ដោយៈប្រជាជន/ភ្នំពេញៈ ក្រោយបើកសម្ពោធការដ្ឋានផ្លូវ៣៨ខ្សែ កាលពីខែវិច្ឆកា ឆ្នាំ២០២០កន្លងទៅក្នុងក្រុងសៀមរាប ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែនគេសង្កេតឃើញថាការដ្ឋានទាំងឡាយក៏បានចាប់ផ្តើម។តែទន្ទឹមនោះទិដ្ឋភាពអវិជ្ជមានមួយចំនួនក៏បានកើតឡើងដែរដោយសារការរៀបចំមិនត្រឹមត្រូវនិងគ្មានសណ្តាប់ធ្នាប់ជាដើម។
ការស្ថាបនាផ្លូវក្នុងខេត្តសៀមរាបបច្ចុប្បន្នកន្លែងខ្លះហាក់ខ្វះការទទួលខុសត្រូវពីក្រុមអ្នកសាងសង់ និងពីអ្នកត្រួតពិនិត្យបើទោះ ការដ្ឋានទាំងនេះស្ថិតនៅក្នុងដំណាកកាលកំពុងសាងសង់ក៏ដោយ។ ក្នុងនោះ ដូចជា ការកាយធ្វើផ្លូវព្រមគ្នាទូទាំងខេត្ត ដោយគ្មានរៀបចំសម្រាប់ផ្លូវវាងបញ្ចៀសចរាចរណ៍, ការដ្ឋានគ្មានធានាបាននូវសុវត្ថិភាពចរាចរណ៍, ដីហុយគ្មានការស្រោចទឹកពេលថ្ងៃហុយសំពោង ។ ដីហុយចូលសួតរយៈពេល ១៣ខែមិនធម្មតាទេ។ កាយដីមុខផ្ទះប្រជាជន កាយរួចដាក់លូហើយអត់លុប ទុកចោល កាយចោលៗ។ ផ្ទះខ្លះត្រូវឡើងជាពណ៌លឿង។សម្ភារសំណង់ លូ បេតុង លូជ័រទុកដាក់មិនមានសណ្តាប់ធ្នាប់ គ្មានកន្លែងស្តុកទុកដាក់ស្រួលបួល បែរជាយកចិញ្ចើមថ្នល់ធ្វើជាកន្លែងទុកនាំឲ្យផ្លូវដែលតូចស្រាប់កាន់តែរួមតូចទៅ។ សម្ភារខ្លះមិនទាន់ដល់ពេលត្រូវធ្វើក៏ត្រូវបានស្រូតដឹកយកមកដាក់ចោលនិងប៉ះពាល់ដល់ការធ្វើចរាចរណ៍របស់ប្រជាពលរដ្ឋ។ ការកាយដីដាក់លូកន្លែងខ្លះមិនប្រុងប្រយ័ត្នកាយដាច់ខ្សែភ្លើង ខ្សែកាបទូរស័ព្ទ ទឹកស្អាតបង្កការរំខានដល់ជីវភាពរស់នៅ។កន្លែងខ្លះផ្លូវថ្នល់ លូ ដែលពីមុនត្រងបែរជាធ្វើផ្លូវថ្មីកោង វៀចដូចអន្ទង់អាំង។ការដាក់លូមិនបានជូនដំណឹង ឬប្រាប់ពីបច្ចេកទេសនៃការដាក់ ក្រោយមានបាតុភាពទើបលើកឡើងពីបញ្ហានេះបញ្ហានោះ។
ប្រជាជនក្នុងខេត្តសៀមរាបនិងនិយាយដោយឡែកប្រជាជនក្នុងក្រុងសៀមរាបពិតជាត្រេតអរចំពោះសមិទ្ធិដ៏ធំធេងផ្តល់ដោយសម្តេចតេជោប្រមុខរាជរដ្ឋាភិបាល។តែទន្ទឹមនេះក៏ចង់ឃើញបណ្ដាការដ្ឋានទាំងអស់ប្រព្រឹត្តិទៅដោយការទទួលខុសត្រូវនិង គិតពីសុខភាព សុវត្ថិភាពប្រជាជនផងដែរ៕សរន
