ដោយៈ​មុនី​រ័ត្ន​/​ភ្នំពេញៈអ្នកនាំពាក្យ​រដ្ឋាភិបាល​ក​ម្ពុ​ជា​បាន​ឆ្លើយតប​ទៅ​និង​ការធ្វើ​យុទ្ធនា​ការដើរ​ប្រមូល​ស្នាម​មេដៃ​ប្រជាពលរដ្ឋ​នៅតាម​ផ្ទះជួល​របស់​អង្គការ​មួយចំនួន ដើម្បី​ទាមទារ​ឲ្យ​រដ្ឋាភិបាល​ដោះស្រាយ​បញ្ហា​មួយចំនួន​ដែល​ពួកគេ​ចង់បាន​ដូចជា បញ្ហា​តម្លៃ​សាំង ផ្ទះជួល និង​ការបង់​ធនាគារ​ជាដើម ខណៈដែល​រដ្ឋាភិបាល​បាន​ត្រៀមលក្ខណៈ​មួយចំនួនធំ ក្នុងការ​ដោះស្រាយ​បញ្ហា​អស់ទាំង​នេះ​។

​អ្នកនាំពាក្យ​រាជរដ្ឋាភិបាល​កម្ពុជា លោក​ផៃ ស៊ី​ផាន បាន​មានប្រសាសន៍ប្រាប់​រស្មី​កម្ពុជា​នៅ​ព្រឹក​ថ្ងៃទី​២២ ខែមីនា នេះ​ថា ចំពោះ​ការទាមទារ​របស់​អង្គការ​សង្គម​ស៊ីវិល​មួយចំនួន​ទាមទារ​ឲ្យ​រដ្ឋាភិបាល​ដោះស្រាយ​បញ្ហា​តម្លៃ​សាំង បញ្ហា​ផ្ទះជួល និង​បញ្ហា​ផ្អាក​ការបង់​ធន​គារ​នោះ គឺ​រដ្ឋាភិបាល​បាន​ត្រៀមលក្ខណៈ​មួយចំនួនធំ ក្នុងការ​ដោះស្រាយ​អ្នកក្រីក្រ​តាមរយៈ​ប័ណ្ណ​ក្រីក្រ និង​តាមរយៈ​ការចុះ​ពិនិត្យមើល​ត្រឹមត្រូវ​។​ពាក់ព័ន្ធ​ជាមួយ​ខាង​ធនាគារ​គឺ​ខាង​ធនាគារជាតិ​នៃ​កម្ពុជា​បានធ្វើ​កិច្ចការងារ​ជាមួយ​ក្រុមហិរញ្ញវត្ថុ ក៏ដូចជា​ធនាគារ​ឲ្យ​ដោះស្រាយ​របៀប​ទន់ភ្លន់ និង​ជួយ​ដល់​អ្នក​ដែល​ជំពាក់​បំណុល គឺ​បាន​ធ្វើជា​បណ្តើរៗ​មកហើយ​។​

​អ្នកនាំពាក្យ​រាជរដ្ឋាភិបាល​បាន​សង្កត់ធ្ងន់ថា “​អ្វីដែល​យើង​ខ្លាច​បំផុត គឺ​យើង​មិន​ចង់​ឲ្យ​បាត់បង់​ស្ថិរភាព​នៃ​ម៉ាក្រូសេដ្ឋកិច្ច ម៉ាក្រូសេដ្ឋកិច្ច​គឺមាន​រាប់បញ្ចូល​ទាំង​ការបាត់បង់​តម្លៃ​លុយ​ដែល​ហៅថា អតិផរណា កាលណា​លុយ​ធ្លាក់​ចុះមក​ច្រើន​សម្រាប់​មហាជន គឺ​ធ្វើ​ឲ្យ​មាន​អតិផរណា​គឺ​វា​ធ្វើ​ឲ្យ​សម្លាប់​ដល់​សេដ្ឋកិច្ច​រួមទាំង​អស់ ដែល​យើង​ត្រូវ​ប្រយ័ត្នប្រយែង​”​។​
​អ្នកនាំពាក្យ​រដ្ឋាភិបាល​ក៏បាន​អំពាវនាវ​ទៅដល់​ប្រជាពលរដ្ឋ​កុំ​ឲ្យ​មាន​សកម្មភាព​ពពាក់ពពូន​ដែល​អាច​បំផ្លាញ​នូវ​ស្ថិរភាព​នយោបាយ​របស់​សង្គម​ទៅវិញ​ទេ​៕​សរន​