​ដោយៈ ជា សីហៈ​/​ភ្នំពេញៈ នៅ​ថ្ងៃទី​១៧ ខែមីនា រដ្ឋាភិបាល​ជប៉ុន​បាន​ឯកភាព​ផ្តល់​ជំនួយឥតសំណង​សម្រាប់​គម្រោង​ទ្រង់ទ្រាយ​តូច​សន្តិសុខ​មនុស្សជាតិ នូវ​ថវិកា​សរុប​ចំនួន ៤៨៣.២០៤ ដុល្លារ​អាម៉េរិក សម្រាប់​ការ​ដំឡើង​ឧបករណ៍​កែច្នៃ​កំប្លោក​ធ្វើជា​ជីវ​អេតាណុល​នៅក្នុង​មន្ទីរ​បរិស្ថាន​ខេត្តកំពង់ឆ្នាំង ។

​ស្ថានទូត​ជប៉ុន​ក៏បាន​ប្រកាសថា ថវិកា​នេះ នឹង​រួមបញ្ចូល​ទាំង​គម្រោង​ការសាងសង់​អគារ​សម្ភព​មួយកន្លែង​នៅក្នុង​មណ្ឌល​សុខភាព​ទួល​ក្នុង​ខេត្តមណ្ឌលគិរី ការសាងសង់​អគារ​ផ្នែក​ជម្ងឺ​សម្រាក​ពេទ្យ​មួយកន្លែង​នៅក្នុង​មណ្ឌល​សុខភាព​ឆែប​ក្នុង​ខេត្តព្រះវិហារ ការផ្តល់​រថយន្ត​គ្លីនិក​ចល័ត​មួយគ្រឿង​ក្នុង​ខេត្តសៀមរាប និង​ការបំពាក់​បរិក្ខារ​វិ​ជ្ជ​សាស្ត្រ​នៅក្នុង​គិលានដ្ឋាន​មិត្តភាព​កម្ពុជា​-​វៀតណាម​ក្នុង​ខេត្ត​ព្រះសីហនុ ផងដែរ​។​

​លោក មិ​កា​មិ ម៉ាសា​ហ៊ី​រ៉ូ ឯកអគ្គរាជទូត​ជប៉ុន និង​អ្នកតំណាង​អង្គភាព​ទទួល​ជំនួយ​ទាំង​ប្រាំ​បាន​ចុះហត្ថលេខា​លើ​កិច្ចសន្យា​ផ្តល់ជំនួយ​របស់​ពួកគេ​។

​លោក​បាន​បញ្ជាក់ថា យើង​ជឿជាក់ថា​ជំនួយឥតសំណង​ទាំងនេះ​នឹង​ជួយ​កែលម្អ​គុណភាព​ជីវិត​សម្រាប់​ប្រជាជន នៅក្នុង​ទីតាំង​គម្រោង​នីមួយៗ​។​

​ភាគី​ទាំង​ពីរបាន​ចុះហត្ថលេខា​លើ​កិច្ចសន្យា​ផ្តល់ជំនួយ ដាច់ដោយឡែក​ពីគ្នា ដើម្បី​ចូលរួម​ក្នុង​កិច្ចខិតខំ​ប្រឹងប្រែង ក្នុងការ​ទប់ស្កាត់​ការរីក​រាលដាល​ចូល​សហគមន៍​នៃ​វីរុស​កូ​វីត​១៩ នៅក្នុង “​ព្រឹត្តិការណ៍​សហគមន៍ ២០​កុម្ភៈ​”​៕សរន