប់ពី​បុរី​អង្គរ​ភ្នំពេញ ទៅដល់​មហាវិថី​ឈ្នះ​ឈ្នះ​។

​មហាវិថី​៣០​ម៉ែត្រ​ថ្មី​នេះ មាន​ប្រវែង ៥.៨៦០​ម៉ែត្រ ទទឹង​៣០​ម៉ែត្រ នៅក្នុង​គម្រោង ដែល​កំពុង​អនុវត្ត​ត្រូវ​ចាក់​បេតុង​ឆ្អឹង​ដែក​កម្រាស់ ០.២០​ម៉ែត្រ ចិញ្ចើមផ្លូវ​ម្ខាង​២​ម៉ែត្រ​មាន​លូ​នៅ​សងខាង ដោយ​ម្ខាង​ទំហំ​០,៨០​ម៉ែត្រ មាន​សួនច្បារ​នៅ​កណ្តាល ២​ម៉ែត្រ ជាមួយនឹង​បង្គោល​ភ្លើង​បំភ្លឺ​ផ្លូវ សាច់​ផ្លូវ​ម្ខាង​១២​ម៉ែត្រ មាន​ភ្លើងស្តុប​៤​កន្លែង និង​ទទួលខុសត្រូវ​សាងសង់​ដោយ​ក្រុមហ៊ុន​ជីបម៉ុង គ្រោង​សាងសង់​ឱ្យ​រួចរាល់​ក្នុង​រយៈពេល ៦​ខែ បន្ទាប់​ពីថ្ងៃ​បើក​ការដ្ឋាន កាលពី​ថ្ងៃទី​៧ ខែកញ្ញា ឆ្នាំ ២០២០៕​

ទីតាំងផ្សាយពាណិជ្ជកម្ម

- Advertisment -

Most Popular