ដោយៈ សរិទ្ធ / ភ្នំពេញៈ បុរសម្នាក់ ដែលមានវិជ្ជមានកូវីដ១៩ បានត្រូវរថយន្តមន្ទីរពេទ្យ បង្អែក រាជធានីភ្នំពេញ បានមកយកទៅព្យាបាល នៅព្រឹកថ្ងៃទី ២៤ ខែមីនា ឆ្នាំ២០២១។
លោក សេង វ៉ាន់ថា ចៅសង្កាត់រងទី១ សង្កាត់ស្ទឹងមានជ័យទី២ បានឲ្យដឹងថាៈ នៅម៉ោង ៧និង៥០នាទី ព្រឹកថ្ងៃទី ២៤ ខែមីនា ឆ្នាំ២០២១ រថយន្តពេទ្យ បានចុះមកដល់មុខផ្ទះ លេខ ១០MC ក្រុមទី៤ ភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ដែលអ្នកមានវិជ្ជមានកូវីដ១៩ គឺជាមនុស្សប្រុសឈ្មោះ សូ ហេង អាយុ ២៩ ឆ្នាំ។
អ្នកជំងឺខាងលើ ត្រូវបានដឹកយកទៅព្យាបាល នៅមន្ទីរពេទ្យភ្លាមៗ។ ដោយឡែក សមាជិក ៣ នាក់ ដែលរស់នៅជាមួយអ្នកជំងឺ ត្រូវបានធ្វើចត្តាឡីស័កនៅផ្ទះ និងហាមមិនឲ្យចេញក្រៅផ្ទះ ដោយមានកម្លាំងសមត្ថកិច្ច ដាក់យាមប្រចាំការ រហូតដល់ ១៤ ថ្ងៃ៕/V-PC
