​ប្រែ​សម្រួល : កញ្ញា​ដា​លី​ស ៖ ក្រុមហ៊ុន H&M របស់​ស៊ុយអែត ដែលជា​ក្រុមហ៊ុន​លក់រាយ​ម៉ូត​សម្លៀកបំពាក់​ធំ​ជាង​គេ​លំដាប់​លេខ ២ នៅលើ​ពិភពលោក​បាន​និយាយ​កាលពី​ថ្ងៃ​ចន្ទ​ទី ៨ ខែ​មីនា​ថា ខ្លួន​មាន​ការភ្ញាក់ផ្អើល​ចំពោះ​ការប្រើប្រាស់​កម្លាំង​ដ៏​សាហាវ​ប្រឆាំងនឹង​ក្រុមអ្នកតវ៉ា​នៅក្នុង​ប្រទេស​មី​យ៉ាន់​ម៉ា ហើយ​ខ្លួន​ផ្អាក​ការបញ្ជាទិញ​នៅក្នុង​ប្រទេស​នេះ​ហើយ​។​

​យោងតាម​អង្គការសហប្រជាជាតិ​កាលពី​សប្តាហ៍​មុន ប៉ូលិស​និង​យោធា​បាន​សម្លាប់​មនុស្ស​ជាង​៥០ នាក់​ក្នុង​ការបង្ក្រាប​បាតុកម្ម​និង​កូដកម្ម​ប្រចាំថ្ងៃ​ប្រឆាំង​នឹង​រដ្ឋប្រហារ​យោធា​ថ្ងៃទី ១ ខែ​កុម្ភៈ​។​

​ក្រុមហ៊ុន​និយាយ​នៅលើ​វេបសាយ​របស់​ខ្លួន​ថា ក្រុមហ៊ុន H&M មាន​អ្នកផ្គត់ផ្គង់​ផ្ទាល់​ប្រមាណ ៤៥ នៅក្នុង​ប្រទេស​មី​យ៉ាន់​ម៉ា ហើយ​មាន​ប្រភព​នៅក្នុង​ប្រទេស​នេះ​អស់​រយៈពេល ៧ ឆ្នាំ​មកហើយ​។​

​លោក សឺ​ខាន់ តាន់​កា នាយក​ប្រចាំ​ប្រទេស​មី​យ៉ាន់​ម៉ា បាន​និយាយ​តាម​អ៊ីមែល​ថា “​ទោះបី​យើង​បដិសេធ​មិន​ចាត់វិធានការ​ភ្លាមៗ​ទាក់ទង​នឹង​វត្តមាន​យូរអង្វែង​របស់​យើង​នៅក្នុង​ប្រទេស​នេះ​ក៏ដោយ ក៏​យើង​នៅតែ​ផ្អាក​ការបញ្ជា​ទិញ​ថ្មីៗ​ជាមួយ​អ្នក​ផ្គត់ផ្គង់​របស់​យើង​”​។​

“​នេះ​គឺ​ដោយសារតែ​ការលំបាក​ជាក់ស្តែង​និង​ស្ថានការណ៍​ដែល​មិន​អាច​ប៉ាន់ស្មាន​បាន​ដែល​រារាំង​សមត្ថភាព​របស់​យើង​ក្នុងការ​ធ្វើ​ប្រតិបត្តិការ​ក្នុង​ប្រទេស​នេះ​រួមមាន​បញ្ហា​ប្រឈម​ទាក់ទង​នឹង​ការផលិត​និង​ហេដ្ឋារចនាសម្ព័ន្ធ ការនាំ​ចូល​វត្ថុធាតុដើម និង ការដឹកជញ្ជូន​ទំនិញ​សម្រេច​”​។​

​លោក​តាន់​កា​និយាយថា ក្រុមហ៊ុន H&M មាន​ការព្រួយបារម្ភ​យ៉ាងខ្លាំង​អំពី​ស្ថានភាព​ក្នុង​ប្រទេស​នេះ ហើយ​ថា​ខ្លួន​កំពុង​សន្ទនា​ជាមួយ​បណ្តា​ទីភ្នាក់ងារ​របស់​អ​.​ស​.​ប អ្នកតំណាង​ការទូត អ្នកជំនាញ​សិទ្ធិមនុស្ស សហជីព​ពាណិជ្ជកម្ម និង ក្រុមហ៊ុន​ពហុ​ជាតិ​ដទៃ​ទៀត​អំពី​ស្ថានភាព​នៅ​មី​យ៉ាន់​ម៉ា​៕

ក្រុមហ៊ុន H&M ផ្អាក​ការបញ្ជាទិញ​ពី​ក្រុមហ៊ុន​ផ្គត់ផ្គង់​ផ្ទាល់​ប្រមាណ ៤៥ នៅក្នុង​ប្រទេស​មី​យ៉ាន់​ម៉ា​ដោយសារ​តែ​កងកម្លាំង​សន្តិសុខ​ប្រើ​អំពើហិង្សា​លើ​អ្នក​ប្រឆាំង​តវ៉ា​