ដោយ: ស​រិ​ទ្ធ / ព្រះសីហនុ​: យោធិន​មួយរូប ឈ្មោះ សំ វិជ្ជា ជា​ជំនួយការ ការិយាល័យ​បុគ្គលិក នៃ​អគ្គលេខាធិការដ្ឋាន ក្រសួងការពារជាតិ ត្រូវបាន​ប្រកាសថា វិជ្ជមាន​ជំងឺឆ្លង ក្នុង​ព្រឹត្តិការណ៍​សហគមន៍ ២០ កុម្ភៈ ខណៈ​យោធិន​រូបនោះ ធ្លាប់បាន​មកចាក់​វ៉ាក់សាំង បង្ការ​ជំងឺឆ្លង​ដ៏​កាច​សាហាវ​នេះ នៅ​គិលានដ្ឋាន មូលដ្ឋាន​សមុទ្រ ខេត្ត​ព្រះសីហនុ ក៏ដោយ​។​

​យោងតាម​លិខិត នៅ​ថ្ងៃទី​២៣ ខែមីនា ឆ្នាំ​២០២១ នេះ បង្ហាញថាៈ យោធិន​រូបនេះ បានមក​ចាក់​វ៉ាក់សាំង​បង្ការ​ជំងឺឆ្លង ចំនួន​២​លើក នៅ​គិលានដ្ឋាន មូលដ្ឋាន​សមុទ្រ ដោយ​លើក​ទី​១ នៅ​ថ្ងៃទី​២៥ ខែកុម្ភៈ ឆ្នាំ​២០២១ និង លើក​ទី​២ ថ្ងៃទី​១២ ខែមីនា ឆ្នាំ​២០២១ ។​

​បច្ចុប្បន្ន យោធិន​រូបនេះ កំពុង​សម្រាក​ព្យាបាល នៅ​សណ្ឋាគារ មួយកន្លែង ឈ្មោះ សា​កា​ណា ស្ថិតនៅ​សង្កាត់​លេខ​៣ ក្រុងព្រះសីហនុ ខេត្ត​ព្រះសីហនុ ។​

ចំពោះ​ករណី​ខាងលើនេះ មូលដ្ឋាន​សមុទ្រ បាន​ត្រួតពិនិត្យ និង​ស្រាវជ្រាវ រក​អ្នក​ប៉ះពាល់​ចំនួន ៥ នាក់ ដែល​បច្ចុប្បន្ន អ្នក​ទាំង ៥ ត្រូវបាន​បញ្ជូន ទៅ​មន្ទីរពេទ្យបង្អែក ខេត្ត​ព្រះសីហនុ ដើម្បី​យក​សំណាក ធ្វើតេស្ត​រក​មេរោគ​ឆ្លង​ដ៏​កាច​សាហាវ​នេះ​៕/V